Rasijskaja fihurystka, śpiavačka i aktorka Hanna Siemianovič nie vyklučaje mahčymaści vystupić na «Jeŭrabačańni» ad Biełarusi. «Vy prapanujcie — ja padumaju», — skazała Siemianovič na pres‑kanfierencyi 30 studzienia ŭ Minsku.
Pavodle jaje mierkavańnia, «Jeŭrabačańnie» — heta «vydatny konkurs, jaki daje mahčymaść vykanaŭcu pakazać svaje vakalnyja zdolnaści». Letaś Siemianovič udzielničała ŭ rasijskim adboračnym tury «Jeŭrabačańnia».
Hanna Siemianovič prylacieła ŭ Minsk dla ŭdziełu ŭ adkryćci 30 studzienia spartyŭnaha kompleksu «Minsk‑Arena». Razam sa svaim partnioram pa viadomym prajekcie «Lednikovy pieryjad» Vadzimam Kałhanavym jana vystupić padčas estradnaha šou na aficyjnym adkryćci kompleksu pierad pačatkam «Matču zorak Kantynientalnaj chakiejnaj lihi». Pavodle słoŭ Siemianovič, padčas hastrolaŭ prajekta «Lednikovy pieryjad» Kałhanaŭ inšym razam arhanizoŭvaje tavaryskija chakiejnyja matčy ź miascovymi kamandami.
«My chočam prapanavać biełaruskaj prezidenckaj chakiejnaj kamandzie pazmahacca z kamandaj «Lednikovaha pieryjadu», — skazała jana.
Havoračy pra svaju pracu ŭ kino, Siemianovič pryznałasia, što maryć pra surjoznuju rolu. Da hetaha jana źniałasia ŭ kamiedyjach «Ironija losu. Praciah», «Hitler kaput» i «Utajmavańnie svavolnych». Pavodle jaje słoŭ, ciapier joj prapanujuć rolu miedsiastry ŭ vajennym filmie. Što da jaje karjery vykanaŭcy, to paśla vialikich hastrolaŭ šou «Lednikovy pieryjad» Siemianovič pačnie zapis druhoha solnaha alboma.
«Kali ja vyjdu zamuž, zaviadu dziaciej, to na niejki čas pakinu karjeru, kab abaranić svaju siamju, — pryznałasia jana. — Ale naŭrad ci ja sydu nadoŭha». Adkazvajučy na pytańnie, u jakoj jašče śfiery jana płanuje realizavacca, Siemianovič skazała, što heta moža być maleńki siamiejny biźnies, źviazany z futravymi vyrabami.
Adkazvajučy na pytańnie pra sakrety svajoj źniešnaści, fihurystka, śpiavačka i aktrysa ŭzhadała słovy Kako Šanel:
«Kali žančyna da 30 hadoŭ niepryhožaja — jana prosta durnica».
«Žančyna pavinna ŭmieć schavać svaje niedachopy i padkreślivać dobryja jakaści», — skazała Siemianovič.
Taksama jana pryznałasia, što jaje babula naradziłasia ŭ Biełarusi, u vioscy pad Minskam.
Hanna Siemianovič naradziłasia ŭ Maskvie ŭ 1980 hodzie. Majstar sportu mižnarodnaha kłasa pa fihurnym katańni. Para Hanna Siemianovič — Raman Kastamaraŭ ličyłasia druhim pa sile rasijskim duetam paśla pary Iryna Łabačova — Ilja Avierbuch. Surjoznaja traŭma prymusiła Siemianovič pakinuć fihurnaje katańnie. Paśla hetaha jana pačała pracavać na telebačańni, paśla stała salistkaj hurtu «Bliskučyja» (2003—2007 hh.).
