Ministerstva infarmacyi 24 śniežnia vyniesła papiaredžańnie niedziaržaŭnaj hramadska‑palityčnaj haziecie «Narodnaja vola» za raspaŭsiud nibyta nie adpaviednaj rečaisnaści infarmacyi (art. 4 zakona «Ab ŚMI»).
Nahodaj dla sankcyi stała natatka ŭ numary 193—194 «Narodnaj voli» ad 11—14 śniežnia, u jakoj redakcyja prapanoŭvała čytačam pieralik handlovych kropak «Biełsajuzdruku» ŭ Minsku, dzie možna na bolš vyhadnych umovach aformić padpisku na hazietu. Takaja padpiska atrymlivajecca tańniej, čym, naprykład, praz paštovyja adździaleńni.
«NV» nazvała hetyja ŭmovy «ilhotnym taryfam».
Mininfarmacyi paličyła ŭžyvańnie hetaha słovazłučeńnia parušeńniem. «Pavodle infarmacyi, pradastaŭlenaj RUP «Biełsajuzdruk«(…), dadzienyja źviestki nie adpaviadajuć rečaisnaści, pakolki zhadanaja arhanizacyja akazvaje pasłuhi pa pryjomie padpiski na drukavanyja srodki masavaj infarmacyi na padstavie zaćvierdžanaha Ministerstvam infarmacyi taryfu. Pry hetym jakoha‑niebudź ilhatavańnia pa haziecie «Narodnaja vola» nie praduhledžana», — paviedamlajecca ŭ dakumiencie za podpisam novapryznačanaha ministra infarmacyi Aleha Pralaskoŭskaha.
Heta ŭžo druhoje ciaham hoda papiaredžańnie na adras vydańnia. Nahadajem, što redakcyju «NV» piśmova papiaredzili 17 listapada za artykuł «…Nie miešaj druhim otstaivať svobodu» (№ № 169—170 ad 30 kastryčnika — 2 listapada).
Ministerstva paličyła, što ŭ artykule «ŭtrymlivaŭsia zaklik pieraškadžać zakonnaj dziejnaści CVK, a taksama zaklik da inšaj dziejnaści, jakaja adnosicca da ekstremisckaj». 27 listapada redakcyja nakiravała list ŭ Mininfarmacyi, u jakim vykazała svaju niazhodu z papiaredžańniem, ale ministr pakinuŭ jaho ŭ sile.
Miž tym, pavodle art. 51 p. 2.2. zakona «Ab ŚMI»,
vyniasieńnie redakcyi albo zasnavalniku ŚMI na praciahu hoda dvuch i bolš papiaredžańniaŭ moža paciahnuć za saboj prypynieńnie vypusku hetaha ŚMI.
«Papiaredzić hazietu, puścić jaje ŭ sistemy raspaŭsiudu, zakryć i h.d. — heta nie pytańnie vykanańnia albo parušeńnia niejkim ŚMI zakanadaŭstva, a vyklučna pytańnie palityčnaj voli, — ličyć namieśnik staršyni BAŽ, juryst Andrej Bastuniec. — Ministerstva infarmacyi lohka moža znajści nahodu dla vyniasieńnia papiaredžańniaŭ na samych niaznačnych padstavach.
Abskardžvańnie papiaredžańnia vielmi doraha kaštuje — 20 bazavych vieličyń. Z ulikam taho, što redakcyi niedziaržaŭnych ŚMI nie nadta vierać u mahčymaść vyrašyć prablemu ŭ sudovym paradku, niašmat chto ź ich hatovy pajści na takija vydatki. Ale heta prablema nie redakcyi, a biełaruskaha pravasudździa i biełaruskaha zakanadaŭstva, jakoje stvaraje pravavyja mahčymaści dla zakryćcia haziety. Pra što BAŽ kazaŭ jašče na stadyi razhladu zakonaprajekta «Ab ŚMI» ŭ Pałacie pradstaŭnikoŭ».
