Eks‑dyrektaru Departamienta finansavych rasśledavańniaŭ pradjaŭlenaje abvinavačańnie. Anatola Hramoviča vinavaciać u stvareńni ŭ bujnoj złačynnaj arhanizacyi. Epizod adnosicca da jahonaj bytnaści namieśnikam načalnika KDB pa Bresckaj vobłaści.
Dyrektara Departamienta finansavych rasśledavańniaŭ Kamiteta dziaržkantrolu Anatola Hramoviča aryštavali 15 studzienia 2009 hoda. Hienprakuratura vystaviła Hramoviču nadzvyčaj surjoznyja abvinavačańni — jamu zakidvajecca stvareńnie złačynnaj arhanizacyi ci ŭdzieł u joj, ździejśnienyja słužbovaj asobaj z vykarystańniem svaich słužbovych paŭnamoctvaŭ (č.3 art.285 KK). Pavodle hetaha artykuła, eks‑dyrektaru DFR pahražaje ad 10 da 15 hadoŭ źniavoleńnia z kanfiskacyjaj majomaści.
Materyjały hučnaj spravy datyčać padziejaŭ 2001 hoda. Na toj momant Hramovič zajmaŭ pasadu namieśnika načalnika Upraŭleńnia KDB pa Bresckaj vobłaści.
Furami praz mytniu
Pa viersii śledstva, za pieryjad z maja pa žnivień 2001‑ha praz mytniu ŭ Breście ŭ nakirunku Rasii prajšło kala 750 furaŭ z darahoj meblaj, kampjutarami, vopratkaj i abutkam. Uvieś hety hruz nibyta byŭ aformleny ŭ jakaści drobnych partyj mebli, što zavozilisia fizičnymi asobami.
A na praciahu kastryčnika taho ž hoda praz mytniu «Zachodni Buh» pad vyhladam tratuarnaj plitki na 319 furach byli zaviezienyja kampjutary i vopratka.
U vyniku ŭ abodvuch vypadkach biudžet nie atrymaŭ mytnych adličeńniaŭ bolš za 10 i 20 młrd rubloŭ adpaviedna. Pavodle śledstva, u spravie byli zamiešanyja supracoŭniki mytni (u materyjałach śledstva fihurujuć mytnyja pasty «Kazłovičy» i «Zachodni Buh», unutrany punkt mytnaha nahladu «Brestźnieštrans»), MUS i KDB, a taksama kamiersanty.
Čekisty prykryvali mytnikaŭ
Sprava Hramoviča — adna z šerahu bujnych antykarupcyjnych spraŭ Hienprakuratury, datyčnych vyjaŭleńnia złačynnych arhanizacyj i hrupovak na zachodniaj miažy krainy. Na pieršych paśla aryštu pres‑kanfierencyjach čynoŭniki Hienprakuratury roznaha ranhu zajaŭlali, što padazreńni nakont Hramoviča datyčać čekisckaha pieryjadu jahonaj karjery.
U 2002 hodzie jaho pryznačyli na pasadu dyrektara rearhanizavanaha u Departamient Dziaržkamiteta finansavych rasśledavańniaŭ. U toj čas kiravaŭ Kamitetam dziaržkantrolu Anatol Tozik.
Na pasadzie hałoŭnaha finansavaha milicyjanta Anatol Hramovič prasłužyŭ da 2006 hoda, jaho adpravili ŭ adstaŭku, a zatym i na piensiju ŭ 2006 hodzie, nieŭzabavie paśla sychodu z pasady Tozika. Uśled za Hramovičam pasadaŭ pazbavilisia amal usie jahonyja padnačalenyja. Adrazu paśla adstaŭki pačalisia razmovy pra mahčymy chutki aryšt eks‑dyrektara, adnak u realnyja dziejańni hetyja razmovy ŭvasobilisia tolki ŭ studzieni hetaha hoda.
Sapraŭdny čekist
Daviedacca niejkija padrabiaznaści bresckaj karjery Anatola Hramoviča nie tak prosta. Namieśnik hałoŭnaha redaktara haziety «Viečiernij Briest» Barys Paŭłoŭski nie zdoleŭ pryhadać, ci pisała jahonaje vydańnie pra Hramoviča ciaham apošnich vaśmi hadoŭ. «Sapraŭdny čekist nie pakidaje pa sabie śladoŭ», — adžartavaŭsia Źmicier Šymanski, kiraŭnik bresckaj filii Partyi BNF.
Z raniejšych intervju, jakija davaŭ Hramovič užo ŭ jakaści kiraŭnika DFR, možna daviedacca, što abodva jahonyja dziady byli raskułačanyja. Były hałoŭny finansavy milicyjant zachaplaŭsia biljardam.
