Zatrymany ŭ Tajłandzie biełaruski hramadzianin nie źjaŭlajecca kamandziram ekipažu samalota IŁ‑76, što pieravoziŭ zbroju, zajaŭlajuć u MZS Biełarusi.
«Infarmacyja ŭ šerahu ŚMI pra toje, što zhadany hramadzianin Biełarusi nibyta źjaŭlajecca kamandziram ekipažu hetaha samalota, nie znachodzić svajho paćvierdžańnia», — havorycca ŭ raspaŭsiudžanym 14 śniežnia kamientary dla presy namieśnika načalnika ŭpraŭleńnia infarmacyi MZS Biełarusi Maryi Vańšynaj.
Pavodle jaje słovaŭ, «biełaruskaja dypłamatyčnaja misija ŭ Chanoi pradprymaje ŭsie nieabchodnyja dziejańni pa abaronie intaresaŭ biełaruskaha hramadzianina». «U suviazi z adsutnaściu zamiežnaha pradstaŭnictva Biełarusi ŭ Banhkoku heta rabota pravodzicca ŭ pastajannym kantakcie z rasijskimi dypłamatami ŭ Tajłandzie. Takoje ŭzajemadziejańnie ažyćciaŭlajecca ŭ adpaviednaści ź isnujučymi damoŭlenaściami pamiž ministerstvami zamiežnych spraŭ Respubliki Biełaruś i Rasijskaj Fiederacyi. Supracoŭniki biełaruskaha pasolstva ŭ Vjetnamie taksama ŭzajemadziejničajuć z kalehami z dypłamatyčnaj misii Kazachstana ŭ Banhkoku», — skazana ŭ paviedamleńni.
Adznačajecca taksama, što, pa infarmacyi pradstaŭnika pasolstva Kazachstana ŭ Tajłandzie, 14 śniežnia a 10.00 pa tajskim časie adbyłosia słuchańnie pa spravie ekipažu samalota IŁ‑76, jaki ažyćciaŭlaŭ rejs z Paŭnočnaj Karei ŭ Šry‑Łanku i zatrymanaha ŭ aeraporcie Banhkoka Donh Myanh.
Kryminalnym sudom Banhkoka pryniata rašeńnie pradoŭžyć termin utrymańnia pad vartaj ekipažu samalota na 12 sutak. Ciapier advakat, jaki pradstaŭlaje intaresy zatrymanych, rychtuje apielacyju.
Pasolstva Biełarusi ŭ Chanoi praciahvaje adsočvać situacyju i pradprymaje ŭsie nieabchodnyja namahańni pa abaronie intaresaŭ zatrymanaha biełarusa. Zaraz prapracoŭvajecca mahčymaść vyzvaleńnia ŭsich členaŭ ekipažu pavietranaha sudna pad zakład, paviedamiła Vańšyna.
* * *
Nahadajem, samalot Ił-76 (bartavy numar 4L-AWA), zarehistravany ŭ Hruzii, amal z 40 tonami zbroi, u tym liku ručnymi hranatamiotami i pieranosnymi zienitna-rakietnymi kompleksami, byŭ zatrymany 12 śniežnia ŭ Banhkoku, dzie pryziamliŭsia dla dazapraŭki.
Miascovaja palicyja paviedamiła, što kamandzir karabla Michaił Pietuchoŭ źjaŭlajecca hramadzianinam Biełarusi, astatnija členy ekipažu – hramadzianami Kazachstana.
Samamu małodšamu členu ekipažu – 53 hady, samamu starejšamu – 58.
Zaraz zatrymanyja ŭtrymlivajucca ŭ banhkokskoj centralnaj turmie Kłonh Prem. Členam ekipažu pradjaŭlenyja abvinavačvańni ŭ niezakonnym zachoŭvańni zbroi, paviedamleńni iłžyvaj infarmacyi ab charaktary hruzu i sprobie nielehalna pravieźci zbroju praz terytoryju Tajłanda. Raniej paviedamlałasia, što niezakonny hruz zbroi pryznačaŭsia dla Šry-Łanki i Blizkaha Uschodu.
Biełarus Michaił Pietuchoŭ, pa paviedamleńni taiłandskoj presy, pakazaŭ padčas šaścihadzinnaha dopytu va ŭpraŭleńni pa baraćbie sa złačynnaściu palicyi Tajłanda, što samalot vylecieŭ z Ukrainy i zahruziŭ zbroju na bort u Paŭnočnaj Karei.
Jon raspavioŭ, što samalot na šlachu ŭ Pchieńjan dazapravlazsia ŭ Azierbajdžanie, zatym – u Abjadnanych Arabskich Emiratach i Tajłandzie. Na zvarotnym šlachu mierkavalisia dazapraŭki ŭ Tajłandzie i na Šry-Łancy, paśla čaho hruz pavinien byŭ być dastaŭleny va Ukrainu. Pavodle źviestak dziaržaŭnaha infarmahienctva Tajłanda TNA, Pietuchoŭ admoviŭsia davać bolš padrabiaznyja pakazańni palicyi, zajaviŭšy, što budzie razmaŭlać tolki na sudzie. Jon nastojvaje, što ničoha nie viedaŭ ab vajennym charaktary hruzu.
