Učynak aktyvista Kansiervatyŭna‑chryścijanskaj partyi BNF Siarhieja Kavalenki — vyviešvańnie nad hałoŭnaj navahodniaj jalinaj Viciebska bieł‑čyrvona‑biełaha ściaha — zdoleŭ pryciahnuć vialikuju ŭvahu žycharoŭ krainy i zamiežža. A jašče jon zrabiŭ niemahčymaje: abjadnaŭ miascovuju apazicyju.
Na fota: Chrystafor Žalapaŭ, Alena Famina, Taćciana Sieviaryniec, Pavieł Sieviaryniec, Siarhiej Parsiukievič.
U paniadziełak u Viciebsku adbyŭsia schod pa stvareńni hramadskaha kamiteta ŭ abaronu aryštavanaha. Nahadajem, što jon źmieščany na dva miesiacy ŭ SIZA. U adnosinach da jaho zaviedziena kryminalnaja sprava pa č.2 art. 339 UK Biełarusi (chulihanstva).
U arhkamitet uvajšli pradstaŭniki roznych demakratyčnych partyj, ruchaŭ, hramadskich arhanizacyj, u pryvatnaści, sustaršynia arhkamiteta pa stvareńni partyi «Biełaruskaja chryścijanskaja demakratyja» Pavieł Sieviaryniec, maci palityka Taćciana Sieviaryniec, staršynia Viciebskaj abłasnoj arhanizacyi partyi BNF Kastuś Smolikaŭ, lehiendarny raspaŭsiudnik niezaležnych vydańniaŭ Barys Chamajda i inš.
Na dumku siabroŭ arhkamiteta, Siarhiej Kavalenka źjaŭlajecca palitviaźniem, tamu ŭsie akcyi ŭ jahonuju abaronu buduć prachodzić pad łozunham «Svabodu palitviaźniu Kavalenku!».
Arhkamitet pravioŭ zbor hrašovych srodkaŭ u padtrymku aryštavanaha i jaho siamji, a taksama abmierkavaŭ mahčymyja dziejańni. Siarod zapłanavanych akcyj — vinšavańnie S. Kavalenki z dniom naradžeńnia, 16 studzienia jamu spoŭnicca 35 hadoŭ. Miarkujecca, što buduć vydadzieny ŭlotki ź infarmacyjaj pra ŭčynak S. Kavalenki, jakija buduć raspaŭsiudžvacca siarod žycharoŭ horada.
Mahčyma, buduć zrobleny majki, znački ci paštoŭki z vyjavaj navahodniaj jołkaj i ściaham nad joj i nadpisam «Viciebsk. 7 studzienia 2010 hoda». Arhkamitet taksama šukaje advakata dla aryštavanaha i źbirajecca pradastavić infarmacyju pa «spravie ab jalinie» ambasadam krain Jeŭrasajuza i roznym pravaabarončym arhanizacyjam.
