Alaksandr Kułakoŭski z udzielnicami hurta «Kalina» i hościaj ź Biełarusi na hanku carkvy ŭ Mielburnie. Sakavik 2003 h.
U Mielburnie (Aŭstralija) 18 sakavika pamior biełaruski pravasłaŭny śviatar Alaksandr Kułakoŭski. Jon nie dažyŭ siem dzion da 25 sakavika — svajho 85‑ha dnia naradžeńnia.
Alaksandr Kułakoŭski naradziŭsia 25 sakavika 1925 h. u v. Tuličava na Navahradčynie (tady Zachodniaja Biełaruś, Polšča) u sialanskaj siamji Ryhora i Ściefanidy Kułakoŭskich. U siamji było piaciora dziaciej, i ŭsie — braty (Mikałaj, Adam, Ryhor, Uładzimir). Alaksandr byŭ siarednim.
U 1942 h. Tuličava spalili niemcy ŭ časie karnaj akcyi. Heta była pomsta ŭ adkaz na partyzanski terakt.
Kułakoŭski pierabraŭsia ŭ Minsk, adkul u 1944 h. vyjechaŭ na Zachad. Niemcy adpravili jaho pad samuju francuzskuju miažu ryć bunkiery. Pa skančeńni vajny apynuŭsia ŭ biełaruskim łahiery ŭ Osterhofienie, dzie vučyŭsia ŭ biełaruskaj himnazii. Potym vučyŭsia ŭžo ŭ Pasaŭ i ŭ Niurnbierhu ŭ niamieckich prafiesijnych vučelniach, zdabyŭ adukacyju, što mocna prydałosia paśla pierajezdu ŭ Aŭstraliju.
U hetaj krainie pracavaŭ tokaram, źbiraŭ zavodskija stanki. Na piensiju vyjšaŭ, pracujučy na pošcie.
Amal adrazu pa pryjeździe ŭ Mielburn dałučyŭsia da biełaruskaha hramadskaha ruchu, čym i zajmaŭsia ŭ volny čas.
U 1953 h. Alaksandr Kułakoŭski ažaniŭsia z Raisaj Borstak. Vychavaŭ dvuch dačok — Irenu i Vieru. Adna pracuje nastaŭnicaj, druhaja zajmajecca biznesam.
U 1958 h. a. Madest (Jackievič) zasnavaŭ u u Mielburnie parafiju BAPC imia Troch Vilenskich Pakutnikaŭ. Kułakoŭski napačatku kiravaŭ carkoŭnym choram, a ŭ 1963 h. u Ńju‑Jorku byŭ vyśviačany na dyjakana, a potym atrymaŭ i śviatarskija vyśviačeńni.
Paśla adychodu a. Madesta z parafii i staŭ nastajacielem parafii Troch Vilenskich Pakutnikaŭ.
Pry im było zasnavana dabračynnaje Siastryctva, žanočy śviecki chor «Kalina», jaki isnuje i dahetul, a ŭ 1981 h. ź inicyjatyvy ajca Kułakoŭskaha kupleny novy budynak dla carkvy.
Ajciec Alaksandr Kułakoŭski taksama byŭ inicyjataram nabyćcia dzialanki pad biełaruskija pachavańni na haradskich mohiłkach Foŭknier u Mielburnie.
