Maskoŭskaja milicyja rasśleduje biesprecedentnuju spravu – kampanija, jakaja zajmałasia absłuhoŭvańniem vuličnych videakamier, zamiest realnaj karcinki pakazvała milicyjanieram falšyvuju.
Adna z kampanij, jakija ŭstanaŭlivajuć i absłuhoŭvajuć kamiery źniešniaha nazirańnia, trapiła pad padazreńnie. Hałoŭnaje śledčaje ŭpraŭleńnie Maskvy ŭzbudziła kryminalnuju spravu pa artykule 159 ( «machlarstva») i artykule 273 ( «raspaŭsiud škodnych prahram dla EVM») KK u dačynieńni da šerahu supracoŭnikaŭ kampanii «Strojmontažsiervis». 23 śniežnia pa hetaj spravie byŭ aryštavany Dźmitryj Kudraŭcaŭ, jakoha śledčyja orhany ličać kiraŭnikom «Strojmontažsiervisa». U jakaści padazravanych prachodziać jašče try supracoŭniki hetaj kampanii, ale jany adpuščanyja pad padpisku ab niavyjeździe.
Maskoŭskija śledčyja źviarnuli ŭvahu, što malunak ź videakamier redka dapamahaje złavić złačyncaŭ. Stali raźbiracca. Vyśvietliłasia, što z častki kamier «Strojmontažsiervisa» pieradavałasia nie realnaja vyjava, a falšyvaja – zahadzia zapisanaja z hetaj kamiery, albo naohuł takaja, jakaja nie maje ničoha supolnaha ź miescam jaje ŭstanoŭki.
Matyvy takoha ŭčynku zrazumiełyja. Pa ŭmovach kantraktu, maskoŭskaja meryja apłočvaje pracu padradčyka tolki ŭ tym vypadku, kali pracuje bolš za 90% kamier. A u «Strojmontažsiervisa» ŭ Paŭnočna-Uschodniaj akruzie, dzie była praviedzienaja pravierka, ich pracavała mienš za pałovu. Zaraz praviarajucca inšyja akruhi.
U Maskvie ŭ padjezdach i na vulicach ŭstanoŭlena zvyš za 80 000 kamier. Jany tranślujuć malunak u admysłovy centr, a toj, u svaju čarhu, daje videa milicyi pa jaje zapycie.
