Niadaŭni načalnik Upraŭleńnia ŭnutranych spravaŭ Hrodzienskaj vobłaści hienierał Hienadź Chaćko abvieščany ŭ vyšuk. Na tym tydni jon vyjšaŭ z domu i bolš nie pakazvaŭsia.
Zajavu ŭ milicyju ab źniknieńni niadaŭniaha kiraŭnika milicyi pa Hrodzienskaj vobłaści zanieśli ŭsturbavanyja svajaki. Pikantnaści hetaj historyi dadaje toj fakt, što niezadoŭha da źniknieńnia na hienierał‑majora milicyi była zaviedzienaja kryminalnaja sprava. Jaho abvinavačvali ŭ parušeńni artykuła 424 častka 3 («Złoŭžyvańnie ŭładaj ci słužbovymi paŭnamoctvami»).
A heta praduhledžvaje da šaści hadoŭ źniavoleńnia z kanfiskacyjaj majomaści.
Spravu zavodziła Hienieralnaja prakuratura, ale potym rasśledavańnie było pieradadzienaje ŭ Hrodzienskuju abłasnuju prakuraturu. Tam śćviardžajuć, što na dopyty hienierał źjaŭlaŭsia spraŭna. Navat padazreńnia nie ŭźnikała, što jon prapadzie: jaki byŭ sens źmiaščać jaho pad aryšt?
Sprava Hienadzia Chaćko zakruciłasia letam 2009 hoda.
Tady Rada biaśpieki sumiesna z Kamitetam dziaržkantrolu i KDB zacikaviłasia katedžam hienierała ŭ Lidskim rajonie.
Jašče haračaj zastavałasia tema z «domikami ŭ vioscy» siarod kiraŭnictva Ministerstva ŭnutranych spravaŭ (papalisia namieśniki ministra Navumava Alaksandr Ščurko i Viktar Filistovič i inšyja vysokija čynoŭniki). Jak vynik, takija domiki pačali vyšukvać i ŭ rehijonach.
Pavodle adnoj ź viersij, Hienadź Chaćko
svajo lecišča acaniŭ i zadekłaravaŭ usiaho na 5 tysiač dalaraŭ.
Viadoma, za takija hrošy ničoha tałkovaha pabudavać ci kupić niemahčyma. Dziaržkantrol vystaviŭ hienierału ŭ 40 razoŭ bolš (200 tysiač «baksaŭ») i patrabavaŭ viarnuć ich dziaržavie.
Pra pabudovu katedža Chaćko ŭ Hrodnie chadzili lehiendy. Kazali, što ŭ budaŭnictvie było zadziejničanaje ci nie ŭsio abłasnoje ŭpraŭleńnie milicyi. A potym sprava trapiła na asabisty kantrol u Minsk.
Hienadź Chaćko ad pačatku rasśledavańnia adrazu byŭ adchileny ad pasady načalnika Upraŭleńnia ŭnutranych spraŭ Hrodzienskaj vobłaści. Aficyjna paviedamlałasia, što jon znachodzicca ŭ adpačynku ci maje prablemy sa zdaroŭjem. Ale nichto dakładna nie moh dać prahnoz, čym ža skončycca hetaja sprava.
Jašče ŭ vieraśni Chaćko viarnuŭsia na pasadu i byŭ peŭny, što jaho pryhody skončylisia i možna spakojna praciahvać pracu.
Adnak niešta nie skłałasia.
4 listapada Łukašenka ŭžo aficyjna adchiliŭ Chaćko z pasady kiraŭnika Hrodzienskaj abłasnoj milicyi. Pryčym, zvolnieny jon byŭ «u suviazi sa ździajśnieńniem učynkaŭ, jakija dyskredytujuć zvańnie supracoŭnika orhanaŭ unutranych spravaŭ» (padpunkt 15 punkta 154 Pałažeńnia ab prachodžańni słužby ŭ orhanach US RB).
Pra heta, darečy, zmaŭčali absalutna ŭsie dziaržaŭnyja ŚMI. Tolki praź niejki čas infarmacyja źjaviłasia ŭ vydańni «Viečiernij Hrodno».
Hrodzienski žurnalist Andrej Pačobut u svaim błohu zahadzia sprahnazavaŭ adstaŭku nie tolki Chaćko, ale i jahonaha namieśnika, načalnika ŭpraŭleńnia finansaŭ i tyłu padpałkoŭnika Rudnika, i načalnika aŭtahaspadarki padpałkoŭnika Radzikieviča. Pretenzii da ich byli ŭ tym, što na budaŭnictvie katedža byli zadziejničanyja milicyjaniery i milicejskaja technika.U svaim internet‑dziońniku Andrej Pačobut adznačaje, što, sychodziačy z pasady, Hienadź Chaćko napisaŭ u «Miliciejskij viestnik» artykuł «Čiesť imieju», dzie vykłaŭ svajo bačańnie padziejaŭ vakoł sumnaviadomaha katedža. «Akcenty byli rasstaŭleny ŭ artykule nastupnym čynam —
«bratva, nie stralajcie adzin adnaho».
Voś tolki «Miliciejskij viestnik» artykuł svajho byłoha šefa nie nadrukavaŭ. Takaja voś svaboda słova ŭ pahonach», — pisaŭ A.Pačobut.
Taksama žurnalist adznačaje, što milicyja Hrodzienskaj vobłaści za čas kiravańnia Chaćko «zhubiła «žoŭtuju majku» lidera siarod abłasnych upraŭleńniaŭ».
Niezadavolenaść pracaj hienierała vykazvaŭ jašče były ministr Uładzimir Navumaŭ. Sprava datyčyłasia surahatnaha ałkaholu ŭ Ašmianach. Tady Navumaŭ na kalehii MUS abviaściŭ, što suprać Chaćko i niekatorych jahonych padnačalenych prymienienyja dyscyplinarnyja spahnańni.
Na čas kiravańnia Hienadzia Chaćko prypała hučnaja palityčnaja sprava — aryšt vaŭkavyskich pradprymalnikaŭ Mikałaja Aŭtuchoviča, Juryja Lavonava i Uładzimira Asipienki.
Aryštavanych vinavaciać u padrychtoŭcy terakta suprać byłoha staršyni Hrodzienskaha abłvykankama Uładzimira Saŭčanki. Nibyta Aŭtuchovič rychtavaŭ zamach na «hubiernatara» z hranatamiotam.
Niadaŭniaja adstaŭka Saŭčanki, darečy, taksama niejkim čynam moža być źviazanaja sa spravaj hienierała. Kiraŭnik vobłaści ŭvieś čas zaŭziata abaraniaŭ Chaćko.
Kažuć taksama, što paśla zvalnieńnia Chaćko pačaŭ zahladać u čarku. A taksama klaŭ miascovaha kiraŭnika KDB, što padstaviŭ čałavieka, viernaha Łukašenku.
