Lekar reanimacyjnaha adździaleńnia paviedamiŭ, što ksiondz Jozas Bulka trapiŭ ŭ špital 10 listapada. U jaho dyjahnastavali ačahovy infarkt mijakardu. Na siońnia jaho stan lekary aceńvajuć jak ciažki, ale zapeŭnivajuć, što ŭsie nieabchodnyja leki jość, i śpiecyjalisty robiać usio što mohuć.
Nijakich prahnozaŭ lekary nie dajuć, najpierš tamu, što chvory davoli stałaha vieku — jamu ŭžo amal 83 hady.
Ksiondz Jozas, jaki słužyć u kaściole Śviatoj Hanny ŭ vioscy Mosar Hłybockaha rajona, nabyŭ viadomaść u Biełarusi najpierš jak zmahar z pabytovym pjanstvam i ałkahalizmam. Ź jaho inicyjatyvy Udziełaŭski sielski saviet sioleta abvieščany «zonaj ćviarozaści» — u tutejšych viaskovych kramach nie handlujuć śpirtovymi napojami.
Šmat turystaŭ pryjaždžaje ŭ viosku Mosar, kab pahladzieć «biełaruski Viersal» — unikalny park vakoł kaścioła, stvorany pad kiraŭnictvam ksiandza Jozasa i ź jaho niepasrednym udziełam. Jašče adzin jahony prajekt uvasobleny ŭ žyćcio ŭ vioscy Paryž Pastaŭskaha rajona — tut ŭźviedziena svaja «Ejfieleva vieža», 30‑mietrovaja mietaličnaja kanstrukcyja, jakaja na Kalady źziaje kalarovymi ahieńčykami.
Sioleta biełaruski ksiondz staŭ i hierojem bujnoha palityčnaha skandału — u srodkach masavaj infarmacyi źjavilisia źviestki pra jahonaje supracoŭnictva z kamunistyčnymi śpiecsłužbami ŭ Litvie, dzie Jozas Bulka žyŭ i pracavaŭ da taho, jak stać śviatarom.
