U vioscy Mosar Hłybockaha rajona ŭ paniadziełak praviali ŭ apošni šlach viadomaha katalickaha ksiandza Juozasa Bulku, byłoha probašča miascovaha kaścioła śviatoj Hanny.
La chaty ŭ Mosary, žnivień 2009 hoda.
Mosar na vačach staŭ turystyčnaj stalicaj Hłyboččyny.
Apošni kadr.
Śviatara pachavali kala ścien hetaj śviatyni, dzie jon słužyŭ kala 20 hadoŭ svajho žyćcia. Jak viadoma, pachavańnie śviataroŭ nie na mohiłkach, a kala kaścioła ŭkazvaje na ich asablivyja zasłuhi. Raźvitacca s ksiandzom pryjšli tysiačy viernikaŭ. Na pachavańnie pryjechali katalickija biskupy ź Biełarusi, Litvy, Polščy.
Juozas Bulka naradziŭsia ŭ 1925 h. u litoŭskaj vioscy Rypajčaj. U kancy 1980‑ch h. atrymaŭ śviatarskaje paśviačeńnie i napraciahu mnohich hadoŭ pracavaŭ u mosarskaj parafii Śviatoj Hanny.
Juozas Bulka mnohaje zrabiŭ dla dobraŭparadkavańnia Mosara. Pa jaho inicyjatyvie ŭ vioscy stvorany Kryžovy šlach, stadyjon, strausinaja fierma, dendrapark z krynicami, fantanami i skulpturami, pierad kaściołam sv. Hanny uźviedzieny pomnik Janu Paŭłu II.
U 2005 hodzie Juozas Bulka staŭ pieršym biełaruskim ksiandzom, udastojenym łukašenkaŭskaj premii «Za duchoŭnaje adradžeńnie»,
a ŭ 2006 hodzie ŭkazam prezidenta byŭ uznaharodžany miedalom Francyska Skaryny za padźvižnickuju dziejnaść pa ŭmacavańni duchoŭnych kaštoŭnaściaŭ i prapahandzie zdarovaha ładu žyćcia.
U toj ža čas apošnija hady jahonaha žyćcia byli azmročany pryvidami ź minułaha.
U kastryčniku 2008 hoda prakuratura Litvy vydała order na aryšt Juozasa Bulki i abviaściła jaho ŭ vyšuk pa abvinavačvańni ŭ hienacydzie.
Pa viersii litoŭskich prakuroraŭ, u pačatku 1950-ch hadoŭ Bulka supracoŭničaŭ z kamunistyčnymi ŭładami, dapamahajučy im vysočvać i zabivać partyzan, jakija vajavali suprać savieckaj ułady.
Ksiondz Bulka reahavaŭ na źvinavačvańni ŭchilista i admoviŭsia źjaŭlacca ŭ Litvu na sud. «Mnie nie mohuć prabačyć, što ja – litoviec – žyvu ŭ Biełarusi, słužu tut Bohu i stvaryŭ u hetaj krainie takuju pryhažość, a taksama z małych hadoŭ viedu aktyŭnuju baraćbu z ałkahalizmam», – skazaŭ Bulka.
«Kali ja vinavaty, to kajusia», – padkreśliŭ śviatar.
