Vybary va Ukrainie — redkaja palityčnaja padzieja, jakaja zacikaviła biełaruskich bukmiekieraŭ.
U pastanovie Savieta ministraŭ, jakaja rehłamientuje praviły bukmiekierskich hulniaŭ, adznačana, što prahnozy «mohuć tyčycca spartovych, kulturnych i inšych sacyjalna značnych padziej». Tym nie mienš, bolšaść z 175 zarehistravanych u krainie bukmiekierskich kantor pracuje tolki sa sportam. A ŭ Brytanii, naprykład, hrošy možna vyjhrać navat uhadaŭšy, što zaŭtra pojdzie śnieh. Zrešty, na zachodnich internet‑tatalizatarach mohuć hulać i biełarusy. Tut i vybar padziej šyrejšy, i kolkaść hulcoŭ bolšaja.
Aproč spartovych padziej, biełaruskija bukmiekiery prymajuć staŭki na «Jeŭrabačańnie», «Słavianski bazar», inšyja muzyčnyja konkursy. Palityčny tatalizatar, raspaŭsiudžany ŭ Jeŭropie i ZŠA, u nas pakul asablivaj papularnaści nie zdabyŭ. Miž tym, u časie vybaraŭ novaha Papy staŭki na pieramožcu prymalisia prosta na płoščy Śviatoha Piatra ŭ Rymie…
Adzin z najbujniejšych jeŭrapiejskich partałaŭ bwin.com niekalki dzion tamu źmiaściŭ linii stavak na prezidenckija vybary va Ukrainie, jakija adbuducca praź miesiac.
Najbolšyja šancy, pavodle stavak, u Viktara Janukoviča. Jaho kaeficyjent — 1:1,67 (pry staŭcy ŭ $100 vyjhryš składzie $167). U Julii Cimašenka kaeficyjent składaje 2,07. Kali ž znoŭ pieramoža Viktar Juščanka, jaho prychilniki atrymajuć u 27 razoŭ bolš, čym pastavili. Što śviedčyć pra słabuju vieru hulcoŭ u jahonuju pieramohu.
Na Julu — 1:2
Ci prymajucca ŭ Biełarusi staŭki na ŭkrainskija vybary? U bolšaści kantor karespandentu «NN» adkazvali, što palitykaj nie cikaviacca. Jašče dźvie kampanii, mahčyma, stvorać liniju pierad samymi vybarami. A voś kampanija bet.by ŭžo stvaryła. Na pieramohu Julii Cimašenki jany dajuć 1:2. Pavodle słovaŭ pradstaŭnika kampanii, stavak na palityku prymajecca vielmi mała — azart hulni ŭłaścivy pieradusim spartovym zaŭziataram.
Asablivaść biełaruskaha bukmiekierskaha rynku ŭ tym, što asnoŭnyja kampanii na im — filijały rasijskich i ŭkrainskich hihantaŭ. Surjoznuju kankurencyju im składaje chiba viciebski «Plus‑minus». A ŭ Rasii na palityčnym tatalizatary padčas vybarčych kampanij hulać zabaroniena. Redka kali staŭkavyja linii raspracoŭvajucca śpiecyjalna dla Biełarusi.
Bližejšaja, paśla ŭkrainskich vybaraŭ, z najbujniejšych niespartovych padziej — cyrymonija ŭručeńnia «Oskaraŭ». Jana adbudziecca ŭ sakaviku, ale staŭki na pieramožcaŭ u Jeŭropie prymajucca ŭžo zaraz.
