U arhanizacyjnym płanie «Jeŭrapiejski forum» prajšoŭ vydatna. Tyja, chto adkazvaŭ za jaho praviadzieńnie, pastaralisia. Forum byŭ ź vialikaj kolkaściu ludziej, ź bieł-čyrvona-biełymi i jeŭrasajuzaŭskimi ściahami, z haściami z Strasburha i Vilni, z dobra nadrukavanymi infarmacyjnmi materyjałami, impulsiŭnymi Sieviaryncam i Daškievičam, razvažlivym Milinkievičam.
Prydracca niama da čaho — arhanizacyja paciešyła.
Nie vierycca, što takoje nie samaje tannaje mierapryjemstva pravodziłasia tolki dla «stymulavańnia ŭnutry hramadstva dyskusii» adnosna jeŭrapiejskaj budučyni Biełarusi. Takija forumy treba dla taho, kab zaśviedčyć źjaŭleńnie novaj palityčnaj siły, jakaja pretenduje na liderstva ŭnutry krainy. I nie stolki hety pasył byŭ patrebny dla delehataŭ, kolki — dla zamiežnikaŭ.
Forum byŭ patrebny, kab pakazać zachodnikam, ź jakoj palityčnaj siłaj u Biełarusi treba vieści razmovu ŭ budučyni. Chto maje prava najbolš hodna pradstaŭlać našu krainu.
Pra Biełaruski Niezaležnicki Błok 14 listapada havaryli mała. Ale heta čytałasia miž słovaŭ. «Tut sabralisia adnadumcy», — skazaŭ Źmicier Daškievič.
Milinkievič tak i nie advažyŭsia adkryta zajavić ab pačatku svajoj prezidenckaj kampanii, ale pa-inšamu Forum nie ŭsprymaŭsia.
«Kandydat užo vyznačany. I ŭsie jaho viedajuć», — skazaŭ NN Artur Fińkievič.
Milinkieviču ŭdałosia najlepš za svaich kankurentaŭ na miesca adzinaha kandydata pravieści mabilizacyjnuju kampaniju svaich prychilnikaŭ.
