Kiraŭnik haradzienskaj viertykali Uładzimir Saŭčanka zvolnieny z pasady pa ŭłasnym žadańni.
Jak paviedamlaje pres-słužba Łukašenki, adstaŭka staršyni Haradzienskaha abłvykankama źviazanaja sa stanam zdaroŭja Saŭčanki, jaki paprasiŭ «pieravieści jaho na pracu ź mienšym abjomam zadač».
Abłvykankamam budzie pakul kiravać pieršy namieśnik Saŭčanki Ivan Žuk.
Hrodzienski žurnalist Andžej Pačobut kaža, što čutkam pra sychod Uładzimira Saŭčanki z pasady kiraŭnika vobłaści ŭžo hadoŭ piać. A toj kiravaŭ sabie Hrodzienščynaj ad 2001 hoda, zaniaŭšy pasadu staršyni abłvykankamu paśla śmierci Alaksandra Dubka.
«Takoha kiraŭnika, jak Saŭčanka, užo nie budzie. Jaho admysłova siudy prysłali «navieści paradak», — miarkuje Pačobut.
I pryhadvaje zroblenaje za hady kiravańnie Saŭčankam: likvidacyja niezaležnaj presy — hazietaŭ «Pahonia» i «Birža infarmacyi», rujnavańnie histaryčnaha centra karaleŭskaha horadu, nastup na Sajuz palakaŭ. «Niezaležnaje hramadstva Hrodna dakładna škadavać nie budzie pra jahony sychod», — padkreślivaje žurnalist.
Jon pryhadvaje taksama hučnuju adstaŭku načalnika ŭpraŭleńnia ŭnutranych spraŭ Hrodzienskaha abłvykankama Hienadzia Chaćko,
jakoha źniali z pasady zhodna z ukazam Alaksandra Łukašenki ad 3 listapada 2009 hoda z farmuloŭkaj «u suviazi z ździajśnieńniem prastupkaŭ, što dyskredytujuć zvańnie supracoŭnika orhanaŭ unutranych spraŭ». «Saŭčanka siabravaŭ z Chaćko i, pa čutkach, da apošniaha baraniŭ jaho», — kaža Pačobut.
Mikoła Markievič, redaktar začynienaj uładami haziety «Pahonia», kaža,
što z adstaŭkaj Uładzimira Saŭčanki jaho rodny horad atrymaŭ šaniec.
«Liču jaho vialikim nieprafiesijanałam, jaki za čas svajho kiravańnia nanios vielizarnuju škodu horadu. Jaho sychod rasceńvaju jak šaniec na źjaŭleńnie adekvatnaha i razumnaha kiraŭnika».
***
Saŭčanka Uładzimir Jahoravič
Naradziŭsia 26 lutaha 1952 h. u v. Frołaŭka Kaściukovickaha rajona Mahiloŭskaj vobłaści. Skončyŭ Biełaruskuju dziaržaŭnuju sielskahaspadarčuju akademiju pa śpiecyjalnaści inžynier ziemleŭparadkavańnia. Karjeru pačynaŭ u adnym z kałhasaŭ Kruhlanskaha rajonu, zatym pracavaŭ na pasadzie staršyni Kruhlanskaha rajvykankama i namieśnika staršyni Mahiloŭskaha abłvykankama. Na Hrodzienščynie pačynaŭ pracu pieršym namieśnikam staršyni Hrodzienskaha abłvykankama, kuryravaŭ pytańni ahrapramysłovaha kompleksu. U sakaviku 2001 h. zaniaŭ pasadu staršyni abłvykankamu paśla śmierci Alaksandra Dubka. Na pasadzie kiraŭnika abłvykankamu mieŭ vymovu za zatrymki zarobkaŭ, a taksama za falsifikacyju spravazdačnych danych pa hetych pytańniach.
