Siońnia ŭ rajonnym sudzie ŭ Vałožynie adbyŭsia razhlad pazovu aficyjnaha Sajuzu palakaŭ, siadziba jakoha mieścicca ŭ Hrodnie, da dziajački polskaha ruchu ź Ivianca Taresy Sobal. Sud Vałožynskaha rajonu adpraviŭ spravu suprać Teresy Sobal na pierahlad. Spadarynia Sobal padtrymlivaje niepryznavany ŭładami Sajuz palakaŭ na čale z Anžalikaj Borys. U aficyjnym Sajuzie ličać, što Taresa Sobal svoječasova nie vyzvaliła Dom polski ŭ Iviancy, siońnia na budynak nakładzieny sudom aryšt i jon apiačatany. Tym časam zranku byli zatrymanyja Anžalika Borys, Andrej Pačobut, Ihar Bancar, Miečysłaŭ Jaskievič — usiaho 40 čałaviek, a taksama Anatol Labiedźka. Jany jechali ŭ Vałožyn na sudovy praces nakont Polskaha doma ŭ Iviancy. Prapanujem vašaj uvazie onłajn-repartaž ź miesca padziej.
Padjechać da budynku suda było niemahčyma.
Uvachod u sud achoŭvali milicyjanty.
Irenu Valuś ciahnuć u pastarunak.
Irenu Valuś daciahnuli.
Taresu Sobal sustrakali z sudu hučnym «Sto lat!».
Milicyjant pahražaje prysutnym adkaznaściu za niesankcyjanavany mitynh.
Ludzi ŭ maskach kamunalščykaŭ uvažliva sačyli za padziejami la budynka i apieratyŭna dakładvali abstanoŭku.
Kantralavać palakaŭ pryjechali i staličnyja milicyjanty - načalnik upraŭleńnia pravaparadku MUS Alaksandr Barsukoŭ (sprava). Učora jany razhaniali maładafrontaŭskuju akcyju.
Anžalicy Borys dali 1 młn 50 tys. štrafu (30 bazavych vieličyniaŭ), Andrej Pačobut aryštavany na 5 sutak. Irenu Valuś abvinavačvajuć u čynieńni pieraškod supracoŭnikam milicyi. Na jaje byŭ składzieny pratakoł, paśla čaho redaktarku haziety SPB «Głos znad Niemna na uchodźstwie» adpuścili.
13:04
Irenu Valuś nie vypuścili, ale ludzi pačali razychodzicca. Tym časam asudžany na 5 sutak administracyjnaha aryštu pres-sakratar SPB Ihar Bancar abviaściŭ haładoŭku.
12:38
Sud skončyŭsia, a spravu adpravili na pierahlad, pakolki advakat Taresy Sobal Alaksandr Halijeŭ pradstaviŭ dakumienty, što apisvańnie majomaści prajšło niapravilna.
Ludzi, što sabralisia vakoł suda, pakul nie razychodziacca, jany patrabujuć vyzvalić zatrymanuju i źbituju redaktarku haziety «Głos znad Niemna na uchodźstwie» Irenu Valuś.
Milicyja papiaredžvaje, što kali ludzi nie razyducca, to budzie ŭžyta siła.
12:21
Irena Valuś — hałoŭny redaktar haziety SPB «Głos znad Niemna na uchodźstwie» pasprabavała prajści ŭ sud, ale milicyjanty jaje brutalna pavalili i pavałakli ŭ budynak. Tym časam z suda vychodziać śviedki abvinavačvańnia. Ludzi im skandujuć «Hańba!»
12:03
Zaraz sudziać astatnich čalcoŭ kiraŭnictva nieaficyjnaha SPB.
11:27
Pierad dźviaryma suda stajać krepkija mardavaroty i nikoha ź siabroŭ niepryznavanaha ŭładami SPB — a ich u Vałožyn prarvałasia 30 čałaviek — u sud nie puskajuć. Prapuścili tolki advakatku.
Milicyja kaža, što nie puskajuć tamu, bo «vučeńni iduć», puskać buduć tolki z pozvaj. Ale puskać buduć tolki śviedkaŭ z boku abvinavačvańnia. Toj ža Pačobut mieŭsia ŭziać udzieł u sudzie jak śviedka z boku abarony, ale jaho zatrymali pa darozie ŭ Vałožyn.
Pad dźviaryma suda stajać kala 30 čałaviek — usie pradstaŭniki nieaficyjnaha Sajuza palakaŭ, nikoha z aficyjnaha niama. Ludzi kažuć, što buduć stajać pakul nie vypuściać Taresu Sobal.
Zatrymany Anatol Labiedźka. Jon fatahrafavaŭ na mabilnik dziejańni milicyjantaŭ. Ciapier palityk znachodzicca ŭ Vałožynskim RAUSie.
Aproč taho, dva traktary sabrali ŭvieś śnieh na płošču pierad budynkam suda, i mašynami da jaho nie padjechać.
* * *
U Vałožyn mielisia pryjechać siabry nieaficyjnaha Sajuza palakaŭ, kab padtrymać Taresu Sobal, ale zaraz horad błakavany milicyjaj, jakaja stavić na mecie nie dapuścić udziełu ŭ sudovym pasiadžeńni siabroŭ nieaficyjnaha SPB.
Na padjeździe da horada było zatrymanaje amal usio kiraŭnictva nieaficyjnaha SPB. U pryvatnaści, zatrymana liderka SPB Anžalika Borys. Jaje prymusili vyklučyć mabilny telefon i ciapier viazuć u Vałožynski RUUS.
U Hrodnie raniej byli zatrymany pres‑sakratar niepryznavanaha SPB Ihar Bancar, a pa darozie u Vałožyn — Miečysłaŭ Jaskievič i Andrej Pačobut. Usiaho ŭ aporny punkt kala Vałožyna dastavili 40 čałaviek.
Andrej Pačobut pierasieŭ u inšuju mašynu, što prajazdžała mima. Ale ŭ rajonie Iŭja druhuju mašynu taksama spynili. Milicyjanty skazali, što Pačobut nahadvaje im čałavieka, jaki ździejśniŭ razbojny napad. Ciapier jaho viazuć nazad u Hrodna.
