U rasparadžeńnie žurnalistaŭ ahienctva BiełaPAN trapili miedycynskija daniasieńni pra toje, što pryčynaj śmierci dźviuch asobaŭ 27 i 36 hadoŭ (pamierli ŭ adzin dzień) źjaviłasia pnieŭmanija. Adnak va ŭzorach tkanin pamierłych «vyjaŭlena RNK hrypu A(H1N1) swine».
Historyja śmierci mužčyny 27 hadoŭ takaja. Pieršapačatkova jon z vysokaj tempieraturaj źviarnuŭsia ŭ rajonnuju palikliniku, lačyŭsia doma, ale praź niekalki dzion apynuŭsia ŭ 6‑j lakarni, dzie i pamior 26 kastryčnika.
Uvohule, pavodle słovaŭ krynicy «Biełorusskich novostiej» — lekara adnaho z špitaloŭ Mienska, u Biełarusi ad hrypu A(H1N1) pamirajuć hałoŭnym čynam maładyja ludzi.
Składanaść u tym, što zaklučeńnie pra śmierć źjaŭlajecca tolki pieršym krokam u dokazie śmierci ad virusu i, jak padkreśliŭ surazmoŭca, daje mahčymaść čynoŭnikam biaździejničać, zajaŭlać pra źmiašanuju infiekcyju i hetak dalej.
Dla śćviardžeńnia, što śmierć nastupiła mienavita ad hrypu A(H1N1), patrebny patałahaanatamičny dyjahnaz, histałahičnyja daśledavańni, jakija i zdolnyja dakazać, što pryroda pnieŭmanii źviazana ź virusam A(H1N1). Miedycynskija čynoŭniki mohuć śćviardžać, što hryp źjaŭlajecca fonavym dyjahnazam, a nie pieršapryčynaj uskładnieńniaŭ, i buduć farmalna pravy.
Pakul doktar vałodaje infarmacyjaj prykładna pra dziesiać virusałahična paćvierdžanych vypadkach śmierci ŭ vyniku hrypu A(H1N1). Jon śćviardžaje: «Pnieŭmanija, pra jakuju idzie havorka, źjaŭlajecca ŭskładnieńniem hrypu A(H1N1), nie bakteryjalnaj, a źviazanaj z paražeńniem sasudaŭ.
Kažučy prostaj movaj, chvory čałaviek zachłynajecca, nie moža dychać. Jaho adpraŭlajuć na štučnuju vientylacyju lohkich, ale jon pamiraje. Raźvivajecca zachvorvańnie za try‑čatyry dni».
Aficyjnaha paćvierdžańnia słoŭ doktara niama. Pvodle niekatorych dadzienych, lekaram zabaroniena padavać jakija b tam ni było źviestki pra biahučuju situacyju pa virusie A(H1N1). Na zapyty ŭ Ministerstva achovy zdaroŭja dahetul niama adkazu. Na pres‑kanfierencyjach ža pradstaŭniki ministerstva admaŭlajuć vypadki śmierci ŭ vyniku raźvićcia hetaha virusu abo admaŭlajucca ad kamientaroŭ. Usio heta — kab paźbiehnuć paniki siarod nasielnictva. Čynoŭniki nie razumiejuć, što praŭdu ŭtojvać doŭha niemahčyma, jana ŭsio adno pratočycca i, šmatkroć pamnožanaja ludskimi čutkami, pasieje jašče bolšuju paniku.
Krynica kanstatuje rezki rost zachvorvańnia pnieŭmanijaj u Biełarusi i Miensku.
Jon śćviardžaje, što ŭ naš čas śmiarotnaść ad hetaha zachvorvańnia značna pieravyšaje zvyčajnyja pakazčyki dla takoj pary hoda.
U reanimacyjach — vielizarnaja kolkaść chvorych ź pnieŭmanijaj. Ci ŭsio jany abśledujucca na virus A(H1N1), jon skazać nie moža.
Lekar na hety kont kaža: «Čynoŭniki bajacca paniki. Viedajecie historyju pra karovu, jakaja patanuła ŭ sažałcy, dzie siaredniaja hłybinia 50 santymietraŭ? Tanuła jana, zrazumieła, tam, dzie vada była bolš za dva mietry. Manipulavać ličbami možna kolki zaŭhodna».
