Juryj Kazak.
Zała suda ŭ časie pierapynku.
Advakat Pavał Sapiełka.
Dziaržaŭny abvinavaŭca.
Maładoha čałavieka vinavaciać u tym, što jon u noč na 7 listapada (03.25) abliŭ zialonaj farbaj biust Leninu.
Biust byŭ ustalavany ŭ Navahrudku ŭ 1998 h. zamiest raniejšaha pomnika tamu samamu Leninu. Pomnik razvaliŭsia padčas rekanstrukcyi płoščy.
Sudovaje pasiedžańnie pačałosia z dopytu śviedak. Heta pieravažna milicyjaniery. Zatrymlivali Juryja Kazaka pravaachoŭniki ŭ cyvilnym. Jany ŭ tuju noč pilnavali na płoščy złodziejaŭ, što kraduć mahnitoły z mašyn.
Sam Jury Kazak zajaviŭ, što nie źbiraŭsia źniščać biust, bo ŭ takim by vypadku «uziaŭ by niešta bolš ciažkoje».
Svoj učynak aktyvist BCHD kvalifikavaŭ jak pratest z relihijnych pierakanańniaŭ suprać idapakłonstva i ŭźviadzieńnia pomnikaŭ čałavieku, jaki zapačatkavaŭ palityčnyja represii ŭ krainie.
Na sudzie (advakat — Pavieł Sapiełka, sudździa — Valer Cynkievič) prysutničaje bolš za 30 čałaviek, bolšaść pryjechała ź Minska.
Siarod prysutnych try sustaršyni BCHD — Pavieł Sieviaryniec, Alaksiej Šein, Vital Rymašeŭski, lider «Maładoha frontu» Źmicier Daškievič, hramadski aktyvist Viačasłaŭ Siŭčyk.
Abarona zaprasiła na sud historyka, vykładčyka EHU Juryja Bačyšču. Jon havoryć pra antyčałaviečuju sutnaść palityka Lenina. Vykryćcio złačynstvaŭ balšavizmu nadaje sudu hramadskuju značnaść. Heta nie prosta razhlad šarahovaha chulihanskaha vypadku. U Navahrudku ŭzdymajecca prablema staŭleńnia da savieckaj spadčyny ŭ Biełarusi.
Prysutničała na sudzie i ciažarnaja žonka Juryja Kazaka.
Paśla pierapynku byli vyvučanyja materyjały spravy, ale pakolki nie było mahčymaści pradstavić rečavyja dokazy, sudździa pastanaviŭ praciahnuć praces u sieradu.
Adnovicca sud a 14-j hadzinie 30 śniežnia, pryčym pačniecca jon sa sprečak bakoŭ.
Žurnalisty miarkujuć, što prysud budzie abvieščany ŭ čaćvier, 31 śniežnia.
