Prezidentka Litvy Dala Hrybaŭskajte ćviorda adkazała kaardynataru hramadzianskaj inicyjatyvy «Chartyja-97» Andreju Sańnikavu ŭ časie mižnarodnaj kanferencyi ŭ Ryzie.
U časie dyskusii Sańnikaŭ zajaviŭ, što Hrybaŭskajte źniavažyła biełarusaŭ, zaprasiŭšy Łukašenku ŭ Vilniu. Vy pahraźli ŭ hieapalitycy i zabylisia pra kaštoŭnaści, dakaraŭ jon.
Hrybaŭskajte adkazała ŭ vielmi ćviardym tonie: «Kali vy chočacie praciahu palityki, jakaja była biezvynikovaj 10 hadoŭ, heta vaša prava. A ja liču, što treba dać šaniec — nie režymu, a biełaruskamu narodu, na toje, kab dałučycca da Jeŭropy».
Prezident Estonii Tomas Ilves dadaŭ: jon za bieźvizavy režym ź Biełaruśsiu. Jon zaŭvažyŭ, što situacyja z pravami čałavieka ŭ Rasii našmat horšaja, čym u Biełarusi, tym nie mienš z Rasijaj ES damaŭlajecca.
«Biełaruś — dyktatura, — dadaŭ Ilves, — ale nie apošniaja dyktatura ŭ Jeŭropie».
Štohadovaja kanfierencyja ŭ Ryzie sioleta mieła za nazvu «Adnaŭleńnie ekanomiki pry źmienlivaj situacyi ź biaśpiekaj: transatłantyčny paradak dnia — 2010». Jana prajšła 23-24 kastryčnika. U joj uziali ŭdzieł kiraŭniki troch bałtyjskich krainaŭ, ministry zamiežnych spravaŭ šerahu jeŭrapiejskich dziaržavaŭ, vysokapastaŭlenyja ŭradoŭcy ZŠA.
Niezaležnaje hramadstva Biełarusi ŭ Ryzie reprezientavali, aprača Sańnikava, dyrektar Biełaruskaha instytutu stratehičnych daśledavańniaŭ Vital Silicki, zasnavalnik sajtu E-Belarus.org Michał Daraševič, były pasoł Biełarusi ŭ Łatvii i palitviazień Michał Marynič, kiraŭnica bruselskaha ofisu «Za demakratyčnuju Biełaruś» Volha Stužynskaja.