Lidskija «Dažynki‑2010» buduć kaštavać 485 miljardaŭ rubloŭ ($170 miljonaŭ). Na što ich patraciać?
U pieršyja dni hoda byŭ nazvany čarhovy horad‑ščaśliŭčyk. Honar atrymać typavuju rekanstrukcyju rajcentra dastaŭsia Lidzie.
Biudžet sioletnich «Dažynak» bje ŭsie rekordy. Zrešty, tendencyja nazirajecca z hodu ŭ hod. U rublovym ekvivalencie biudžet śviata pavialičvajecca štohod — «Orša‑2008» — 320 młrd, «Kobryn‑2009» — 330 młrd, «Lida‑2010» — 485 młrd.
«Dažynki» ŭ kredyt
Dniami ŭ internet byŭ vykładzieny prykładny płan z «Asnoŭnymi mierapryjemstvami pa padrychtoŭcy Lidskaha rajona» za podpisam užo byłoha kiraŭnika Hrodzienščyny Uładzimira Saŭčanki. Namieśnik staršyni Lidskaha rajvykankama Jarasłaŭ Mikavoz paćvierdziŭ jaho isnavańnie. Pa słovach supracoŭnikaŭ lidskich dziaržaŭnych ustanoŭ, ciapier dakumient rassyłajecca im dla aznajamleńnia.
Pra toje, jak źbirajucca dzialić dažynkavy piroh koštam 170 miljonaŭ dalaraŭ (!), trochi paźniej, a zaraz adkaz na hałoŭnaje pytańnie — adkul voźmucca hrošy?
Finansavańnie śviata ŭ apošnija hady pierakłałasia z respublikanskich plačej na rehijanalnyja. Za srodki dziaržaŭnaha biudžetu buduć pabudavanyja tolki haradski stadyjon i Ladovy pałac — jak ža bieź jaho — dy adramantavany miascovy kaledž.
Dapamoha ad vobłaści bolšaja — kala $11 miljonaŭ. Hałoŭnaja častka hetych hrošaj pojdzie na restaŭracyju Lidskaha zamka.
Ažno 58% ad biudžetu «Dažynak‑2010» ($100 miljonaŭ!) płanujuć atrymać z bankaŭskich kredytaŭ. Pryncypy «hulać dyk hulać» i «paśla nas — choć patop» zahonić Lidu ŭ daŭhi na dziesiacihodździe napierad. Letaś kobrynskija ŭłady taksama nabrali kredytaŭ, ale ich kolkaść była ŭtraja mienšaja za sioletniuju.
Zdarovaje cieła…
Dažynki nie byli b dažynkami, kali b u Lidzie nie pačali budavać Ladovy pałac. Jon budzie kaštavać $7,5 miljona. Dva futbolnyja stadyjony — adzin novy, druhi adramantavany — abyducca jašče ŭ $3,75 miljona. Narešcie, spartkompleks — tyja samyja $3,75 miljona.
«Chit siezona» — akvapark u kredyt. Usie $15 miljonaŭ na jaho budaŭnictva musiać vydzielić banki.
Darečy, kobrynski akvapark fatalna nie zahružany praz adsutnaść achvotnych płavać.
… ci zdarovy duch?
U adroźnieńnie ad sportu, kulturna‑histaryčnaja prahrama vyhladaje biednavata. Narešcie dačakajecca rekanstrukcyi honar horada — Lidski zamak. Ramontnyja pracy buduć kaštavać udvaja tańniej za akvapark.
Raździeł «kultavyja abjekty» skaročany da minimumu. Ramont piaci chramaŭ umiaścili ŭ $200 tysiač. I to, krynicy finansavańnia bolšaści ź ich dahetul niavyznačanyja. Tolki z kaściołam usio zrazumieła — na jaho hrošaj niama, a tamu kapitalny ramont budzie pravodzicca za srodki hramadzianaŭ. Da słova, adna hramadskaja prybiralnia ŭ centry Lidy budzie kaštavać bolš za ŭsie chramy…
Sponsara na pomnik Hiedyminu za $300 tysiač taksama pakul niama.
Miascovym uładam nie daje spać spakojna pośpiech 3D‑kinateatra «Kijeŭ» u Minsku, bilety na kinasieansy ŭ jaki raspradajucca na miesiac napierad. Tamu nastupnym horadam z 3D stanie mienavita «dažynkavaja» Lida.
Miarkujučy pa dośviedzie minułych hadoŭ, z kožnym miesiacam prajekt budzie razrastacca ŭsio macniej. Rajonnyja čynoŭniki razumiejuć, što «Dažynki» — unikalnaja mahčymaść padaić karovu z faktyčna nievyčerpnym zapasam małaka, i tamu chočuć zapłanavać jak maha bolš mierapryjemstvaŭ. Kali praviły praviadzieńnia śviata zastanucca raniejšymi, nastupnaja mahčymaść kompleksnaha ramontu horada nadarycca pryblizna praz 100 hadoŭ.
