Parušalnika advieźli ŭ vyćviareźnik. Usiaho pa krainie ŭ padobnych ustanovach u navahodniuju noč trapili 23 čałavieki, ź ich 7 — u Minsku.
Postśviatočnaja pres-kanfierencyja čynoŭnikaŭ MUS, MNS i Minachovy.
380 tysiač biełarusaŭ pryniali ŭdzieł u masavych hulańniach u navahodniuju noč. U Minsku da miesca praviadzieńnia śviatočnaha fiejervierku kala steły pryjšli 23 tysiačy čałaviek, paviedamiŭ žurnalistam pieršy namieśnik načalnika hałoŭnaha ŭpraŭleńnia achovy pravaparadku i prafiłaktyki MUS Alaksandr Barsukoŭ. Pa jaho słovach, u cełym možna adznačyć istotnaje skaračeńnie złačynnaści ŭ śviatočnyja dni. Za paradkam na śviaty sačyli kala 10 tysiač supracoŭnikaŭ milicyi, u Minsku — 1 tysiača.
Śviatočnuju noč u vyćviareźniku praviali 23 čałavieka, ź ich 7 — u Minsku. Siarod klijentaŭ hetaj ustanovy apynuŭsia niećviarozy mužčyna ŭ kaściumie Dzieda Maroza, jakoha zatrymali na adnoj z vulic stalicy pry sprobie arhanizavać darožny ruch.
Alaksandr Barsukoŭ asobna adznačyŭ efiektyŭnaść pracy ŭ śfiery zvarotu piratechničnych prystasavańniaŭ. Kali letaś było kanfiskavana kala 500 tysiač adzinak piratechniki , to sioleta ŭžo bolš za 2, 6 młn. Heta, pa słovach pieršaha namieśnika, značna palepšyła statystyku traŭmatyzmu ŭ vyniku nieaściarožnaha abychodžańnia ź piratechnikaj — sioleta paciarpiełych było 15 čałaviek, letaś — 56. Tym nie mienš pietardy i fiejervierki praciahvajuć nanosić škodu: u Minsku ŭ vyniku traplańnia praz akonnaje škło ŭ pakoj fiejervierku zdaryŭsia pažar, paviedamiŭ načalnik upraŭleńnia avaryjna-vyratavalnych słužbaŭ i likvidacyi nadzvyčajnych situacyj MNS Vitalij Piakuryn. Jon ža paćvierdziŭ adzin vypadak hibieli čałavieka na lodzie ŭ hetym hodzie. Zdaryłasia heta ŭ Bresckaj vobłaści.
Ad pieraachałodžvańnia za pieryjad ad 24 śniežnia pa 3 studzienia zahinuli 10 čałaviek, paciarpieli 145, byli špitalizavanyja 68, adznačyŭ načalnik adździeła arhanizacyi miedycynskaj achovy pry nadzvyčajnych situacyjach Minachovy zdaroŭja Aleh Pančuk. Pavodle jaho infarmacyi. U Minsku za śviaty byli zafiksavanyja 26 ałkaholnych atručvańniaŭ, pa krainie — 107. Było padkreślena, što na miescy masavych hulańniaŭ u stalicy nie było zafiksavana nivodnaha zvarotu pa dapamohu da miedykaŭ.
U navahodniuju noč było zatrymana 158 niećviarozych kiroŭcaŭ. Adzin čałaviek zahinuŭ u DTZ u Kobrynskim rajonie, paviedamiŭ načalnik upraŭleńnia darožna-patrulnaj słužby UDAI MUS Alaksandr Cahielnik. Usiaho, pavodle papiaredniaj infarmacyi, u 2009 hodzie było zafiksavana 6634 DTZ, u jakich zahinuli 1291 čałaviek i było paraniena 7069. U avaryjach zahinuła 49 dziaciej, paraniena było 604. Pa vinie niećviarozych kiroŭcaŭ adbyłasia 931 DTZ z paciarpiełymi. U paraŭnańni z 2008 hodam darožnaja statystyka palepšała: kolkaść DTZ skaraciłasia na 604 vypadki, u avaryjach zahinuła na 273 čałavieki mienš, u tym liku dziaciej na 16 čałaviek. Skaraciłasia i kolkaść DTZ z udziełam niećviarozych vadzicielaŭ — na 81 zdareńnie.
