«Abjadnanyja demakratyčnyja siły zarekamiendavali siabie realnaj palityčnaj apazicyjaj uładam»,— zajaviŭ sustaršynia ADS, lider Abjadnanaj hramadzianskaj partyi Anatol Labiedźka, kamientujučy vyniki pasiadžeńnia palitrady kaalicyi, jakoje prajšło 24 studzienia ŭ Minsku.
«Vielmi važna vyrazna zajavić, — ličyć palityk, — što ŭ krainie jość palityčnaja apazicyja, u jakoj jość adkazy na tyja pytańni, što chvalujuć ludziej. I što apazicyja — dziejazdolnaja, što my prapanoŭvajem pazityŭnuju alternatyvu ŭ dakumientach i asobach. Niekatoryja usprymajuć tak, što jość tolki asnoŭnyja hulcy na palityčnym poli — heta Alaksandr Łukašenka, heta Rasija i Brusiel, a palityčnaj apazicyi ŭnutry krainy niama.
Siońniašniaja narada pavinna dać adkaz — palityčnaja apazicyja jość, i ŭ joj jość pazityŭnaja alternatyva dla Biełarusi i jaje hramadzian».
Sustaršynia ADS, lider Biełaruskaj partyi levych «Spraviadlivy śviet» Siarhiej Kalakin skazaŭ: «Meta siońniašniaj sustrečy — pakazać hramadstvu, u pieršuju čarhu jaho demakratyčnaj častcy, nad čym pracujuć demakratyčnyja siły, što im udajecca i što nie ŭdajecca. Pasłuchać našych aktyvistaŭ ź miescaŭ, jakija lepš, mahčyma, čym my, viedajuć, jakaja situacyja składvajecca, dla taho kab nie pamylicca ŭ toj stratehii, što budzie pryniata».
Na pytańnie, što ž, na dumku Kalakina, najpierš nie ŭdajecca demakratyčnym siłam, jon adkazaŭ: «Samaje hałoŭnaje, što nie ŭdajecca demakratyčnym siłam, — pierastać być demakratyčnaj apazicyjaj, a stać demakratyčnaja uładaj. My pavinny šukać šlachi, jak vyrašyć hetu zadaču. Pakul my jaje nie vyrašyli, značyć my nieefiektyŭna pracujem».
U pasiadžeńni palitrady, jakoje prajšło ŭ staličnym hateli Crowne Plaza, uziali ŭdzieł razam z haściami 89 čałaviek, u tym liku 28 členaŭ palitrady, pradstaŭniki vaśmi pasolstvaŭ, a taksama ofisa ABSIE ŭ Biełarusi.
