23 śniežnia ŭ Pałacy mastactva ŭ Minsku adkryłasia treciaja respublikanskaja mastackaja vystava «Kaladny fest».
Na joj pradstaŭleny žyvapis, hrafika, skulptura i vycinanki mastakoŭ roznych pakaleńniaŭ, a taksama mižnarodny prajekt «Połacki abiareh» — pałatno z 455 tvoraŭ pamieram 45ch45 sm, vykananych u roznych technikach (łapikavaje šyćcio, vyšyŭka, habielen, makrame, viazańnie kručkom i batyk). Tvor vyšynioj bolš za try mietry i ahulnaj daŭžynioj zvyš 25 mietraŭ składajecca z 13 frahmientaŭ. U pracy nad im udzielničali pradstaŭniki biełaruskaj dyjaspary z 12 krain. Tvor ź`iaŭlajecca padarunkam Połacku ŭ suviazi ź jaho 1145‑hodździem.
Na vystavie demanstrujecca i sacyjalna‑mastacki prajekt fotamastaka Viktoryi Janučkoŭskaj «Śviet kazačnych vobrazaŭ» — 15 zdymkaŭ dziaciej,
jakija znachodziacca pad apiekaj hramadskaj dabračynnaj arhanizacyi «Biełaruski dziciačy chośpis», što pracuje ŭ vioscy Baraŭlany Minskaha rajona.
Jak adznačyŭ pieršy namieśnik staršyni Biełaruskaha sajuza mastakoŭ (BSM) Ryhor Sitnica, vystava stała tradycyjnaj i ź`iaŭlajecca svojeasablivym vinšavańniem haściej i žycharoŭ stalicy sa śviatam Božaha Naradžeńnia i Novym hodam ad BSM i Pałaca mastactva. Pavodle jaho słoŭ, zdymki chvorych dzietak u vobrazach kazačnych piersanažaŭ niezdarma pradstaŭleny na vystavie, bo jana ź`iaŭlajecca sumiesnym prajektam Biełaruskaha sajuza mastakoŭ i chośpisa. «Kali nam dobra, i my śviatkujem, vialiki hrech zabyvacca pra tych ludziej, jakija patrabujuć našaj dapamohi», — skazaŭ Sitnica.
Pavodle słoŭ namieśnika staršyni BSM pa vystavačnaj dziejnaści Sieržuka Cimochava, niekatoryja tvory, pradstaŭlenyja na vystavie, možna nabyć, a častka vyručanych hrošaj pojdzie na padtrymku chośpisa. Jon paviedamiŭ, što ŭ prahramu vystavy ŭklučany vystupleńni artystaŭ (26.12, 16.00—17.00), demanstracyja filmaŭ ab dziejnaści chośpisa i miuzikł z udziełam chvorych dziaciej i vałancioraŭ.
