Dziaržaŭny mytny kamitet Biełarusi vystupiŭ z tłumačeńniem adnosna unifikacyi pošlin na aŭtamabili, što ŭvoziacca ŭ ramkach Mytnaha sajuza.
Jak adznačajecca ŭ paviedamleńni DMK, ciapier, jak i ŭ 2009 hodzie, abkładańnie mytnymi płaciažami lehkavych aŭtamabilaŭ, što ŭvoziacca fizičnymi asobami dla asabistaha karystańnia, ažyćciaŭlajecca ŭ ilhotnym režymie pa adzinych staŭkach mytnych pošlin, padatkaŭ (ukaz prezidenta ad 15.10.2007 h. № 503).
Pry hetym DMK kanstatuje, što ŭ Rasii staŭki mytnych pošlin na aŭtamabili, što byli ŭ karystańni i ŭvoziacca fizičnymi asobami, značna vyšejšyja za dziejučyja ŭ Biełarusi.
U RF jany vahajucca ad 1,5 jeŭra za 1 kub. sm da 5,8 jeŭra za 1 kub. sm u zaležnaści ad rabočaha abjomu ruchavika.
«Vidavočna, što unifikacyja ŭsich mytnych praviłaŭ i pracedur u ramkach Mytnaha sajuza zapatrabuje unifikacyi stavak mytnych płaciažoŭ na aŭtamabili, što ŭvoziacca hramadzianami, na prymalnym uzroŭni dla ŭsich troch dziaržaŭ — udzielnic Mytnaha sajuza», — padkreślivajecca ŭ paviedamleńni mytnaha viedamstva.
DMK adznačaje, što 1 lipienia 2010 hoda ŭ ramkach Mytnaha sajuza pavinien nabyć moc mižnarodny dahavor, jakim buduć kančatkova vyznačany adzinyja staŭki mytnych pošlin, padatkaŭ na aŭtamabili, što ŭvoziacca hramadzianami dla ŭłasnaha karystańnia.
Jak paviedamlałasia raniej, 14 studzienia kiraŭnik DMK Biełarusi Alaksandr Špileŭski paviedamiŭ žurnalistam, što dziejučyja praviły ŭvozu aŭtamabilaŭ fizičnymi asobami zastanucca raniejšymi da lipienia. Z 1 lipienia 2010 hoda, kali ŭ poŭnym abjomie pačnie pracavać Mytny sajuz Biełarusi, Kazachstana i Rasii, pošliny na ŭvoz transpartnych srodkaŭ fizičnymi asobami vyrastuć.
