Za apošni hod biełarusy musili zaciahnuć pajasy, ale stupień padtrymki kiroŭnaha kursu nie pachisnułasia. Takija vysnovy možna zrabić ź vieraśnioŭskaha apytańnia NISEPD. Na jaho sajcie tolki što vystaŭleny padrabiaznyja materyjały hetaha daśledavańnia.
Sacyjołahi źviartajuć uvahu na svojeasablivy simptom abvału «biełaruskaha cudu». Kali ciaham sytaha pieryjadu naftahazavaj durnicy niaŭchilna rasło spažyvańnie kańjaku, to ciapier suajčyńniki musiać usio čaściej pierachodzić na «čarlik».
Dy i na zakusi, chalera, davodzicca ekanomić! Zadavałasia pytańnie: «Ci možacie vy skazać, što za apošnija 2-3 miesiacy vy i čalcy vašaj siamji stali kuplać tańniejšyja pradukty dy inšyja tavary, čym kuplali raniej?». «Niesumnienna tak», adkazali 22,3%, «najchutčej što tak» — 41,0%. Ličy, dźvie traciny zaciahnuli pajasy ŭ litaralnym sensie.
«Ci vierycie vy, što da 2011 hoda my budziem žyć jak u Jeŭropie?» — spytalisia daśledčyki, majučy na ŭvazie histaryčnuju pramovu aficyjnaha lidera na śvinakompleksie ŭ Lachavickim rajonie. Elektarat nie padzialiŭ aptymizmu Łukašenki: «nie» — 69,2%, «tak» — 13,8%.
Pry hetym 57,3% pierakanany, što ŭ Jeŭropie žyćcio lepšaje, čym u nas (advarotny punt pohladu ŭ 12,2%).
Kryzis trochi prasunuŭ u masy rynkavyja pohlady. Navat siarod tych, chto daviaraje Łukašenku, tolki 17,9% zastajucca adeptami płanavaj ekanomiki. Cikavaja dynamika adkazaŭ na pytańnie: «Na jakim pradpryjemstvie vy chacieli b pracavać?». Hod tamu 44,1% adkazali, što na dziaržaŭnym, i tolki 28,0% — što na pryvatnym. Zaraz ža suadnosiny — 36,5% vs 36,9%. Spaŭzańnie zarobkaŭ dy prychavanaje paŭbiespracoŭje na zavodach zaŭvažna źmianili nastroi na karyść pryvatnych haspadaroŭ.
Najbolej ža pakazalnym jość voś što: šok ad kryzisu prajšoŭ, biełarusy źmirylisia z novaj realnaściu.
Paśla spadu, vyklikanaha studzieńskim abvałam rubla, znoŭ pavysiŭsia ŭzrovień sacyjalnaha aptymizmu. Całkam abo zbolšaha zadavolenych umovami svajho žyćcia znoŭ stała bolej, čym niezadavolenych.
I kali ŭ sakaviku tolki 40,0% ličyli, što «stanovišča spraŭ u krainie raźvivajecca ŭ pravilnym napramku», to u vieraśni takich stała 53,3%. Praktyčna jak i hod tamu (53,4%).
Sacyjołahi miarkujuć, što, nasupierak apazicyjnamu stereatypu, ciapierašniaja ŭłada trymajecca nie na represijach dy administracyjnym cisku, a najpierš na maŭklivaj zhodzie, padmacavanaj paternalizmam, i «dastatkova prafiesijna arhanizavanaj palityčnaj demahohii». Inačaj kažučy, narod zambujuć. Hramadskaja dumka lohka paddajecca manipulacyjam. A kali chto i suprać, dyk paralizuje volu pierakanańnie: usio adno ničoha nie źmieniš!
Cikavaja dynamika mierkavańniaŭ u pytańni budaŭnictva AES. Raniej adnosnaja bolšaść była suprać. Ułada nie stała nadta palemizavać, a prosta praciahvała hnuć svajo. U vyniku dola zhodnych ź jaje namieram aščaślivić nacyju mirnym atamam pakrysie rasła, rasła i zaraz pieravyšaje ŭžo dolu praciŭnikaŭ.
Vyhladaje na toje, što mnohija biełarusy sapraŭdy myślać pavodle sakramientalnaj paradyhmy, adlustravanaj u aniekdocie pra ćvik u kreśle: a moža, tak i treba?
I voś jašče jaki paradoks. Z adnaho boku, prezident — na pieršym miescy ŭ pieraliku vinavatych za paharšeńnie ekanamičnaj situacyi ŭ krainie. Na jaho paviesili adkaznaść 42,7% respandentaŭ (na ŭrad — 40,7%). Ź inšaha boku, davier da jaho zastajecca tefłonavym: u śniežni letaś (pierad devalvacyjaj) — 48,4%, u vieraśni sioleta — 49,2% (navat trochi vyras!).
Na pytańnie, čamu mnohija daviarajuć Łukašenku, samy papularny adkaz — 44,2% — taki: «Ludzi nie bačać, na kaho inšaha jany mahli b paspadziavacca». U zasłuhu ž jamu staviać najpierš stabilnaść.
Pry hetym u narodu niama asablivych iluzij nakont pryrody palityčnaha režymu. Adnosnaja bolšaść miarkuje, što ciapierašniaja ŭłada vykazvaje intaresy čynoŭnikaŭ dy biurakrataŭ. Niaŭchilna raście dola pierakananych u tym, što Łukašenka «prosta imkniecca umacavać svaju ŭładu».
Sacyjołahi NISEPD užyvajuć trapny vyraz rasijskaha kalehi Juryja Lavady — «łajalnaja niezadavolenaść».
Na dumku admysłoŭcaŭ, mienavita
atamizavanaść biełaruskaha hramadstva viadzie da taho, što jano admaŭlajecca ad dziejańniaŭ dziela źmieny situacyi. Niama salidarnaści, zvyčki da kalektyŭnaj abarony svaich intaresaŭ.
Kryzis nie pryvioŭ da ŭzdymu pratestavych nastrojaŭ. I najpierš — praz raściarušanaść hramady, paternalisckija pierakanańni. Mnohija biełarusy nie majuć resursaŭ (i ci nie najpierš psichałahičnych), kab spadziavacca na ŭłasnyja siły. A taksama nie navučanyja jadnacca, supolna zmahacca za svaje pravy. Tamu maleńki čałaviek i nie dumaje pra źmienu palityčnaj sistemy. Maleńki čałaviek spadziajecca, što za ciapierašniaj uładaj va ŭsiakim razie nie prapadzie jak rudaja myš.
Ale hetaja niesamastojnaść šarahovaha ludu, adsutnaść mocnaha palityčnaha kłasu, nieraźvitaść hramadzianskaj supolnaści pahražajuć niepradkazalnymi nastupstvami, kali z aŭtarytarnaj sistemy raptam vypadzie piersanaliscki stryžań.
