Na 99‑m hodzie žyćcia pamierła Maryja Čapialova (z Šabuniaŭ), plamieńnica Ivana i Antona Łuckievičaŭ.
21 kastryčnika ŭ rasiejskim Sankt‑Pieciarburhu na 99‑m hodzie žyćcia pamierła Maryja Čapialova (z Šabuniaŭ). Jaje maci Emila była rodnaj siastroj słynnych dziejačaŭ biełaruskaha adradžeńnia Ivana i Antona Łuckievičaŭ.
Jana naradziłasia 16 studzienia 1911 hodu ŭ horadzie Libava (ciapier Lijepaja, Łatvija) u siamji inžyniera‑čyhunačnika Alesia Šabuni i vypusknicy biełastockaha instytutu šlachietnych dziaŭčat Emili Łuckievič. U 1916‑m siamja pierajechała ŭ Minsk. Tut Maryja skončyła miedycynski instytut, paśla čaho razam z hrupaj siabroŭ była aryštavanaja i abvinavačanaja ŭ antysavieckaj prapahandzie. Asudžanaja ŭ 1936‑m na try hady łahieraŭ, jana nikoli ŭžo nie zmahła viarnucca ŭ Biełaruś i navat ciaham dvaccaci hadoŭ nia viedała pra los maci i siastry Janiny (babuli słavutaha śpievaka Dančyka), jakija padčas vajny vyjechali za miažu.
Usio paślałahiernaje žyćcio spadarynia Maryja pracavała lekaram u Mančahorsku Murmanskaj vobłaści. Raspaviadaje dačka Marharyta Piarova:
«Mama była vielmi addanaja svajoj pracy. U chacie ŭ nas razmaŭlali tolki pra leki i chvorych. Mama pracavała i ŭdzień, i ŭviečary, i nočču jaje vyklikali».
Paśla vychadu na piensiju ŭ 1973 hodzie jana pierajechała da dački ŭ Sankt‑Pieciarburh i aktyŭna ŭklučyłasia ŭ žyćcio biełaruskaj hramady, a paźniej — i tavarystva achviaraŭ stalinizmu «Miemaryjał».Spadarynia Piarova praciahvaje:
«Niahledziačy na stałyja hady, na pieražytaje ŭ łahierach, jana była vielmi mabilnaja. Čatyry hady tamu my śviatkavali biełaruskaj hramadoj jaje 95‑hodździe. Sabrałasia šmat ludziej, pryjazdžaŭ Dančyk. Tak było pryhoža, tak było cudoŭna. Jana tak dobra vyhladała, takaja maładaja. Pobač ź joj ludzi prosta lepšymi stanavilisia. Niejkaje śviatło ad jaje było. Što ciocia Jania, što mama — heta takaja šlachietnaść, jakoj užo niama».
Šmathadovaje siabroŭstva z naščadkami Łuckievičaŭ źviazvaje Irynu Nižankoŭskuju, unučatuju plamieńnicu pieršaha redaktara «Našaj Nivy» Alaksandra Ŭłasava i padčarku movaznaŭcy Branisłava Taraškieviča. Raźvitańnie z Maryjaj Čapialovaj dla jaje — raźvitańnie z cełaj epochaj pieršych biełaruskich adradžencaŭ:
«Jana była apošniaj z taho starejšaha pakaleńnia, kaho ja viedaju, źviazanych ź biełarusami. Naša siamja bolš vieku siabravała ź siamjoj Łuckievičaŭ. I heta siabroŭstva naša praciahvajecca. Pieršy raz ja paznajomiłasia z Maryjaj Alaksandraŭnaj u Radaškavičach, kudy jana pryjechała sa svaim stryječnym bratam Lavonam Łuckievičam da majoj mamy.Na žal, paźniej našy spatkańni byli bolš sumnyja. Niekalki razoŭ ja ź joj spatykałasia ŭ Vilni. Razam byli na pachavańni Zośki Vieras, Jurki Łuckieviča. Paru hadoŭ tamu ja adviedała haścinny dom Maryi Alaksandraŭny ŭ Pieciarburzie, i jana mianie ŭraziła, što ŭ takim užo vieku stałym, katoraja prajšła takoje ciažkoje žyćcio, jana była vielmi aptymistyčnaja, lubiła paśmiajacca, pažartavać, była takaja viasiołaja».
U Maryi Čapialovaj zastalisia dačka Marharyta i dvoje ŭnukaŭ — Natalla i Pavał.
