Aŭtar adnoj ź jaskravych knižak 2008 hodu «Žyć nie strašna» Barys Piatrovič vydaŭ apovieść «Płošča». Hałoŭnyja hieroi apovieści — maładyja ludzi, žychary namiotavaha haradka na Kastryčnickaj płoščy, udzielniki pratestovych akcyjaŭ u časie papiarednich prezidenckich vybaraŭ 2006 hodu.
«Naša Niva»: Spadar Barys, vy pajšli ŭ palityku?
Barys Piatrovič: Nijakim čynam. Maja novaja kniha — reč čysta mastackaja, nie źviazanaja z palitykaj, adno z toj atmaśfieraj, što była roŭna 4 hady tamu ŭ Minsku, kali adbyvalisia prezidenckija vybary. Častkova «Płošča» — heta stylizacyja pad dziońniki niepasrednych udzielnikaŭ pratestovych akcyjaŭ. Pratatypaŭ tut niama, hieroi vydumanyja, ale całkam vierahodna, što niekatoryja ŭdzielniki paznajuć u hetaj apovieści siabie.
«NN»: Dyk heta publicystyka?
BP: Taksama nie. Chacia raniej ja hulaŭ u litaraturu, całkam vydumvaŭ siužety i padziei, adychodziŭ ad žyćcia, a ŭ dadzienym vypadku ja nibyta viarnuŭsia da realnaści z paznavalnym siužetam i sapraŭdnymi dekaracyjami Płoščy… Adnak hetaja kniha — nie žurnalisckaje daśledavańnie. Ja ŭsio roŭna jak daŭ vyhavarycca tym ludziam, niepasrednym udzielnikam. Mienavita tamu hetaja kniha, jakaja była napisanaja jašče ŭ 2007 hodzie, vydadzienaja tolki ciapier: mnie nie chaciełasia, kab hetaja reč prymałasia jak dakumientalnaja. U dadatak heta kniha pra kachańnie, kachańnie pamiž maładymi ludźmi, jakija znachodziacca ŭ viry dramatyčnych padziejaŭ.
«NN»: «Hieroi našaha času»?
BP: U našaj litaratury nadta mała tvoraŭ pra sučasnaść. Zbolšaha biełaruskaja litaratura abapirajecca na minułaje, histaryčnaje, XVIII-XIX stst., znoŭ ža na vajnu, na ŭspaminy dziacinstva piśmieńnika… A voś mnie było cikava zakranuć ciapierščynu, toje, što adbyvałasia niekalki hod tamu i čamu byli śviedkami tysiačy i tysiačy ludziej. U dadatak mnie prosta nie chaciełasia, kab hetyja padziei zabylisia, adyšli ŭ minułaje. Ja paličyŭ nieabchodnym nahadać pra tuju moładź, jakaja biez nadziei na pieramohu, usio ž vyjšli i achviaravali svaimi karjerami i vučobaj.
Prezientacyja novaj apovieści Barysa Piatroviča «Płošča» adbudziecca ŭ hadavinu papiarednich prezidenckich vybaraŭ, 19 sakavika (piatnica). Uprava BNF (vuł. Varvašeni, 8). Pačatak a 17.
