Naftavaja vajna zrabiła biełaruskaha kiraŭnika hałoŭnym abjektam kpinaŭ na rasijskim telebačańni. Piša Jahor Marcinovič.
Novy prajekt Pieršaha kanała — «Multasoby» — nahadaŭ hledačam demakratyčnyja 1990‑ia. Tady NTV‑šnyja «Lalki» mahli na ŭsiu krainu śmiajacca i z prezidenta, i z premjer‑ministra, i z astatnich palitykaŭ. Źjaŭlalisia ŭ efiry i parodyi na zorak šou‑biznesu, ale ŭvaha fakusavałasia na hramadskich dziejačach — śmiešnych, niedaskanałych. Asabistaja kryŭda Pucina vyklikała zakryćcio pieradačy ŭ 2002 hodzie.
Satyra ŭvaskresła praź siem hadoŭ na inšym telekanale. Praŭda, ciapier dazvolena śmiajacca tolki z artystaŭ i zamiežnych palitykaŭ. Kranać svaich — niepažadana. Pucin i Miadźviedzieŭ źjavilisia ŭ «Mulcie» tolki kab praśpiavać biaskryŭdnuju navahodniuju piesieńku i papiaredzić Juščanku, što «u vas ohoń pohas — eto raz».
Žabraki Cimašenka ź Juščankam, babnik Bierłuskoni i padabcaśnik Sarkazi — voś novyja hieroi rasijskaj satyry. A ź ciaham razhortvańnia naftavaha kanfliktu pad pryceł trapiŭ i Łukašenka. Jaho vobraz — biescyrymonny, nadakučlivy i durnavaty palityk, jaki havoryć na trasiancy.
Voś Łukašenka ŭprošvaje Miadźviedzieva pakatać jaho na prezidenckim limuzinie. Voś sprabuje pradać traktar Bierłuskoni i Chiłary Klintan, psujučy im spatkańnie. Voś jon idzie «davać śvińniam».
Pavodle siužeta apošniaj pieradačy, u hulni «Chto choča stać miljanieram?» piersanaž Łukašenka padmanam vyjhraje hałoŭny pryz. Jaho frazy možna raźbirać na cytaty: «Davajcie nie 50 na 50, a 98 na 2! Ja tak pryvyk!» ci «Nie treba baćku pužać! Baćka pužany! Baćka na traktary pierakulvaŭsia!»
Pieradača vyjšła padčas naftavych pieramovaŭ. A adrazu paśla ich tuju samuju ideju — Łukašenka hulaje ŭ «Miljaniera» — vykarystali ŭ inšaj humarystyčnaj pieradačy taho ž kanała, «Vialikaj roźnicy». Epizod, dzie piersanaž Łukašenka niesumlenna vyjhraje try miljony rasijskich rubloŭ, u Biełarusi nie pakazali — vyrazała cenzura.
Rasijski Pieršy kanał prasuje Łukašenku, nibyta choča skazać svaim hledačam: źviarnicie ŭvahu, chto faktyčna kradzie našy, rasijskija hrošy.
…Naftavaja prablema, zdajecca, vyrašanaja. Cikava, kaho kremloŭskija ideołahi pryznačać nastupnaj «achviaraj» satyryčnaha telebačańnia?
