U Minsku na miescy, dzie ŭ časy vajny byŭ kancłahier, pačałosia budaŭnictva novaha šmatpaviarchovaha doma. Žychary susiednich damoŭ № 30 i 32 sprabujuć spynić budoŭlu, ci chacia b parušeńni zakanadaŭstva, jakija adbyvajucca ŭ ich na vačach.
Na pierakryžavańni vulicaŭ Jakuba Kołasa i Kalinina staić miemaryjalny pomnik. Napisana, što na hetym miescy padčas vajny znachodziŭsia kancłahier, u jakim zahinuła bolš za 14 tysiač ludziej. A troški dalej, u dvoryku, užo pracujuć ekskavatary, ryjuć katłavan dla novaha šmatpaviarchovaha doma. Pryčym ryjuć na miescy, jakoje aficyjna źjaŭlajecca histaryčnym. Na pašparcie voinskich pachavańniaŭ za numaram 1146 napisana, što ŭ 1994 hodzie tut byli znojdzieny pareštki 510 čałaviek. Dalej raskopki pakul nichto nie pravodziŭ.
Žycharka susiedniaha domu, Halina Kaleśnikava, uzhadvaje, jak pačynałasia hetaja novabudoŭla:
«U nas byŭ zialony, spakojny dvoryk. I tut raptam pačali ryć jamu, hazapravod kłaści. Potym pačali rušyć drevy. Siońnia pryjazdžała ekołah. Skazała, što drevy našyja byli starymi i hniłymi. Tak, nasamreč, adno dreva hniłoje, a astatnija? Jany prosta pieraškadžajuć hazapravodu, a jana kaža pa staraści. Lipu zrubili, maładzieńkuju. Siońnia sałdaty hruzili chutkimi tempami, vielmi śpiašalisia, pakidali ŭ samazvały abrezki dreva, na vulicy tolki chvasty zastalisia. Uvieś dvor źnieśli, pieraŭtvaryli ŭ razruchu».
Žycharka susiedniaha domu, Ała Karol, raskazvaje:
«Ja liču, što budaŭnictva viadziecca na kaściach ludziej. Heta absalutna niezakonnaje mierapryjemstva, tamu što z nami salidarny miascovyja ŭłady. My źviarnulisia ŭ prakuraturu horada Minska, jakaja skazała, što budzie razhladać u bližejšyja dni hetaje pytańnie. Taksama našy pretenzii byli pradjaŭleny Minharvykankamu i ministerstvu achovy navakolnaha asiarodździa».
Zaniepakojenyja losam svajho dvoryka žychary 30 listapada praviali schod. Na jakim pryniali rašeńnie zmahacca za svoj utulny dvoryk. Sabrali 92 podpisy pad listami suprać novabudoŭli i suprać parušeńniaŭ zakonaŭ, jakich tut chapaje. I pačali źviartacca va ŭsie instancyi, kudy tolki mahčyma.
Pradstaŭnik kamiteta hramadzian, Miecielova Śviatłana:
«Budaŭnictva ŭnutry ŭžo isnujučaj zabudovy — heta zvyčajnaja sprava, ale dziela čaho rušyć isnujučuju infrastrukturu. Dziela čaho našy dvary, jakija i tak znachodziacca ŭ centry horada na pierasiačeńni daroh, pieratvarać u budaŭničuju placoŭku?.. Čamu hety prajekt ažyciaŭlajecca biez uzhadnieńnia z žycharami. Heta ž parušeńnie zakanadaŭstva. My napisali zvarot u Minharvykankam, Ministerstva ekałohii i Prakuraturu horada Minska, kab pravieści pravierku zakonnaści hetaha prajekta i pryviazki jaho da isnujučaj zabudovy i da našych damoŭ».
Asabliva źviartaju ŭvahu, što my suprać taho, kab zajezd budaŭničych mašynaŭ adbyvaŭsia praz naš dvor. Tut žyvie šerah udzielnikaŭ vajny, vieteranaŭ i prosta stałych ludziej. Moža skłaścisia avaryjnaja situacyja. Zamiest taho kab pabudavać niepadalok dziciačy sadok — idzie čarhovaje elitnaje budaŭnictva. U niekatorych ŚMI, jak prykład, časopis «Nieruchomaść» užo idzie navat rekłama, što ŭ elitnaj parkavaj zonie budujecca dom, jaki budzie mieć zručnyja aŭtastajanki. My tak razumiejem, što ŭ aŭtastajanki dla vybranych słajoŭ hramadstva pieratvoracca našyja dvary».
Nie źviartajučy ŭvahu na pretenzii i skarhi žycharoŭ, OAO Mapid horada Minska pačaŭ budaŭnictva. 2 śniežnia ekskavatary prystupili da kapańnia katłavanu. Žychary chodziać navakoł i ŭzdychajuć, škada ŭtulnaha dvoryka. Ale jašče bolš strašna, što mietram laviej ci praviej vyryjuć čałaviečyja kostki byłych vajennapałonnych.
Udakładnieńnie. Vyjava prajektu žyłoha kompleksa “Prestyž” była pamyłkova raźmieščanaja ŭ jakaści ilustracyi da artykułu “Elitny dom na kaściach” na sajcie nn.by ad 3 śniežnia 2009 . Žyły kompleks “Prestyž”, jaki budujecca TAA “HoradStroj” pa adrasie vuł.Biady, 6, nie maje adnosinaŭ da zabudovy na miescy byłoha kancentracyjnaha łahiera.
