Ad 19 kastryčnika ŭsie rehijanalnyja teleradyjokampanii pačali vypuskać u efir vypuski navinaŭ pa‑biełarusku.
Zahadčyk adździeła navinaŭ mahiloŭskaj studyi telebačańnia Śniažana Hančarova patłumačyła «NN» takoje rašeńnie kampanii tym, što «heta daŭniaja naša zaduma. Ja nie mahu adkazvać za inšyja rehijony, ale my daŭno prapanoŭvali i rychtavali prajekty biełaruskamoŭnych pieradač. Ad novaha hodu płanujem uklučyć niekalki biełaruskamoŭnych rubryk u ranišni błok».
Zahadčyk adździełu infarmacyi homielskaj teleradyjokampanii Alaksandr Ramašoŭ taksama paćvierdziŭ infarmacyju, ab pierachodzie na biełaruskuju movu: «Heta ahulnarespublikanskaja akcyja, jak ja zrazumieŭ.Płanavałasia, što piarojdziem na biełaruskuju movu z pačatku kastryčnika, adnak adbyłosia heta tolki ciapier z roznych pryčyn. U kalektyvie našym nie nazirałasia jakoj‑niebudź vostraj reakcyi. U krainie dźvie dziaržaŭnyja movy».
U hrodzienskaj studyi telebačańnia navinu taksama z zadavalnieńniem paćvierdzili, adnak u pryjomnaj kamientavać jaje admovilisia, spasłaŭšysia na niekampietentnaść. Maŭlaŭ, rašeńnie prymałasia na samym viersie, tamu źviartajciesia pa kamientary da dyrektara.
Dyrektar teleradyjokampanii Hrodna Mikałaj Mielničenka adznačyŭ, što «ŭ nas dźviuchmoŭje, tamu vyrašyli pašyryć biełaruskamoŭnaje viaščańnie. My praanalizavali situacyju i vyjavili, što było zamała pieradač na biełaruskaj movie. Tamu i vyrašyli pavialičyć abjom biełaruskaj movy ŭ našaj sietcy. Budziem hladzieć. Kali toje budzie nieabchodna, to pačniom pavialičvać i dalej. Mahčyma, što ŭ nastupnym hodzie.
Jość niekatoryja ciažkaści. Mnohija supracoŭniki padzabyli movu. Ale pracujuć. Usio budzie dobra».
Sinchronnaść, ź jakoj u rehijanalnych kampanijach zaŭvažyli pryhniečany stan biełaruskaj movy ŭ sietcy viaščańnia, zdolnaja ŭrazić. Adnak fakt hety sam saboju pazityŭny. Asabliva važna, što pa‑biełarusku vyrašana puskać u efir naviny. U rehijonach heta samyja papularnyja prahramy miascovych kampanij.
