24 listapada a 19‑j na scenie Nacyjanalnaha akademičnaha teatra imia Janki Kupały adbudziecca prezientacyja ŭžo staŭšaj lehiendaj u histaryčnych kołach «Knihi Vialikaha Kniastva Litoŭskaha».
Heta — manumientalnaje vydańnie nakładam u 1000 asobnikaŭ, jakoje nie budzie pradavacca, bo źjaŭlajecca padarunkam vydaŭcoŭ kulturnickim ustanovam krainy. U joj — vynik vializarnaje pracy intelektuałaŭ Biełarusi, Litvy i Polščy, pryśviečany fienomienu daŭhaviečnaj dziaržaŭnaj i kulturnaj supolnaści.
Ideja stvareńnia Vialikaj Knihi naležyć trom viadomym litvinam: Tomasu Viencłavu, Česłavu Miłašu i Andžeju Strumile. Kniha Vialikaha Kniastva vydadziena na čatyroch movach — anhlijskaj, biełaruskaj, litoŭskaj, polskaj i składziena z ese vybitnych publicystaŭ, historykaŭ i navukoŭcaŭ, kožny ź jakich maje svoj ułasny pohlad na historyju VKŁ u kantekście siońniašniaha času. Ale mienavita hetaje i cikava, bo pakazvaje sučasny stan ahulnaj historyi roznych narodaŭ, sutykaje ich pohlady, tradycyi i relihii pad adzinaj vokładkaj. Dumkaju aŭtaraŭ, šmatetničnaje Vialikaje Kniastva Litoŭskaje, ŭžo tady źjaviłasia pratatypam Jeŭrapiejskaha Sajuza.
Kancepcyja 552‑staronkavaha falijanta, pryśviečanaha 1000‑hodździu pieršaj letapisnaj uzhadki pra Litvu ažyćcioŭlena słavutym polskim mastakom Andžejem Strumiłam pry dapamozie fonda «Pamiežža» ŭ Sejnach (Polšča).
Ź biełaruskaha boku ŭ stvareńni knihi šmat namahańniaŭ prykłaŭ mastak Źmicier Hierasimovič, u supracoŭnictvie ź jakim majstru Strumile ŭdałosia abjadnać taki raznastajny materyjał pad skuranaj vokładkaj sa staražytnymi załatymi simvałami. Vydańnie vyłučaje cudoŭnaja hrafika i adnarodnaja stylistyka, jano bahata ilustravana staradaŭnimi hraviurami, kartami, abrazami, žyvapisnymi pałotnami i ŭnikalnymi fatazdymkami.
Siarod biełaruskich aŭtaraŭ — Uładzimier Arłoŭ, Siarhiej Dubaviec, Aleh Łatyšonak, Hienadź Sahanovič i Sakrat Janovič.
U prezientacyi pad režysuraj Mikałaja Pinihina — mastackaje asensavańnie ŭryŭkaŭ z knihi‑lehiendy aktorami dramatyčnaha teatra, ŭračystaje ŭručeńnie jaje pradstaŭnikam biełaruskich kulturnickich ustanovaŭ.
Zaviaršaje prahramu vystup muzyčnych hurtoŭ, siarod jakich «Hudy», «Stary Olsa» i ansambl siaredniaviečnaha tanca «Fłamieja».
25 listapada a 10-j ŭ Litoŭskaj ambasadzie praciaham mierapryjemstva adbudziecca kanfierencyja historykaŭ z troch krain pry niepasrednym udziele Ehidyjusa Aleksandravičusa, Rustysa Kamuntavičusa, Andžeja Pukšty — ź litoŭskaha boku, prafiesara Andžieja Strumiły, Maryjuša Savickaha — z polskaha, Ŭładzimiera Arłova, Siarhieja Dubaŭca, Valeryja Paźniakova, Adama Maldzisa i inšych — ź biełaruskaha.
Arhanizatarami padziei źjaŭlajucca: Ambasada Litoŭskaj Respubliki ŭ Biełarusi, Fond «Pamiežža», Sejny (Polšča), Polski Instytut u Minsku, Źmicier Hierasimovič (Biełaruś).
