Łukašenka znajšoŭ alternatyŭnuju krynicu enerhii za akijanam.
Fota BIEŁTA
Vieniesueła budzie pastaŭlać u Biełaruś 80 tysiač barelaŭ nafty ŭ dzień. Pra heta paviedamiŭ prezident Vieniesueły Uha Čavies u časie vizitu Alaksandra Łukašenki za akijan. Nie dla ŭnutrybiełaruskich patreb, jakija zabiaśpiečvajucca biazmytnaj naftaj z Rasii. Paśla pierapracoŭki hetuju naftu płanujecca pradavać u Jeŭropie. Pastaŭki majuć raspačacca ŭ traŭni.
Abjomy ŭražvajuć: heta amal 4,2 miljona ton nafty za hod. Nahadajem, što ŭłasnyja patreby Biełarusi składajuć kala 6 młn ton, a ŭłasnabiełaruskaja zdabyča skłała ŭ 2009 hodzie ŭsiaho 1,7 młn t. Dahetulešnija absiahi ekspartu z Rasiei pieravyšali 21 młn t za hod. Ciapier ich udasca źnizić.
Kali dziŭnavaty hiešeft udasca, heta budzie samym značnym za časy niezaležnaści krokam pa źnižeńni enerhazaležnaści Biełarusi ad Rasii.
Padrychtoŭkaj pahadnieńniaŭ zajmalisia pieršy vice-premjer urada Uładzimir Siamaška i śpiecyjalny pasłańnik pa adnosinach ź Vieniesuełaj Viktar Šejman.
«My paćvierdzili hatoŭnaść padtrymać Biełaruś u enierhietyčnaj śfiery i ŭ najbližejšy čas padpišam pahadnieńnie ab pastaŭkach nafty», – zajaviŭ Čavies pa vynikach sustrečy z Alaksandram Łukašenkam, jak cytujuć infarmacyjnyja ahienctvy.
«Hety vizit (Łukašenki) dazvalaje nam dać novy impuls, nieabchodny va ŭmovach suśvietnaha ekanamičnaha kryzisu. Našyja krainy viedajuć, jak prasoŭvacca napierad, jak davać dalejšy impuls našaj madeli raźvićcia ŭ supolnych namahańniach, jakija bazujucca na sacyjaliźmie, niezaležnaści, suvierenitecie i šmatpalarnym śviecie», – dadaŭ Čavies.
Łukašenka, u svaju čarhu, skazaŭ, što «ŭzhodnienyja ŭmovy pastavak vieniesuelskaj nafty na rynak Biełarusi, dzie my zmožam jaje pierapracoŭvać i zatym supolna pradavać na jeŭrapiejskim rynku». Jahonyja słovy pryvodzić ahienctva BIEŁTA.
Supolnaje biełaruska-vieniesuelskaje pradpryjemstva «Pietralera BiełaVieniesuełana» siońnia zdabyvaje kala 1 młn t nafty ŭ hod. «My budziem i dalej raźvivać zdabyču nafty ŭ intaresach abiedźviuch krain», – dadaŭ Łukašenka.
Akramia taho, kiraŭniki dziaržavaŭ damovilisia pra toje, što biełarusy buduć vieści hazifikacyju vieniesuelskich haradoŭ i pasiołkaŭ. «Za najbližejšy hod my pabudujem u Vieniesuele 3-4 zavody pa vytvorčaści traktaroŭ, aŭtamabilaŭ, vialikahruznych aŭtamabilaŭ, bujny cahielny zavod, raźličany na vypusk 100 tys. tonaŭ umoŭnaj cehły», – skazaŭ biełaruski kiraŭnik.
«My damovilisia pa ŭsich pytańniach, – padkreśliŭ Alaksandr Łukašenka. – U najbližejšy čas my naviedajem budoŭli, budziem adkryvać novyja radoviščy, novyja pasiołki, jakija pabudavali dla našych vieniesuelskich bratoŭ».
Cana budučaj nafty pakul nie ahałošvajecca.
Vieniesueła pastaŭlaje naftu pa lhotnych cenach na Kubu, u Nikarahua i inšym, drabniejšym sajuźnikam, a taksama navat asobnym «braterskim» haradkam u Štatach. Hetyja pastaŭki majuć palityčnuju podbiŭku. Čaves finansuje krainy, jakija padtrymlivajuć jaho ŭ baraćbie za ŭpłyŭ na suśvietnaj arenie, pieravažna suprać ZŠA. Adnak sama Vieniesueła znachodzicca ŭ davoli sumnym ekanamičnym stanoviščy. Hetak, sioleta kraina pakutavała ad deficytu elektraenerhii. Vidavočna, što pastaŭki nafty ź Vieniesueły za śviet, u dalokuju Jeŭropu, buduć zaležać ad palityčnaha losu Čavesa.
Dahetul najbližejšym i najbolšym rynkam dla nafta ź bierahoŭ Arynoka byli ZŠA.
