«Za što musiać hinuć maje chłopcy, kali što?» Takoje pytańnie ŭ łob zadaŭ Alaksandr Łukašenka paŭtara miesiaca tamu na niefarmalnym samicie ADKB u Kirhizii.
Pytańnie było adrasavana najpierš Maskvie. Z kantekstu vynikała, što jano maje absalutna kankretny materyjalny sens: dostup na rasijski rynak, ceny na enierharesursy. Kali 16 listapada biełaruskaha prezidenta nie budzie na kazachstanskim palihonie Matybułak, značyć, stanoŭčaha adkazu na svajo pytańnie jon nie atrymaŭ.
Na momant, kali pišucca hetyja radki, Łukašenku ŭ Kazachstanie nie čakajuć. «Viečaram u Ałmaty płanujuć prylacieć kiraŭniki Armienii Sierž Sarhsian, Tadžykistana Emamali Rachmon, Kyrhyzstana Kurmanbiek Bakijeŭ i Rasii Dźmitryj Miadźviedzieŭ. Razam z našym kiraŭnikom dziaržavy Nursułtanam Nazarbajevym za vučeńniami buduć nazirać piać prezidentaŭ», — dakładna padličyli ŭ pres‑słužbie ministerstva abarony Kazachstana.
U lubym vypadku
miły dla Maskvy prajekt ADKB maje bledny vyhlad.Chacia manieŭry na Matybułaku simvalična nazvany «Uzajemadziejańnie‑2009», uzajemadziejničajuć na ich faktyčna tolki rasijcy z kazachami. Lik ich bajcoŭ idzie na tysiačy. Jašče dźvie krainy dasłali maleńkija padraździaleńni: Kyrhyzstan — śpiecnaz «Skarpijon», Armienija — motastrałkovuju rotu. Uźbiekistan naohuł pas.
Ad Biełarusi — niekalki štabnych aficeraŭ dy ministr abarony Malcaŭ.
Takim čynam, ideja Kalektyŭnych sił apieratyŭnaha reahavańnia apynułasia ŭ padviešanym stanie. U značnaj stupieni praz kryŭdy biełaruskaha prezidenta. U červieni jon naładziŭ demarš — nie palacieŭ na samit ADKB u Maskvu — praz toje, što Rasija tarmaznuła na miažy małočnyja fury. Naš adkaz Čembierlenu, to bok hałoŭnamu sanitarnamu doktaru Rasii Aniščanku, atrymaŭsia ŭražalnym.
Nu a ciapier, padobna, aleju ŭ ahoń padliła palemika ŭ Kišyniovie. Tam 9 kastryčnika na samicie SND Łukašenka znoŭ schapiŭsia z rasijskim ministram finansaŭ Kudrynym, jaki, pavodle viersii pieršaha, jašče ź viasny «kansalidavaŭsia z našymi admarozkami». Dyk voś, niezadoŭha da samita Kudryn z nahody słavutaha pavisłaha tranšu na 500 miljonaŭ dołaraŭ znoŭ prazrysta daŭ zrazumieć: aha, zaraz vam tut razhonimsia! U vyniku atrymaŭsia vialiki skandał. I voś ciapier abiacany podpis biełaruskaha prezidenta pad pahadnieńniem ab stvareńni KSAR, zdajecca, znoŭ rastaje ŭ pavietry, jak Češyrski kot.
Ale kali navat dakumient i budzie padpisany, Maskva nie dačakajecca, kab biełaruskija bajcy padstaŭlali hałovy pad kuli dzieści ŭ Centralnaj Azii.
Da viedama, lehienda manieŭraŭ «Uzajemadziejańnie‑2009» takaja: na Kazachstan napali bujnyja terarystyčnyja siły, i na dapamohu jamu iduć padraździaleńni sajuźnikaŭ. Pryčym kali ŭ vieraśni na manieŭrach «Zachad‑2009» rasijcy dy biełarusy vajavali ź vietranymi młynami (dzie jany, ordy NATO?), to scenar manieŭraŭ na Matybułaku, na žal, značna bolš realistyčny. «Heta scenar sutyknieńnia ź isłamskimi radykałami», — havoryć minski vajskovy ekśpiert Alaksandr Alesin.
