Fota Julii Daraškievič
27 studzienia ab pačatku svajoj prezidenckaj kampanii aficyjna abviaściŭ palityk Aleś Michalevič. Za hod da vybaraŭ jon staŭ pieršym apazicyjanieram, jaki kidaje vyklik Łukašenku.
Miesca dla pačatku kampanii Michalevič abraŭ dosyć niečakanaje — płanietaryj u parku Horkaha. Žurnalisty i hości ŭsielisia ŭ zali, dzie ekskursavod staranna raskazvaŭ usio, što viedaje pra zorki, suzorji, płaniety i tumannaści.
«Ciapier pierad dziećmi zmahu kazyrnuć viedami, — kazaŭ adzin znajomy. — A to akazvajecca, što Płuton ad 2006 hoda nie ŭ Soniečnaj sistemie». Inšy znajomy žurnalist dzialiŭsia, što nie byŭ u płanietaryi hadoŭ tryccać.
Zrešty, spadziavańni, što zajava ab pačatku kampanii budzie zroblena akurat u płanietaryi, nie spraŭdzilisia. Paśla lekcyi pra zorki ŭdzielniki mierapryjemstva rušyli ŭ bok kaviarni «Žar‑Ptuška». Tam Michalevič i zrabiŭ svoj vystup.
Michalevič padniaŭsia na druhi pavierch ustanovy, kab uziać słova, i hladzieŭ na astatnich źvierchu ŭniz. Havaryŭ pa‑biełarusku. Jon adrazu skazaŭ, što jahonaja kampanija budzie hruntavacca na pryncypova novych dla biełaruskaj palityki pazicyjach. Kampanija ž budzie rabicca biełarusami dla Biełarusi.
Kaściak kamandy składuć adukavanyja ludzi, stanaŭleńnie jakich adbyvałasia ŭžo ŭ niezaležnaj krainie. Šmat chto ź ich pracavaŭ na Zachadzie, ale viarnuŭsia ŭ Biełaruś, zaznačyŭ Michalevič. Jany krytyčna staviacca, jak da dziejsnaj ułady, tak i da apazicyi.
Heta byli tezisy pieršaj častki vystupu. Potym pa‑anhielsku pačali śpiavać nieviadomyja muzyki, jakich nichto nie pradstaviŭ.
U druhoj častcy pramovy Michalevič stajaŭ pobač z ekranam, dzie była vyjava rakiety, hatovaj da startu. Palityk zaznačyŭ, što najpierš jon budzie pracavać z adukavanym haradskim nasielnictvam. Michalevič upeŭnieny, što ni ŭ kaho z palitykaŭ takoj vialikaj padtrymki ad hetaha płasta nasielnictva, jak u jaho, nie budzie.
Michalevič skazaŭ, što jahonaja kampanija nie budzie hruntavacca na krytycy supiernikaŭ, jana budzie baziravacca na ahitacyi svajoj prahramy i svaich mocnych bakoŭ.
«My nie za apazicyju, my nie za ŭładu. My — za Biełaruś», — kazaŭ palityk.
Michalevič paźbiahaŭ havaryć słova «ja», zamiest jaho ŭžyvajučy «my», padkreślivajučy, što biez kamandy hetaja kampanija niemahčymaja.
Mierapryjemstva naviedali namieśnik staršyni Partyi BNF Ihar Lalkoŭ, staršynia Vialikaj Rady «Baćkaŭščyny» Alena Makoŭskaja, staršynia Tavarystva achovy pomnikaŭ historyi i kultury Anton Astapovič, lider ruchu «Razam» Viačasłaŭ Siŭčyk.
Michalevič padkreślivaŭ, što jaho padtrymlivajuć niekatoryja biźnies‑supolnaści ŭnutry krainy, a taksama ŭpłyvovyja pradstaŭniki dyjaspary. «Kampanija budzie pravodzicca vyklučna za biełaruskija hrošy, što budzie adroźnivać jaje ad inšych kandydataŭ», — skazaŭ A.Michalevič.
«Start rakiety pačaŭ zasvajeńnie kosmasu. Maja kamanda adpraŭlajecca ŭ składany šlach. Pajechali!» — tak palityk skončyŭ svoj vystup.
Potym jon paviedamiŭ žurnalistam, što buduć asobnyja prezientacyi jahonaj kamandy i prahramy. «Ja ŭpeŭnieny ŭ svaich siłach», — skazaŭ palityk.
Zadačaj maksimum jon nazvaŭ pieramohu na vybarach, a zadačaj minimum — zaručycca padtrymkaj siaredniaj kłasy. Michalevič nie źbirajecca ŭdzielničać u vyłučeńni adzinaha ad apazicyi.
Paśla byŭ nievialiki furšet, dzie Michalevič padniaŭ tost «Za pieramohu!».
Aleś Michalevič. Nar. u 1975. Jon ź siamji navukoŭcaŭ. Byŭ adnym ź pieršych vypusknikoŭ Kołasaŭskaha liceja. Skončyŭ BDU pa śpiecyjalnaści palitałohija, prachodziŭ stažyroŭki ŭ Varšavie i Oksfardzie. Byŭ zasnavalnikam Zadzinočańnia biełaruskich studentaŭ, doŭhi čas uvachodziŭ u Partyju BNF. Byŭ deputatam Puchavickaha rajsavieta. Žanaty, maje dźviuch dačok.
