Biełaruskija tvorcy praciahvajuć zasvojvać ukrainskuju miedyjnuju i kulturnuju prastoru. Šlacham kamičnaha dueta Sašy i Sirožy (Alaksandra Chackieviča i Siarhieja Michałka), jakija koliś atabarylisia na ŭkrainskim kanale M1 — u pachod pa ŭvahu šyrokaj ukrainskaj publiki vypravilisia i biełaruskija litaratary. Rasiejskamoŭnaja piśmieńnica z Brestu Kaciaryna Miadźviedzieva pa vynikach svajoj pieramohi ŭ mižnarodnym litaraturnym konkursie rukapisaŭ «Dziciačy partał», vydała apovieść-kazku pa-ukrainsku.
«Našaje vydaviectva cenić u tekstach dla junactva lohkuju manieru, datrymany styl, dynamičny siužet i mahčymaść supieražyvać apaviedzienamu. Usio heta ŭ knizie Miadźviedzievaj «Šklany, ałavianny, draŭlany» jość», — kaža Ŭładzimir Bryskin, kiraŭnik vinickaha vydaviectva «Teza», jakoje śpiecyjalizujecca na vydańni fantastyčnaj i dziciačaj litaratury pa-ukrainsku.
«Šklany, ałavianny, draŭlany» — kazka dla padletkaŭ i darosłych z elemientami fentezi dla padletkaŭ i darosłych pra pryhody pryncesy Jantaryny. Akramia jaje ŭ knihu ŭvajšli apovieść i kolki apaviadańniaŭ biełaruskaj piśmieńnicy.
Mižnarodny konkurs rukapisaŭ «Dziciačy partał» pravodzicca va Ŭkrainie štohod. Konkurs asacyjavany z asamblejaj fantastyki ŭ Kijevie «Partał». Konkurs prymaŭ teksty na lubych movach, zrazumiełych žury: ukrainskaj, biełaruskaj, anhielskaj, polskaj i rasijskaj. Miadźviedzieva dasłała svoj rukapis u katehoryju «13+» (knihi dla padletkaŭ) i ŭ 2007 pieramahła, zasłužyŭšy pry hetym prava vydać ułasnuju knihu.
Kniha vyjšła niadaŭna, i pakul što zarana kazać pra paśpiachovaść. Kali aryjentavacca na vodhuki čytačoŭ, dyk jany dyjamietralna procilehłyja. Chtości ličyć, što vydaviectvu paščaściła adkryć novaje imia ŭ litaratury, chtości narakaje, što ŭ knizie ŭsio druhasnaje. Ale jak śćviardžajuć vydaŭcy, hetki rozhałas śviedčyć pra «nieardynarnaść talentu».
Kaciaryna Miadźviedzieva naradziłasia ŭ 1980 h. u Breście. Zakončyła fiłałahičny fakultet Bresckaha ŭniviersitetu pa śpiecyjalnaści «rasijskaja fiłałohija». Piša kazki, apaviadańni, vieršy. Drukavałasia doma (časopis «Nioman») , a taksama za miažoj (kalektyŭny zbornik prozy «Tam, dzie nieba sychodzicca ź ziamloju», ZŠA) (paetyčny zbornik «Śniežny kamiak»). U 2009 h. Miadźviedzieva pieramahła ŭ ahulnabiełaruskim konkursie maładych litarataraŭ pravodziŭsia aficyjnym Sajuzam piśmieńnikaŭ Biełarusi sumiesna z Rasijskim tavarystvam.
«Vydavacca na Biełarusi mnie nie prapanavali, — kaža Kaciaryna Miadźviedzieva. — A voś na Ŭkrainie - tak. Supraca z ukrainskaj «Tezaj» budzie praciahnutaja. Spadziajusia, nieŭzabavie źjavicca kniha kazak na rasijskaj movie».
Ciapier da vydańnia rychtujecca druhaja kniha biełaruskaj aŭtarki «Žovti škarpietki dla spadkojemcia» («Žoŭtyja škarpetki dla spadkajemcy»).
