Fota M.Patašius, www.lrytas.lt
U minuły paniadziełak u Koŭnie byŭ zabity akruhovy sudździa i 30‑hadovaja žančyna. Padazravany ŭ hetych zabojstvach Drasius Kiadzis za tydzień staŭ narodnym hierojem.
Abvieščany ŭ mižnarodny rosšuk 37‑hadovy Drasius Kiadzis dahetul nia znojdzieny. Litoŭskija pravaachoŭnyja orhany ŭ hetych pošukach nia majuć amal nijakaj padtrymki hramadzkaści, u vuličnych apytańniach ludzi adkazvajuć: kali b ja pabačyŭ Kiadzisa — nia «zdaŭ» by jaho palicyi. Čamu?
Adzin suprać sistemy
Pačatki hetaj historyi siahajuć minułaj poźniaj vosieni. 29 listapada D.Kiadzis źviarnuŭsia ŭ palicyju z zajavaj ab seksualnych złoŭžyvańniach u dačynieńni da jahonaj 4‑hadovaj dački z boku troch asobaŭ — sudździ Kovienskaha akruhovaha sudu Jonasa Furmanavičusa, palityka i biznesoŭca Andrusa Usasa i jašče adnaho nienazvanaha.
Aprača taho, D.Kiadzis źvinavaciŭ u saŭdziele sa zhadanymi asobami svaju byłuju sužycielku, maci dziaŭčynki — Łajmucie Stankunajcie, ź jakoj jon sudziŭsia za prava apieki nad dačkoj. Pavodle Kiadzisa, taja za hrošy zdavała dziaŭčynku ŭ «arendu» pedafiłam. U hetym joj dapamahała jaje siastra Vijaleta Naruševičenie, jakaja, pavodle Kiadzisa, pradastaŭlała dla padobnych «zabavaŭ» i svaju 8‑hadovuju dačku.
Rospač
Šli miesiacy, sprava ź miesca nie kranałasia. Straciŭšy nadziei i ciarpieńnie, źniavierany baćka achviary, parušajučy ŭsie jurydyčnyja praviły, źniaŭ pakazańni dački na videastužku, dzie jana padrabiazna pierakazvaje, što rabili ź joj darosłyja «dziadzi». Kala 200 listoŭ z dałučanym DVD‑dyskam byli razasłanyja deputatam Sojmu, eŭraparlamentaram, usim palityčnym partyjam, srodkam masavaj infarmacyi, roznym uradoŭcam.
Tady ŭ pavietry zapachła skandałam. Abvinavačanyja zajavili, što nia majuć ujaŭleńnie, pra što havorka. A.Usas zajaviŭ, što abvinavačańni Kiadzisa — sproba adpomścić jamu za dapamohu, jakuju jon akazaŭ Ł.Stankunajcie ŭ spravie apieki nad dačkoj. Tym časam u hramadztvie pačała razhortvacca dyskusija pra pedafiliju i pra «niepadsudnaść» niekatorych kołaŭ hramadztva.
Jašče ad lipienia Drasius Kiadzis, straciŭšy nadzieju na ŭvišnaść śledčych, pačaŭ pisać aficyjnyja listy «narodnamu prezydentu» Dali Hrybaŭskajcie, adnak nie damohsia nijakaha vyniku aprača aściarožnaha adkazu, što prezydent nia maje paŭnamoctvaŭ umiešvacca ŭ dziejańni pravaachoŭnych orhanaŭ. Usiaho aficyjnych zvarotaŭ było siem. Apošni ź ich byŭ vysłany 5 kastryčnika. U hety dzień u spravie adbyŭsia novy pavarot.
Kroŭ na kovienskim bruku
5 kastryčnika ŭ 8.30 u centry Koŭna byŭ zastreleny adzin z tych troch, kaho D.Kiadzis vinavaciŭ u pedafilii — sudździa Jonas Furmanavičus. Jašče praz paru hadzinaŭ palicyja znachodzić cieła zastrelenaj Vijalety Naruševičenie, pobač ź im — zarehistravany na imia Kiadzisa pistalet «Bereta». Mikraaŭtobus, na jakim dvoje čałaviek padjechali ranicaj da sudździ — stralaŭ kiroŭca — byŭ znojdzieny paźniej u toj samy dzień. Drasius Kiadzis prapaŭ biaź śledu. U jaho ŭ rukach zastajecca jašče adna adzinka aficyjna zarehistravanaj na jaho imia zbroi — vintoŭka «Vinčester».
Na minułym tydni kala ofisu, dzie pracuje jašče adzin nazvany Kiadzisom udzielnik spravy — Andrus Usas — znojdzieny žałobny vianok sa śviečkami — niedvuchsensoŭnaje papiaredžańnie ab niaŭchilnym pakarańni. Sam Usas tym časam pakinuŭ svaju Partyju hramadzianskaj demakratyi, dzie jon byŭ siabram prezydyjumu, i chavajecca ŭ nieviadomym miescy.
Naŭzdahon padziejam
Pošuki Drasiusa Kiadzisa dahetul zastajucca biasplonnymi. Za hety čas u litoŭskim hramadztvie adbylisia pracesy, jakija, mahčyma, buduć mieć dalokasiažnyja nastupstvy. Pramaŭčaŭšy ceły tydzień, prezydent D.Hrybaŭskajcie narešcie «pašyryŭšy» svaje paŭnamoctvy i dała «razhon» hieneralnamu prakuroru Alhimantasu Vałancinasu — jak najchutčej va ŭsim razazbracca.
Litoŭski Sojm uziaŭsia pravieści ŭ hetaj spravie admysłovaje parlamenckaje raśśledavańnie.
U Koŭni i Vilni prakaciłasia chvala pratestaŭ suprać pedafiłaŭ i tych, chto ich «kryšuje», demanstracyi padtrymki i salidarnaści z baćkam. U sacyjalnaj sietcy Facebook razharnułasia niebyvałych pamieraŭ kampanija z prapanovaj samomu Kiadzisu balatavacca na nastupnych vybarach na pasadu prezydenta Litvy.
 Z pryśviečanaj Kiadzisu staronki ŭ sietcy Facebook: «Za ślozy dziciaci jany zapłacili svajoj kryvioj |
Złačynca ci hieroj
Usie kamentatary adnahałosna adznačajuć naradžeńnie novaha nacyjanalnaha hieroja, novaha Tadasa Blindy, Robina Huda, narodnaha zastupnika za praŭdu i spraviadlivaść, jaki paŭstaŭ suprać šmathałovaj pačvary — skarumpavanaj i niekampetentnaj dziaržaŭnaj ułady, pravaachoŭnych instytucyjaŭ, deputataŭ, uradoŭcaŭ, palitykaŭ. Hałasy tych, chto papieradžaje ab niebiaśpiecy ŭsienarodnaj padtrymki metadaŭ samasudu abo naahuł sumniavajecca ŭ adnaznačnaj jasnaści spravy, patanajuć u bury narodnaha hnievu.
U hetaj sytuacyi litoŭskaje pravasudździe moža atrymacca ŭ vielmi składanaj sytuacyi. Nu, mahčyma, padazravanaha ŭ zabojstvie prychilnika samasudu tak i nia ŭdasca znajści. A što kali ŭdasca? Jak zachavać svoj tvar i nie ŭźniać suprać siabie trochmiljonny narod?
