Praktyčna na kanviejer pastaviŭ 27‑hadovy minčuk kradziažy rovaraŭ. Ź viasny i da hłybokaj vosieni złodziej zmudryŭsia skraści bolš za 50 rovaraŭ, jakija stajali kala kramaŭ dy inšych handlovych kropak.
Sposab kradziažu złamyśnik vynajšaŭ aryhinalny. Na «spravu» jon braŭ zaplečnik i kusački. Kala handlovych centraŭ jon prykmiačaŭ darahija rovary, paśla hetaha pa‑haspadarsku padychodziŭ da ich, prysadžvaŭsia pobač, pierasoŭvaŭ zaplečnik sa śpiny na plačo, prasoŭvaŭ u jaho ruku, braŭ kusački i praz zahadzia prarezanuju na dnie zaplečnika adtulinu zrazaŭ zamok, z dapamohaj jakoha rovar byŭ pryšpileny na stajancy. Paśla hetaha praz tuju ž adtulinu jon uciahvaŭ u zaplečnik zamok i adjazdžaŭ na čužym rovary, piša hazieta «Viečiernij Minsk».
Raźlik byŭ vielmi dakładny, bo minaki ŭ jaho rukach kusačak nie bačyli, zamka, adpaviedna, taksama.
Usio vyhladała zakonna: pryjšoŭ haspadar, zaviazaŭ šnurki i pajechaŭ dadomu.
Niaŭłoŭnaha złačyncu nieadnarazova fiksavali videakamiery handlovych centraŭ i kram, ale vyznačyć jaho asobu było ciažka.
Urešcie milicyjanty vyjšli na śled złodzieja i zatrymali z kradzienym. Darečy, minčuk nie tojačysia nazvaŭ usie miescy, adkul kraŭ rovary. Pradavaŭ skradzienaje jon kala rynkaŭ za 150‑200 tysiač rubloŭ, a atrymanyja hrošy vydatkoŭvaŭ na kaviarni i restarany.
