Siabar Partyi BNF Valancin Doŭnar pamior 26 listapada ŭ špitali. Jamu byŭ 51 hod. Milicyja ličyć, što heta nie zabojstva, a zdareńnie: «Pavaliŭsia, udaryŭsia ab asfaltavuju plitku tratuarnuju». Siabry ŭpeŭnienyja: jaho źbili ci prutami, ci dubinkami ŭ samym centry horada.
«U minułuju piatnicu, 20 listapada, prykładna, a 22:00 viečara na Doŭnara napali na vulicy nieviadomyja, — ličyć adnapartyjec pamierłaha Aleś Vaśkovič. —
Bili ci to žaleznymi prutami pa hałavie, ci to kijami, ci to niejkimi dubinkami», miarkuje jon..
Zdareńnie adbyłosia ŭ centry horada, za jakich 200 mietraŭ ad rajadździeła milicyi. Znajšli Doŭnara ŭ ludnym miescy: pobač kaviarnia i restaracyja, viečaram tam niamała ludziej chodzić.
Nieprytomnym Doŭnara dastavili ŭ reanimacyju. Ale nie ŭratavali. Jon tak i nie aprytomnieŭ.
«Jon zanadta intelihientny, kab spravakavać napad. U kanfliktnaj situacyi zaŭsiody znachodziŭ supolnuju movu z roznymi ludźmi. Tamu, dla usich, chto jaho viedaŭ heta zdareńnie — šok. U hałavie nie ŭkładvajecca, što jaho zabili», — kaža siabar Valancina Ściapan Kulčanka.
Valancin Doŭnar byŭ viadomy ŭ Marjinaj Horcy (Minskaja vobłaść, 60 km ad Minska na paŭdniovy ŭschod) raspaŭsiudnik niezaležnaj presy.Akurat u piatnicu, kožnuju piatnicu jon pryvoziŭ ź Minsku śviežyja numary «Narodnaj voli», «Novaha času», raznosiŭ ich padpisčykam, astatnija numary razdavaŭ.
«Čałaviek byŭ biaskryŭdny, jak dzicia. Adzin žyŭ. Usie jaho pavažali. Vaziŭ haziety da nas i ŭ śnieh, i ŭ doždž», — kaža A.Vaśkovič.
Ci jon piŭ? «Doŭnar zusim nie piŭ».
Dziažurny RUUS Puchavickaha rajonu paviedamiŭ, što kryminalnaja sprava pa fakcie hibieli Valancina Doŭnara jašče nie zaviedziena. «Spravy niama. Chto vam skazaŭ, što heta zabojstva? Pravodzicca pravierka», — adkazali ŭ RAUS.
Paźniej u piatnicu kiraŭnik kryminalnaha vyšuku Marjinaj Horki Jaŭhien Kulbicki paviedamiŭ, što milicyja schilajecca da viersii ab niaščasnym vypadku, a nie złačynstvie. Valancina Doŭnara znajšli supracoŭniki milicyi niedaloka ad budynku RAUS, śćviardžaje jon. Jany ž vyklikali «chutkuju dapamohu». Medyki zafiksavali zakrytuju
Pachavańnie Valancina Doŭnara adbudziecca ŭ subotu ŭ Marjinaj Horcy, a 14:00.
Śmierć Doŭnara vyhladaje padazronaj. Pahadziciesia: dziŭna, što za paru mietraŭ ad rajadździeła. Dziŭna, što tak šybanuŭsia ŭ bardziur, kab až skanaŭ.
U subotu čytajcie repartaž z Marjinaj Horki i pachavańnia Doŭnara.