Śpis samvydatu na Mahiloŭščynie pašyrajecca. Z maja hetaha hoda ŭ vioscy Bryli Mahiloŭskaha rajona staŭ vychodzić biuleteń «Bryloŭski letapis» . Zasnavalnik i vydaviec jaho – dyrektar Bryloŭskaha sielskaha doma kultury Mikałaj Jackoŭ – pazycyjanuje svajo vydańnie jak infarmacyjna-hramadzki biuleteń. «Bryloŭski letapis, - tłumačyć jon, - heta praciah tradycyi naściennych hazetaŭ sučasnymi srodkami». Adnoj z zadač vydańnia Mikałaj Jackoŭ ličyć padtrymlivać u sialan pačućcio histaryčnaj hodnaści. Vioska Bryli i navakolnyja vioski Malejeŭka, Zyli, Kačuryna majuć bahatuju historyju. Hetym pasieliščam bolš za 400 hod. I toje, što Bryli nia trapili ŭ śpis ahraharadkoŭ, nie pavinna nehatyŭna adbivacca na samaŭśviedamleńni mieścičaŭ.
Źmiest vydańnia vynikaje ź jaho nazvy. Tut možna ŭbačyć viaskovyja naviny, vinšavańni žycharoŭ miascovaści ź jubilejami, dniami naradžeńnia, ź niejkimi siamiejnymi śviatami. Rubryka «Hartajučy pažoŭkłyja staronki» pryśviečanaja starym publikacyjam, dzie ŭpaminajucca Bryli. Na litaraturnaj staroncy drukujucca vieršy miascovych talentaŭ. Bryloŭskaja sielskaja biblijateka daje anons cikavych publikacyj u presie, jakija potym možna znajści va ŭstanovie. Ź vieraśnia da pracy nad biuleteniem dałučycca miascovaja škoła. Jašče adzin kanał kamunikacyi z nasielnictvam ubačyŭ u «Bryloŭskim letapisu» ŭčastkovy inspektar.
Sielskaja hazetka vychodzić prykładna raz na tydzień nakładam ŭsiaho 50 asobnikaŭ. Ale za dva miesiacy, jak vydajecca, «Bryloŭski letapis» pataŭščeŭ ad čatyroch staronak da vaśmi. Niahledziačy na małanakładnaść, siarod miascovych žycharoŭ zajmieŭ vialiki aŭtarytet. Asabliva paśla taho, jak usiaho adnoj publikacyjaj prymusiŭ pracavać miascovy žyłkamhas.
