Padčas rekanstrukcyi čyhunačnaha vakzała ŭ Viciebsku źniščyli ŭnikalny kompleks vitražoŭ z vyjavami hierbaŭ abłasnych haradoŭ. Centram kampazicyi byŭ vitraž z hierbam «Pahonia» i nadpisam «Biełaruś» na bieł‑čyrvona‑biełym fonie.
Vitražy na viciebskim vakzale byli ŭstalavanyja ŭ pieršyja hady niezaležnaści Biełarusi i daŭno mulali vočy čynoŭnikam svajoj «ideałahičnaj niavytrymanaściu». Ciapier u budynak siaredziny XX stahodździa ŭstaloŭvajucca taniravanyja lusterkavyja vokny, a vitražy, pa słovach načalnika vakzała, cytuju: «vykinutyja ŭ mietałałom».
Nie demantavanymi pakul zastalisia vitražy na fasadzie budynka, ale chutka dabiarucca i da ich.
Pareštki byłoj pryhažości možna nazirać na budaŭničaj placoŭcy. Nichto nie padbaŭ pra aściarožny demantaž adnoj sa słavutaściaŭ Viciebska. Padobna na hetuju składanuju apieracyju nie znajšłosia ni hrošaŭ, ni žadańnia.
Nahadajem, što pa patrabavańniu Alaksandra Kosinca, jakoje jon vykazaŭ 3 śniežnia 2009 hoda na pasiedžańni štaba, termin rekanstrukcyi vakzała skaročany na 10 miesiacaŭ. Ciapier pracy pavinny praści ŭ dva etapy i skončycca 1 lipienia 2010 hoda, zamiest troch etapaŭ z zakančeńniem pracy ŭ krasaviku 2011 hoda.
Taksama staršynia Viciebskaha abłvykankama zahadaŭ aformić u adzinym styli Pryvakzalnuju płošču i prylehłuju da jaje častku vulicy imia Kirava.
