Takija akcyi ŭ horadzie nad Niomanam ładziacca raz na kvartał.
U piatnicu 13 listapada ŭ Hrodnie projdzie čarhovy dzień ćviarozaści. Jak adznačaje Błoh Hrodno s13, haradskija ŭłady praciahvajuć prytrymlivacca svajho płana — 1 «dzień» u kvartał. Aŭtar błohu skieptyčna stavicca da inicyjatyvy ŭładaŭ i miarkuje, što «takija dni zusim nijak nie ŭpłyvajuć na tych, dziela kaho jany ładziacca, bo vypivochi ŭžo daŭno ŭ kursie, što lubimaje vino, piva i harełku možna nabyć u hety dzień u lubym bary». I dadaje: «Zvyčajna ŭ hety dzień ułady zaklikajuć napoŭnić svajo žyćcio śviatam zdaroŭja i radaści, zrabić śviet lepšym i bolš čyściejšym, pieramahčy ŭłasnyja słabaści i pakłapacicca pra tych, chto pobač». Dyk jakuju ž śviatočnuju prahramu prapanujuć hrodzienskija ŭłady mieścičam u čarhovy dzień ćviarozaści? Zhodna aficyjnaj infarmacyi, haradskija mierapryjemstvy ŭ ramkach Dnia ćviarozaści ŭ piatnicu 13-ha buduć adbyvacca pavodle asobnaha płana. Aznajomicca z płanam pakul niemahčyma, ale karcinu hetaha dnia možna skłaści z płana haradskich mierapryjemstvaŭ na 9-15 listapada 2009 h. Tak, uzorny muzyčna-dramatyčny teatr «Hrodzienski zvanočak» zaprašaje na śpiektakl śpiektakl «Stravusionak Roki», Hrodzienski abłasny teatr lalek pakaža «Chto adkaža za płanietu?». Historyka-archieałahičny muziej u hetyja dni prapanuje naviedać piersanalnuju vystavu žyvapisu Siarhieja Hrynieviča, haradskaja vystavačnaja zała – vynikovuju vystavu Mižnarodnaha pleneru «Hrodna – daroh skryžavańnie» i h.d. Amatary sportu mohuć naviedać pieršynstvo Hrodna pa volnaj baraćbie siarod junakoŭ, pa baskietbole siarod VNU horada. 13 listapada ŭ Hrodna ŭ ramkach čempijanatu krainy pa chakiei z šajbaj adbudziecca sustreča miascovaha «Niomana» z navapołackim «Chimikam». Amatary valejbołu mohuć naviedać pajadynak pamiž hrodzienskim «Kamunalnikam» i viciebskim «Marka».
***
Dni ćviarozaści ŭ Minsku i haradach Biełarusi adbyvajucca ź inicyjatyvy byłoha ministra ŭnutranych spraŭ Uładzimira Navumava. Abmiežavańnie na prodaž śpirtnych napojaŭ pa rekamiendacyi miascovych uładaŭ uvodzicca ŭ časie praviadzieńnia školnych vypusknych viečaroŭ. U Hrodnie ad 1 sakavika 2009 hoda park imia Žylibiera rašeńniem miascovych uładaŭ abvieščany zonaj ćviarozaści.
