Ministr turyzmu Izraila Stas Misiežnikaŭ spadziajecca, što paśla Ukrainy biaźvizavy režym budzie ŭviedzieny ź Biełaruśsiu, ale «heta ŭžo pytańnie mižnarodnaj palityki, a nie ŭnutranaj biaśpieki abo jašče čahości».
Pra heta jon paviedamiŭ 12 studzienia na plenarnym pasiadžeńni kniesieta, paviedamlaje izrailski partał navinaŭ
Misiežnikaŭ adznačyŭ «vialiki pośpiech» admieny viz z Rasijaj u vieraśni 2008 hoda: patok turystaŭ uzros u niekalki razoŭ, i «nie tolki abahaciŭ kaznu, ale i palepšyŭ imidž Izraila ŭ samaj vialikaj dziaržavie śvietu». Nastupnaj krainaj SND, ź jakoj Izrail maje namier uvieści biaźvizavy režym, źjaŭlajecca Ukraina. Pavodle słoŭ ministra, hetuju inicyjatyvu «padtrymlivajuć usie ministerstvy, aprača MUS i niekatorych adździełaŭ Miniusta».
Jak raniej paviedamlałasia, ministr zamiežnych spraŭ Izraila Avihdor Libierman miarkuje, što ŭ Biełarusi isnujuć niadrennyja pieradumovy dla ŭviadzieńnia biaźvizavaha režymu, u tym liku «palityčnaja i adnosnaja ekanamičnaja stabilnaść».
10 lipienia 2009 hoda ŭ Minsku było padpisana mižuradavaje biełaruska‑izrailskaje pahadnieńnie ab supracoŭnictvie ŭ śfiery turyzmu.
Košt izrailskaj vizy va ŭsich krainach śvietu składaje 17 dalaraŭ ZŠA, a košt biełaruskaj vizy dla izrailcian — bolš jak 100 dalaraŭ.