Nivodnaje ź piaci piśmova vykładzienych mierkavańniaŭ nakont stvareńnia ŭ Viciebsku admysłovaj płoščy dla ŭstalavańnia fłahštoka, nie było pryznana słušnym. Navat pamyłku ŭ naźvie «Płošča fłaha i hierba», na jakuju ŭkazali ŭdzielniki abmierkavańnia, aŭtary prajekta nie pryznali — adkazali, što nazva płoščy «pradstaŭlena jak pierśpiektyŭnaja prapanova» i što kančatkovy varyjant budzie zaćviardžacca harvykankamam.
Hramadskaje abmierkavańnie tyčyłasia ŭźviadzieńnia novaha abjekta haradskoj infrastruktury — fłahštoka dla dziaržaŭnaha ściaha vyšynioj 69 mietraŭ. Čamu vyšynia mienavita takaja? Tamu, što heta budzie «vyrab zavadskoj kamplektacyi». Taki adkaz atrymali tyja, chto ličyć vyšyniu fłahštoka nie suadnosnaj z susiednimi pabudovami.
Taksama ŭdzielniki hramadskaha abmierkavańnia źviartali ŭvahu na padmienu samoha pradmieta abmierkavańnia: haradžan prainfarmavali pra namier ustalavać fłahštok, a nasamreč akazałasia, što pad jaho zaprajektavana cełaja płošča z dvuma śviatładyjodnymi ekranami, hranitnaj kampazicyjaj z nazvaj, pieranosnymi kvietnikami, łaŭkami, sistemaj aśviatleńnia i videanazirańnia i brukavankaj na dole. Miarkujecca, što płošča zmoža źmiaścić da 2-ch tysiač čałaviek.
A nakont taho, što pra płošču ŭ pačatku i razmovy nie było, aŭtary kancepcyi błytana patłumačana, što ŭ dadzienym vypadku «nie praduhledžana stvareńnie płoščy jak inžynierna-transpartnaj infrastruktury».
Što ž tady praduhledžana na terytoryi 0,57 ha — nie tłumačycca zusim.
Byli zaŭvahi i pra toje, što ŭ prajektnaj dakumientacyi nie pryvodzicca košt ažyćciaŭleńnia idei. Prykładam, fłahštok, ustalavany ŭ Homieli, abyšoŭsia biudžetu ŭ amal miljon dołaraŭ.
U Viciebsku hrošaj spatrebicca bolš — z ulikam śviatładyjodnych ekranaŭ, interaktyŭnaj paneli i h. d. Ale pra hrošy z udzielnikami abmierkavańnia razmaŭlać nichto nie zachacieŭ: maŭlaŭ, suma budzie ŭdakładniacca pa miery ažyćciaŭleńnia prajekta.
Zrešty, nie była patłumačana i pryncypovaja nieabchodnaść źjaŭleńnia ŭ Viciebsku jašče adnoj płoščy dla dziaržaŭnych uračystaściaŭ — z ulikam taho, što hetyja funkcyi całkam vykonvaje Płošča Pieramohi.
Padrabiazna paznajomicca z tym, jakija adkazy atrymali ŭdzielniki abmierkavańnia, možna tut.
Čytajcie taksama:
Adkul Łanhbard skapiravaŭ prajekt Opiernaha teatra ŭ Minsku?
Stalinki, sabory, miačeci. Čym rasijskaja architektura abaviazana Biełarusi
