Brescki harvykankam zabaraniŭ praviadzieńnie fiestyvalu Men's Fest z udziełam viadučych alternatyŭnych hurtoŭ Biełarusi — Pomidor/OFF, Sciana, MAUZER.
«Bolš za ŭsio ja rasčaravany navat nie z toj pryčyny, što naš hurt nie prezientuje bieraściejcam svoj novy albom «Porna». Mnie kryŭdna najpierš za zavadataraŭ hetaha festu. Viedaju, kolki siłaŭ i času jany ŭkłali ŭ Men's Fest», — kaža Jan, lider hurta MAUZER — płanavanaha chedłajneru festu.
Men's Fest mieŭsia prajści 20 lutaha ŭ Bresckim pałacy prafsajuzaŭ. Arhanizatary festu ŭzhadnili praviadzieńnie kancertu z dyrekcyjaj ustanovy.
Tyja navat ahitavali pravieści fest u ich, a nie ŭ kłubie. Adnak mienš za dzieviać dzion da festu arhanizatary raptam atrymali admovu, pryčym pry najaŭnaści nieabchodnaha hastrolnaha paśviedčańnia.
Zavadatar festu Men's Fest, pradziuser Źmicier Nazaraŭ kaža, što prablemy ŭźnikli na ŭzroŭni ideałahičnaha adździeła Bresckaha harvykankama dy jaho kiraŭnički Ały Starykievič.
«Hastrolnaje paśviedčańnie było ŭžo atrymana, ale treba było jašče ŭzhadnić dy zavieryć afišu festu ŭ vykankamie, — apaviadaje Źmicier. — Ale tam skazali, kab afišu padpisaŭ dyrektar DK, «kab jany viedali, što jon viedaje pra mierapryjemstva». A dyrektar, jaki dzień tamu byŭ tolki za, kaža, što kancertu nie budzie i kamientavać niešta admaŭlajecca, spasyłajučysia na harvykankam. Takoje vo vyjšła začaravanaje koła».
Heta nie pieršy vypadak z zabaronaj rok‑festaŭ u rehijonach.
U 2007 hodzie na pasiedžańni Połackaha harvykankama była pryniataja pastanova «ličyć niemetazhodnym praviadzieńnie festyvalu «Rok‑Koła», bo jano nie adpaviadaje histaryčnaj, duchoŭnaj spadčynie horada Połacka i pravasłaŭju».
