Uvajšoŭšy, Dźmitryj Miadźviedzieŭ amal šeptam paprasiŭ usich sieści. «My mała kantaktujem, — źviarnuŭsia jon da žurnalistaŭ. — Časta infarmacyja pra našy dziejańni traplaje ŭ presu z uskosnych krynic». Dalej, matyvujučy hetu sustreču ź biełarusami, prezident Rasii spasłaŭsia na dośvied Alaksandra Łukašenki, jaki «pakazaŭ prykład» — sustrakajecca z rasijskimi žurnalistami «ščyra, paśpiachova i rehularna».
U časie intervju.
Hutarka išła ŭ vielmi ciesnym kole.
Dalej Miadźviedzieŭ prapanavaŭ žurnalistam zadavać pytańni pa čarzie, pa hadzińnikavaj strełcy.
Cikava, što žurnalistaŭ pasadzili ŭ peŭnym paradku: pradstaŭniki niezaležnych vydańniaŭ praz adnaho čarhavalisia z pradstaŭnikami dziaržaŭnych.
Žurnalist Biełdziaržteleradyjekampanii, pierš čym zadać pytańnie, zrabiŭ nievialiki ustup: padkreśliŭ, što «naša kraina nazyvajecca Biełaruś — mienavita tak, vosiem litar, miakki znak na kancy» i paraiŭ užyvać mienavita hety varyjant, a nie «Biełoruśsija». Z čym Miadźviedzieŭ, biezumoŭna, pahadziŭsia.
Uvohule, u vastryni i prablemnaści pytańniaŭ dziaržaŭnyja ŚMI nie sastupali niezaležnym. Pradstaŭnik Pieršaha nacyjanalnaha kanału spytaŭsia pra budučyja prezidenckija vybary ŭ Biełarusi. Ci maje Rasija svoj scenar? Ci dumaje Miadźviedzieŭ, śledam za niezaležnaj presaj, zaprasić da siabie biełaruskich apazicyjnych palitykaŭ?
Rasija nie ŭmiešvałasia i nie maje namieru ŭmiešvacca va ŭnutranyja spravy Biełarusi, adkazaŭ Dźmitryj Miadźviedzieŭ. I nie maje nijakich adnosin da scenaroŭ raźvićcia palityčnaha žyćcia ŭnutry Biełarusi.
«Umiašańnie va ŭnutranyja spravy — heta žadańnie pastavić palityčnyja pracesy u toj ci inšaj krainie pad kantrol inšaj dziaržavy. U nas takoha i ŭ dumkach nie było. Dy heta i niemahčyma», — padkreśliŭ Miadźviedzieŭ.
Pavodle jaho słoŭ, biełaruski vybarščyk «vyznačaje, chto jamu miły, hałasuje adpaviednym čynam, i ŭ vyniku hetaha ŭźnikaje taja ci inšaja palityčnaja kanfihurcyja, toj ci inšy palityčny lider prychodzić da ŭłady», — skazaŭ jon. «Biełaruś, — a ja nastojvaju mienavita na takim vymaŭleńni hetaj brackaj dziaržavy, — samastojnaja suvierennaja dziaržava z usimi adpaviednymi atrybutami. A kali tak — usio palityčnaje žyćcio ŭ hetaj krainie idzie pa svaim scenaryi, i my da hetaha scenaryja nie majem nijakich adnosin», — zajaviŭ prezident Rasii.
Pry hetym jon padkreśliŭ, što Rasija «samym detalovym čynam» sočyć za raźvićciom palityčnych pracesaŭ u krainie. «Nam heta nieabyjakava, Biełaruś — heta kraina, ź jakoj my źviazany sajuznym dahavoram, majem brackija adnosiny i ciesnyja ekanamičnyja suviazi», — adznačyŭ Miadźviedzieŭ.
U adkaz na pytańnie pra sustreču ź biełaruskaj apazicyjaj, Miadźviedzieŭ nie vyklučyŭ takoj mahčymaści.«Znosiny pamiž palitykami — heta narmalnaja sprava. Kali da nas pryjazdžajuć zamiežnyja lidery, jany sustrakajucca z našaj apazicyjaj — padabajecca nam heta ci nie padabajecca», — skazaŭ rasijski prezident.
Krytykujučy Pucina — krytykujecie mianie
«Za apošni čas z boku biełaruskich kaleh, ad prezidenta Biełarusi było zroblena šmat emacyjnych zajavaŭ, jakija časta vychodzili za miežy dypłamatyčnaha pratakoła, a kali kazać hranična ščyra — nasili nadta śpiecyfičny charaktar u dačynieńni da našych słužbovych asobaŭ», — i Miadźviedzieŭ udakładniŭ. «Ja maju na ŭvazie členaŭ uradu i staršyni ŭradu Rasii».