Dyk voś, nakont mahčymaj prysutnaści biełaruskich sił u haračych punktach užo była palemika miž rasijskim pasłom Surykavym i biełaruskim MZS. Apošni vyrazna daŭ zrazumieć: zakanadaŭstva krainy nie dazvalaje pasyłać našych chłopcaŭ vajavać da čorta ŭ bałota. Za jakoj krainaj zastaniecca vyrašalnaje słova, zdahadajciesia z troch razoŭ. U Biełarusi sapraŭdy niama, miakka kažučy, aktualnych stratehičnych intaresaŭ u haračych stepach Centralnaj Azii. A kali Rasija, z punktu hledžańnia biełaruskaha načalstva, stała skupicca, dyk tym bolš impetu nie čakajcie.
Upartaści ŭ supraćstajańni z Kramlom Minsku dadajuć hrošy, što spraŭna iduć ad MVF. Dniami ž akreśliłasia novaja krynica. Namieśnik ministra zamiežnych spraŭ Biełarusi Siarhiej Alejnik paviedamiŭ, što i ad ES da kanca hoda jość šaniec atrymać sotni miljonaŭ jeŭra. Pryčym nie vyklučana i biazvypłatnaja dapamoha.
Babulka Jeŭropa spakušaje.
Nie dalej jak 15 kastryčnika vusnami Žana‑Eryka Cholcapfiela, časovaha pavieranaha ŭ spravach Jeŭrapiejskaj kamisii ŭ Biełarusi, dla krainy abmalavana bolš vyraznaja pierśpiektyva jeŭrapiejskaj intehracyi: «My prapanoŭvajem pavyšeńnie ŭzroŭniu palityčnaha ŭdziełu da zaklučeńnia asacyjatyŭnaha pahadnieńnia».
Viadoma, Brusiel taksama nie za pryhožyja vočki abiacaje svaje pierniki. Ale nie biare za horła, u adroźnieńnie ad niekatorych. Dyj spakusa vialikaja. Pavodle słoŭ dypłamata, «kali my zmožam zaklučyć asacyjatyŭnaje pahadnieńnie, takoje jak, naprykład, jość z Ukrainaj, to vyjdziem nie tolki na stvareńnie zon svabodnaha handlu, ale i na nabližeńnie da ŭnutranaha rynku Jeŭrasajuza».
Darečy, try miesiacy tamu karespandent aŭstryjskaj Die Presse pacikaviŭsia ŭ Łukašenki: što dla biełaruskaha boku bolš pryjarytetnaje — udzieł u mytnym sajuzie z Rasijaj i Kazachstanam abo ŭ zonie svabodnaha handlu ź ES? Adkaz byŭ uzoram prahmatyzmu: «Dla nas pryjarytet toje, što raniej my zmožam realizavać».
Tak što papaŭźci pa švach moža nie tolki prajekt KSAR, ale i zaduma hetaha traistaha sajuza. U Maskvy, padobna, niama ni lišnich hrošaj, ni žadańnia płacić za łajalnaść biełaruskaha kiraŭnictva. Na pytańnie, što moža aznačać adsutnaść Łukašenki na Matybułaku, ekśpiert Alaksandr Alesin adkazaŭ afarystyčna: «Značyć, Sidorski nie damoviŭsia z Pucinym».
Nahadaju: pieramovy dvuch premjeraŭ (cana na haz i ŭvieś hordzijeŭ vuzieł handlova‑ekanamičnych dačynieńniaŭ) adbylisia 6 kastryčnika ŭ Nova‑Aharovie. Pastfaktum było mahilnaje maŭčańnie abodvuch bakoŭ. Voś jano, zdajecca, i adhuknułasia.
