20 lutaha na abjadnaŭčym źjeździe Biełaruskaj sacyjał‑demakratyčnaj partyi «Narodnaja hramada» i sacyjał‑demakratyčnaj partyi «Svaboda» staršynia novaha ŭtvareńnia Mikoła Statkievič paćvierdziŭ ab svaim udziele ŭ prezidenckich vybarach.
«Naša Niva»: Nakolki surjozny Vaš namier iści na vybary?
Mikoła Statkievič: Pra takija rašeńni nielha abviaščać niesurjozna. Pierad dźviuma minułymi prezidenckimi kampanijami na mianie zavodzili kryminalnyja spravy. Ciapier ja znoŭ traplaju pad pilnuju ŭvahu śpiecsłužb. Mnie zdajecca, što ŭ 2011 hodzie ŭ apazicyi moža być apošni šaniec na pieramohu. Da vybaraŭ 2016 hoda jana moža prosta nie dažyć. Čarhovaja pieramoha Łukašenki moža baluča ŭdaryć pa nacyjanalnaj kultury, movie.
«NN»: A na adzinaha kandydata jašče realna vyjści?
MS: Naša pazicyja absalutna jasnaja, što pavinien być adziny kandydat. My prapanavali vyznačyć jaho z vyłučencaŭ ad troch najbolšych kaalicyj: Biełaruski niezaležnicki błok, Abjadnanyja demakratyčnyja siły i «Jeŭrapiejskaja kaalicyja». Pasiarednikam pa vyznačeńni moža stać, naprykład, Rada intelihiencyi. Kožny z kandydataŭ chaj pradstavić svaju stratehiju pieramohi i pakaža, što zdolny jaje realizavać. Kali pabaču lepšuju stratehiju za svaju, to ź lohkaściu sastuplu takomu kandydatu i budu jamu ŭsialak dapamahać.
«NN»: Navat Kalakinu?
MS: Kali Kalakin prezientuje realny płan pieramohi, to što zrobiš. My raniej žyli ŭ iluzijach, što mahčymaje padzialeńnie apazicyi na prajeŭrapiejskich i na nie prajeŭrapieskich. Ale ludziej na płošču my budziem zaklikać zusim inšymi łozunhami.
«NN»: Jakimi?
MS: Na źjeździe ja prapanavaŭ hety łozunh. Heta adno słova, ale jano, na moj pohlad, vielmi važkaje i adlustroŭvaje sens kampanii «Hodnaść». My pavinny ŭspomnić pra svaju čałaviečuju hodnaść i hodnaść krainy.
«NN»: A ludzi i hrošy na vybary ŭ Vas jość?
MS: Ja pryviadu tolki adzin prykład. Na parłamienckich vybarach 2008 hoda «Jeŭrapiejskaja kaalicyja» vyłučyła svaich kandydataŭ u dźviuch tracinach akruhaŭ [nasamreč "Jeŭrapiejskaja kaalicyja" vyłučyła 51 čałavieka na 110 akruhaŭ (heta značyć u 46,4% akruh, ale tolki 23 kandydaty byli zarehistravanyja (46% kandydataŭ, abo kandydaty ŭ 21% akruhaŭ -- NN]. . Dyk jany sabrali bolš za 100 tysiač podpisaŭ. A prezidenckija vybary kudy bolš značnaja padzieja.
«NN»: A nie biantežyć toj fakt, što Ruch «Razam» i «Małady front» uvachodziać adnačasova i ŭ JEK, i ŭ BNB?
MS: Absalutna nie biantežyć. BNB — heta ideałahičnaja kaalicyja, dzie sabralisia kansiervatyŭnyja arhanizacyi. «Jeŭrapiejskaj kaalicyja» — heta abjadnańnie arhanizacyj, jakich abjadnoŭvaje hieapalityčny vybar.
«NN»: A ź Michalevičam damovicca nie atrymajecca?
MS: Heta sprava BNB. Michalevič byŭ adnym z zasnavalnikaŭ Ruchu «Za Svabodu».
«NN»: Času da vybaraŭ niamnoha. Času chopić na jakasnuju kampaniju?
MS: Tak. Mnie zdajecca, što sens byŭ by navat u raptoŭna abvieščanaj kampanii. Ale takoha nie budzie. Pačniom prezidenckuju kampaniju adrazu paśla miascovych vybaraŭ. Dumaju, što jany ŭ značnaj stupieni i pakažuć, čaho nam čakać ad vybaraŭ prezidenckich.
***
Mikoła Statkievič naradziŭsia 12 žniŭnia 1956 h. Staršynia arhkamiteta Biełaruskaj sacyjał‑demakratyčnaj partyi «Narodnaja Hramada». Adzin z stvaralnikaŭ znakamitaha na pačatku 90‑ch Biełaruskaha zhurtavańnia vajskoŭcaŭ, jakoje damahałasia biełarusizacyi vojska, atrymanaha ŭ spadčynu ad SSSR.
U 1978 skončyŭ Minskuju vyšejšuju inžyniernuju zienitna‑rakietnuju vučelniu SPA. Kandydat techničnych navuk, padpałkoŭnik zapasu. U 2005 byŭ asudžany da dvuch hadoŭ abmiežavańnia voli za padrychtoŭku i praviadzieńnie vuličnych akcyj pratestu suprać vynikaŭ refierendumu 2004. Pakarańnie adbyvaŭ u Baranavičach i vioscy Błoń (Puchavicki rajon). Mižnarodnaj arhanizacyjaj Amnesty International pryznany viaźniem sumleńnia.