Jon padkreśliŭ: «Mnie heta nie padabajecca. Ja liču — heta niedapuščalna».
Miadźviedzieŭ padkreśliŭ, što ŭrad pradstaŭlaŭ na zaćviardžeńnie jon, tamu lubyja zajavy ŭ adras členaŭ uradu — heta i zajavy ŭ adras asabista jaho. Hetym prezident Rasii niby abvierh mahčymaść «ubić klin» miž im i Pucinym z dapamohaj krytyki apošniaha, vierahodnaść čaho vykazvałasia ŭ niekatorych publikacyjach.
U toj ža čas jon padkreślivaŭ sajuźnicki, asablivy charaktar adnosinaŭ miž Biełaruśsiu i Rasijaj.
U 2010 hodzie cana hazu dla Biełarusi budzie na 30–40% nižejšaja, čym dla supastaŭnych krain.
Adkazvajučy na pytańnie pra canu na haz dla Biełarusi, Dźmitryj Miadźviedzieŭ adznačyŭ, što jana budzie na 30–40% mienšaja za canu pastavak u «supastaŭnyja [pa daŭžyni transpartnaha plača] dziaržavy».
Cana na nastupny hod budzie raźličvacca aŭtamatyčna, na hruncie dziejnaha kantrakta.Jak viadoma, Biełaruś prasiła «Hazprom» ad kantrakta adstupić.
U čaćviortym kvartale 2009 hoda cana składaje 122 dalary za tysiaču kuboŭ, zaciemiŭ prezident Rasii. Miadźviedzieŭ asabliva padkreśliŭ, što Biełaruś zaŭždy atrymlivała haz pa lhotnych cenach.
Jon spasłaŭsia na padliki ekśpiertaŭ, zhodna ź jakimi ad momantu zdabyćcia Biełaruśsiu niezaležnaści abjom rasijskich prefierencyj dla Biełarusi ŭ vyhladzie lhotnych cenaŭ na syravinnyja resursy skłaŭ $50 młrd.
Adnačasova jon zaŭvažyŭ, što Rasija navat unutry krainy ruchajecca da cenaŭ, nabližanych da suśvietnych.
«Požyviom — uvidim»
Pierśpiektyvy ž budaŭnictva praź Biełaruś hazapravoda: ich razhledziać, tolki kali buduć zapatrabavanyja adpaviednyja abjomy haza. Prajekt budaŭnictva hazapravodu «Paŭnočny patok» pa dnie Bałtyki biezumoŭna daražejšy, ale «harantuje vykanańnie abaviazacielstvaŭ pa pastaŭkach», adznačyŭ Miadźviedzieŭ, namiaknuŭšy na byłyja «hazavyja vojny».Jamał-Jeŭropa-2 Miadźviedzieŭ akreśliŭ jomkim rasijskim«požyviom — uvidim»
Pra myty na aŭtamabili: Niama ničoha viečnaha — niama viečnych pošlinaŭ
Adkazvajučy na pytańnie pra toje, jak jon stavicca da apošnich zajaŭ Łukašenki adnosna niavyhady Mytnaha sajuza dla Biełarusi, Dźmitryj Miadźviedzieŭ zajaviŭ:
«My nie mianiajem płanaŭ pad kanjunkturnyja vystupleńni». Dla taho, kab Mytny sajuz zapracavaŭ, usio hatova. Choć i jość «adčuvalnyja momanty», adznačyŭ jon — myty na aŭto, u tym liku. Tut Miadźviedzieŭ adnaznačna zajaviŭ, što pošliny na aŭto buduć padymacca, u vypadku padpisańnia.
«Heta adčuvalnaja vielmi reč, biezumoŭna, asabliva dla Biełarusi, kali mieć na ŭvazie toje, što ŭ vas pošliny byli niaznačnyja u adnosinach da našaj krainy, — skazaŭ jon. — Užo kali my damaŭlajemsia ab Mytnym sajuzie, a heta ŭ cełym dla nas vyhadna, to my, biezumoŭna, pavinny ŭnifikavać i pošliny, pryčym pajści na ŭzajemnyja dziejańni».
Pry hetym Miadźviedzieŭ adznačyŭ: «Z adnaho boku, panižajucca pošliny na inšamarki ŭ Biełaruś, ź inšaha boku, my hatovyja da pavieličeńnia šerahu płaciažoŭ, pošlin pa bujnych mašynach — pa MAZach, u pryvatnaści pa aŭtamabilach adpaviednaj katehoryi».
