12 studzienia 2010 h. spačyła ŭ Bohu sp. Vanda Skuratovič. Na praciahu svajho žyćcia sp. Skuratovič adznačałasia hłybokaj vieraj i viernaściu Katalickamu Kaściołu, mieła šyrokaje serca, adkrytaje dla kožnaha, chto sustrakaŭsia na jaje šlachu.
Vanda Skuratovič naradziłasia ŭ 1925 h. Vialikuju mužnaść vyjaviła ŭ hady Vialikaj Ajčynnaj vajny, k
ali razam sa svajoju siamjoj, ryzykujučy žyćciom, vyratavała habrejskuju siamju.
Za hety ŭčynak dziaržavaj Izrail Vandzie Skuratovič było prysudžana hanarovaje zvańnie «Praviednik narodaŭ śvietu».
U paślavajennyja hady sp. Vanda była ŭ liku tych, chto ŭ ciažkija časy ateizmu i pieraśledu relihii padtrymlivaŭ u našaj krainie ahieńčyk viery.
Jaje kvatera była sapraŭdnaj śviatyniaj, dzie zachoŭvaŭsia Najśviaciejšy Sakrament, celebravalisia nabaženstvy, časta spynialisia katalickija i hreka‑katalickija śviatary.
Vanda Skuratovič niesła vieru i inšym ludziam. Pa pryčynie adsutnaści śviataroŭ jana achryściła niekalki čałaviek, jakija pryjšli da Chrysta i Katalickaha Kaścioła. Jana była taksama adnoj z tych, chto baraniŭ prava minskich katolikaŭ mieć svoj chram u stalicy našaj krainy. Mienavita dziakujučy mužnaści i achviarnaści nievialikaj hrupy viernikaŭ, siarod jakich była i sp. Skuratovič, paśla dziesiaci hadoŭ niastomnaj pracy (u tym liku i pajezdak u Maskvu) uvosień 1980 h. ułady dazvolili adčynić kaścioł na Kalvaryjskich mohiłkach u Minsku.
Z nadychodam časoŭ relihijnaj svabody Vanda Skuratovič prymała ŭ svajoj kvatery katalickuju i hreka‑katalickuju moładź.
Značnaja častka siońniašnich maładych katolikaŭ Minska, asabliva parafijanie kaścioła Najśviaciejšaj Trojcy, staleła ŭ viery dziakujučy prysutnaści i malitvie sp. Vandy.
Raźvitańnie z pamierłaj adbyłosia ŭ kaściole Najśviaciejšaj Trojcy (śviatoha Rocha) na Załatoj Horcy 13 studzienia 2010 h. a 12‑j hadzinie. Śviatuju Imšu kancelebravali ryma‑katalickija i hreka‑katalickija śviatary. Hamiliju pramoviŭ ks. Juryj Kasabucki, probašč załatahorskaj parafii. U liturhii prymała ŭdzieł taksama hreka‑katalickaja moładź.
U časie raźvitalnaha nabaženstva pierad trunoju pamierłaj była adsłužana zaŭpakojnaja lityja. U karotkim słovie pierad lityjoj Apostalski Vizitatar dla hreka‑katolikaŭ Biełarusi Archimandryt Siarhiej Hajek nahadaŭ pra mužnaść, ćviordaść i vielič viery sp. Vandy.
Pamierłaja była pachavana na raŭbickich katalickich mohiłkach pad Minskam.
