Nacyjanalny bank zajaŭlaje pra «značnuju pahrozu» biaśpiecy bankaŭskaj sistemy krainy i čakaje ad uradu nieadkładnych zachadaŭ u spravie stabilizacyi dziaržbankaŭ. Pra heta krynica ŭ orhanach dziaržaŭnaha kiravańnia paviedamiła «Interfaksu» — ahienctvu, blizkamu da Administracyi prezidenta.
Z adpaviednym listom da premjer‑ministra Siarhieja Sidorskaha źviarnuŭsia staršynia praŭleńnia NBB Piotr Prakapovič, paviedamlaje krynica Interfaksu ŭ orhanach dziaržkiravańnia.
U Nacbanku padkreślivajuć, što niebiaśpiečnaja situacyja ŭ bankaŭskim siektary źjaŭlajecca nastupstvam kryzisu likvidnaści ŭ dziaržaŭnych bankach, jaki pastajanna narastaje.
Situacyja ŭskładniajecca rostam prablemnych kredytaŭ, jakija za studzień‑žnivień vyraśli ŭ 3,3 raza.
Krytyčnaje paharšeńnie likvidnaści dziaržbankaŭ tłumačycca vysokaj kredytnaj nahruzkaj u miežach finansavańnia dziaržaŭnych prahramaŭ. Tak, za studzień‑lipień 2009 dziaržbanki pavialičyli abjom kredytavańnia dziaržprahram u 1,4 raza proci dakryzisnych anałahičnym pieryjadam 2008 hoda — da 6,76 trłn rubloŭ.
Jak paviedamlajecca, pry kancy vieraśnia — na pačatku kastryčnika abjom zatrymanych najbujniejšym biełaruskim bankam — «Biełarusbankam» — padatkaŭ pieravysiŭ 1 trłn rubloŭ u dzień.
Nacbank čarhovy raz prapanuje ŭradu źnizić patrabavańni da dziaržaŭnych bankaŭ pa finansavańni dziaržprahramaŭ i pieradać hetyja funkcyi dziaržaŭnamu ahienctvu raźvićcia, stvareńnie jakoha taksama źjaŭlajecca adnym z zabaviazańniaŭ Biełarusi pierad MVF.
Pieradača ahienctvu kredytnaha partfiela, stvoranaha ŭ ramkach finansavańnia dziaržprahramaŭ, dazvolić biełaruskim bankam «ačyścić» svaje bałansy, što pavinna častkova vypravić situacyju ź ich likvidnaściu.
Alternatyvaj dadzienaj reformie finansavańnia dziaržprahram źjaŭlajecca čarhovaja rekapitalizacyja dziaržbankaŭ za košt biudžetu.
Taki vyciek z Nacbanku zdolny spravakavać cunami na finansavym rynku.Faktyčna, havorka idzie pra toje, što najbujniejšyja banki krainy, u tym liku aščadny «Biełarusbank», stajać na miažy niepłaciežazdolnaści. Darečy, amal adnačasova prajšła infarmacyja, što spyniŭsia rost abjomu rublovych depazitaŭ u bankaŭskaj sistemie.
Jość tolki adno ale. U krytyčnych abstavinach kanca 2008 i pačatku 2007 hodoŭ dziaržsistema zachoŭvała poŭnuju niematu. Tym časam ciapier niebiaśpiečnaje vyśviatleńnie adnosinaŭ pamiž łabistami roznych ekanamičnych kursaŭ čamuści adbyvajecca ŭadkrytuju.Bankiry nie chočuć bolš kredytavać pramysłovaść. A pramysłovaść źnizić zaniataść i prypynić vypłaty zarobkaŭ biez novych kredytaŭ. Paŭstaje pytańnie, chto vinavaty? Palcy aŭtamatam spyniajucca na premjeru Siarhieju Sidorskim.
Ahienctva «Interfaks» maje ciesnyja suviazi z Administracyjaj prezidenta i siłavymi strukturami. Vypadkovych vyciekaŭ infarmacyi jano nie publikuje.
Vyhladaje na toje, što novaja mitrenha źviazanaja z hulnioj, jakuju łukašenkaŭcy viaduć z Zachadam. Kryzis u bankaŭskaj śfiery pahražaje kałapsam biełaruskaj ekanomicy. Heta dastatkovaja padstava, kab prasić dadatkovaj dapamohi. Ź inšaha boku, takim sama «pazityŭnym sihnałam» moža być źmiena Sidorskaha na asobu ź imidžam refarmatara.
Rašeńnia zahadki čakać niadoŭha. U kožnym razie,
zaŭtra ŭ bankach niepaźbiežna vystrajacca čerhi. Ludzi buduć zdymać depazity i mianiać rubli na valutu.