Heta baluča, pryznaŭ jon, ale «nam treba hety pieryjad pieražyć». «U kančatkovym vyniku, užo stvaryŭšy Mytny sajuz, my možam u peŭny momant damovicca ab novych adzinych praviłach hulni, — skazaŭ jon. — Tym bolš što i Rasija, i Kazachstan, i Biełaruś — usie ŭstupajuć u SHA, i šerah rašeńniaŭ, jakija my zaraz na siabie prymajem, my tak ci inakš budziem adaptavać dla našaha siabroŭstva ŭ SHA».
Miadźviedzieŭ taksama adznačyŭ, što «niama ničoha viečnaha — niama viečnych mytaŭ, ale zaraz, na ciapierašnim etapie, dla harmanizacyi našych finansavych adnosin, mytnych adnosin na heta nieabchodna pajści».
U Rasii staŭki mytaŭ za ŭvoz lehkavych aŭtamabilaŭ u razy bolšyja, čym u Biełarusi ciapier.
Pytańnie pra ŭvachodžańnie Biełarusi ŭ Rasiju «nie isnuje»
«Rasija ni de‑fakta, ni de‑iure nie prapanoŭvała Biełarusi ŭstupić u skład Rasijskaj Fiederacyi», — zajaviŭ prezident Rasii. — «Takoha pytańnia nie isnuje».
Jak viadoma, u svoj čas prezident Pucin prapanavaŭ Biełarusi ŭstupleńnie ŭ skład Rasii šaściu abłaściami.
Z repliki Uładzimira Pucina ŭ kantekście sprečak vakoł cany na haz
«nie vynikaje, što Rasija prapanoŭvała Biełarusi stać subjektam Rasijskaj Fiederacyi».«Takija spravy vyrašajucca tolki ŭsienarodnym hałasavańniem. Heta navat nie prerahatyva prezidenta», — dakazvaŭ Miadźviedzieŭ.
Damova pra KSAR pieravažvaje nacyjanalnaje zakanadaŭstva
Udzieł biełaruskich vojskaŭ u vajskovych apieracyjach u ramkach KSAR vyznačajecca biełaruskaj Kanstytucyjaj z adnaho boku i nadnacyjanalnymi damovami, jakoj źjaŭlajecca damova pa KSAR. Mižnarodnaje prava «maje nadnacyjanalny status», — adznačyŭ Miadźviedzieŭ. — «Heta tyčycca i ADKB. Rabicie vysnovy», — skazaŭ Miadźviedzieŭ.
Napad na adnu z krain rasceńvajecca jak napad na ŭvieś błok. «Heta i jość partniorstva».
Ab pryznańni Abchazii i Paŭdniovaj Asiecii
Ja nikoli nie prasiŭ Alaksandra Łukašenku, nie źviartaŭsia ni prosta, ni ŭskosna z hetym pytańniem. Usie razmovy pra heta nahadvajuć handal. Heta ŭnutranaja sprava Biełarusi, a razmovy pra toje, što niechta na jaje ciśnie, majuć pravakacyjny charaktar. Meta takich razmoŭ — «vyhandlavać umovy padčas inšych miždziaržaŭnych kantaktaŭ».
Adnak, skazaŭ Miadźviedzieŭ, jon «nieadnarazova čuŭ» ad Łukašenki, što pytańnie z pryznańniem budzie abaviazkova razhledžana.
Miadźviedzieŭ staraŭsia źlehkavažyć «Uschodniaje partniorstva»
Rasija nie bačyć asablivaj karyści ad prahramy ES «Uschodniaje partniorstva», ale ni ŭ jakaj miery nie budzie pieraškadžać jaje realizacyi.
«Ja — pamiarkoŭny [zdravomyślaŝij] čałaviek. Jak ja mahu zaklikać nie ŭdzielničać u tym ci inšym abjadnańni, kali sami dziaržavy ličać dla siabie toje vyhadnym?» — skazaŭ Miadźviedzieŭ.
«Nie baču ničoha zvyšnaturalnaha ŭ hetym " Uschodnim partniorstvie». Ale ja, ščyra kažučy, i karyści asablivaj ad jaho nie baču. I heta mnie paćviardžajuć usie ŭdzielniki hetaha «Partniorstva», z kim ja razmaŭlaŭ. Ale ja nie baču ničoha skiravanaha niepasredna suprać našaj krainy», — padkreśliŭ Miadźviedzieŭ.
«Uschodniaje partniorstva» złučyła šeść krain byłoha SSSR, u tym liku i Biełaruś. Častka z hetych krain rychtujuć siabie da budučaha ŭstupleńnia ŭ ES.
Situacyja ŭ ekanomicy Rasii horšaja, čym u Biełarusi
Čamu ekanomika Biełarusi navat u kryzisny hod nie padaje, a rasijskaja — padaje? — zapytaŭsia redaktar NN.