Pakolki daniasieńnie, kopijaj jakoha vałodaje redakcyja, nakiravana 28 kastryčnika ŭ liku inšych i hałoŭnamu dziaržaŭnamu sanitarnamu lekaru Biełarusi Valancinie Kačan,
doktar ličyć, što jana vałodaje infarmacyjaj.
Tym časam Valancina Kačan u tok‑šoŭ «Vybar» telekanała ANT 2 listapada paabiacała nie chavać infarmacyju ŭ vypadku śmierci kaho‑niebudź ad «peŭnaha hrypu». «Ja prosta chaču zapeŭnić, što, kali my budziem pierakanany na 100%, što ŭ nas kankretny čałaviek pamior ad mienavita hetaha hrypu, ja viedaju, što my ŭ abaviazkovym paradku adrazu heta zafiksujem i pradstavim srodkam masavaj infarmacyi», — zajaviła Kačan.
Infarmatar bje tryvohu: u Biełarusi dahetul nie ŭviedzieny supraćepidemičnyja mierapryjemstvy, a ŭłady chavajuć praŭdzivaje stanovišča rečaŭ. Na jaho dumku, niedastatkova prosta padoŭžyć vakacyi ŭ škołach, nieabchodna spynić zaniatki ŭ VNU, siarednie‑śpiecyjalnych ustanovach, praftechvučelniach.
«Hryp vielmi taksičny, chutka raspaŭsiudžvajecca, a lačyć jaho ŭ našaj krainie praktyčna niama čym», — kaža doktar.
Pavodle jaho infarmacyi, u Biełarusi brakuje miedykamientaŭ dla lačeńnia siezonnaha i śvinoha hrypu, zaścierahalnych masak. Nazirajecca vostry deficyt dziejsnaha srodku «Tamiflu» — niahledziačy na darahi košt (kala 120 tysiač rubloŭ za ŭpakoŭku), jaho ŭžo raskupili.
Pavodziny ŭład pa ŭtojvańni praŭdzivaj situacyi źjaŭlajecca niedalnabačnym, ličyć doktar. U naš čas situacyja takaja, što nieabchodna nie rapartavać, što jana pad kantrolem, a prymać ekstranyja miery.
Jon pryvodzić u prykład pavodziny ŭrada Ukrainy:
«Kraina źviarnułasia za dapamohaj i atrymała dapamohu.Preparat «Tamiflu», jaki zakupleny ŭkrainskim uradam, užo dastaŭleny ŭ abjomie 600 tysiač doz. Pa miedycynskich normach, hetaha dosyć dla taho, kab zabiaśpiečyć usie rehijony Ukrainy i zrabić padvojny zapas».
Biełaruś ža, padkreśliŭ doktar, stanovicca palihonam dla vyprabavańnia virusa ŭ naturalnych umovach, kali prafiłaktyka niedastatkovaja, a lačeńnia praktyčna niama: «Abaviazak sistemy achovy zdaroŭja składajecca ŭ tym, kab previentyŭna zakupić nieabchodnyja miedykamienty, sprahnazavać situacyju padvyšanaha popytu. Nieabchodna była zakupić prynamsi dastatkovuju kolkaść zaścierahalnych paviazak. Ale stała tak, što naša sistema niamohłaja pierad epidemijaj. Pry hetym tranślujecca ideja pra toje, što virus masava prysutničaje va Ukrainie, u Rasiei, ale nie ŭ nas».
Doktar padkreśliŭ: biełaruskim miedykam prosta zabaroniena davać infarmacyju hramadskaści (hetym i tłumačycca jaho ananimnaść). I paćviardžaje heta prykładami sa svajoj praktyki: «Nam paŭtarajuć pra toje, što nielha siejać paniku, što značyć u razumieńni čynoŭnikaŭ davać praŭdzivuju infarmacyju.
Nam vielmi stroha zabaranili kantaktavać z presaj…
U Biełarusi imknieńnie da źnižeńnia ŭzroŭnia zachvorvańnia dachodzić da absurdu i falsifikacyj. Pytańni achovy zdaroŭja stanoviacca pytańniami palityčnymi. Nam vyvaročvajuć ruki, kab my stavili palitkarektnyja dyjahnazy. Hryp — jašče adzin dokaz u hetym šerahu».
Usie naviny na temu epidemii hrypu, parady, daviedki i žarty