«Biełaruś pa vynikach hoda moža pakazać nievialiki rost, a ŭ Rasii budzie padzieńnie», — pryznaŭ Dźmitryj Miadźviedzieŭ. Pryčyny hetaha, adznačyŭ jon u zbytkovaj ekspartna-syravinnaj skiravanaści rasijskaj ekanomiki, pravałach Rasii ŭ halinach mietałurhii i mašynabudavańnia sioleta. Pośpiech Biełarusi, skazaŭ rasijski prezident, abumoŭleny tym, što jaje ekanomika «akazałasia bolš abaronienaj», a taksama «svoječasovymi rašeńniami» biełaruskaha kiraŭnictva i, nie ŭ apošniuju čarhu, dapamohaj Rasii. «Kali b nam niechta akazaŭ takuju pomač, suvymierna z maštabami našaj ekanomiki, hłybinia našaha padzieńnia mahčyma nie była b takoj», — adznačyŭ rasijski prezident.
Biełaruś nie źviartałasia pa dapamohu ŭ rasśledavańni vykradańnia Zavadskaha
Biełaruś nie źviartałasia da Rasii pa dapamohu ŭ rasśledavańni šerahu hučnych złačynstvaŭ, u tym liku vykradańnia žurnalista Źmitra Zavadskaha. «Ja nie viedaju, jakija zvaroty byli da taho, ale ŭ maju bytnaść prezidentam takich zvarotaŭ da mianie nie było», — skazaŭ Miadźviedzieŭ.
Jon padkreśliŭ, što ŭsie złačynstvy «pavinny być rasśledavany, pakul u ich nie budzie pastaŭlena kropka, nie znojdzieny vinavatyja, nie ŭstanoŭlena, što adbyłosia» — i heta datyčyć jak Biełarusi, tak i Rasii.
Miadźviedzieŭ: Rasija try miljardy dała, a MVF tolki nabližajecca
Miadźviedzieŭ pryznaŭ, što ŭ dvuchbakovych adnosinach «jość unutranyja sprečki, ale heta ŭsio roŭna inšy ŭzrovień intehracyi».
«Navošta ž nam adhrabać ad uzroŭniu intehracyi?Tak, sajuznaja dziaržava idzie nie takimi tempami, jak chaciełasia b, ale stupień intehracyi sumiesnych dziejańniaŭ značna bližejšaja, čym prosta partniorskija adnosiny», — skazaŭ jon. Metazhodnyja i JeŭrAzES, i Mytny sajuz, pierakonvaŭ jon. U pryvatnaści, ličyć Miadźviedzieŭ, bolš ciesnyja sajuźnickija adnosiny syhrali pazityŭnuju rolu ŭ baraćbie z ekanamičnym kryzisam. Jon nahadaŭ, što «Biełaruś — najbujniejšy pazyčalnik rasijskich srodkaŭ» — za apošnija dva z pałovaj hady Biełaruś atrymała ad Rasii bolš jak try miljardy dalaraŭ. Miadźviedzieŭ adznačyŭ, što ahulnaja padtrymka Biełarusi z boku MVF i jeŭrapiejskich instytutaŭ «tolki nabližajecca da ličby try miljardy dalaraŭ».
* * *
Stenahramu intervju čytajcie tutaka (rasiejskaja mova). Stenahrama pieradadziena pres-słužbaj Dz. Miadźviedzieva.
* * *
Subjektyŭny repartaž Andreja Skurka čytajcie na NN zaŭtra, u aŭtorak, 24 listapada.
* * *
15.45.Sustreča maje pačacca, a 16.00 pa minskim časie ŭ rezidencyi Majendorf u Barvisie pad Maskvoj.
Na
Pryjechali redaktar «Narodnaj voli» Iosif Siaredzič, «Biełarusov i rynka» Viačasłaŭ Chadasoŭski, Maryna Zołatava z tut.by, Anatol Hulajeŭ z haziety «Tovarišč», pradstaŭniki maskoŭskich karpunktaŭ dziaržaŭnych ŚMI i telekanałaŭ.
Z Maskvy ŭ Barvichu žurnalistaŭ vieźli dvuma mikraaŭtobusami, zabraŭšy na Vasiljeŭskim spusku la Kramla.
Jak paviedamiŭ supracoŭnik
Aproč hetaj nahody, jość jašče dźvie nahody: budučy vizit Dźmitryja Miadźviedzieva ŭ Minsk i, viadoma ž, pytańnie Mytnaha sajuza.
Sustreča pačynajecca a 16.00 pa minskim časie.
Žurnalistam nie dazvolili ŭziać z saboj noŭtbuki ŭ zału sustrečy. Infarmacyju pra źmiest hutarki čytajcie na NN paśla 18.15 minskaha času.
