Andrej Sańnikaŭ staŭ druhim apazicyjanieram paśla Alesia Michaleviča, jaki zajaviŭ pra svoj udzieł u prezidenckich vybarach. Što moža pryvabić vybarcaŭ u hetym kandydacie? I, naadvarot, adšturchnuć? Analiz «NN».
1. Rašučaść
+
Andrej Sańnikaŭ nie źbirajecca ŭdzielničać u vybarach prosta dziela ptušački. Na kartu pastaŭlena zašmat. Nijakaj łajalnaści ci abyjakavaha staŭleńnia ad uładaŭ Sańnikaŭ čakać nie moža — buduć bić. Pačali bić užo ciapier. Niadaŭna palityka i jaho žonku, viadomuju žurnalistku Irynu Chalip, dapytali pa spravie ab paklopie na byłoha načalnika Upraŭleńnia KDB pa Homielskaj vobłaści Ivana Karža.
—
Kali jość u Biełarusi radykalnaja apazicyja, dyk heta jakraz atačeńnie «Chartyi‑97». Palityk uvieś čas ćviorda vystupaŭ za praciah ekanamičnych i palityčnych sankcyj suprać biełaruskaha kiraŭnictva, pakul u krainie nie ŭstalujucca demakratyčnyja svabody. Z adnaho boku, pazicyja Sańnikava jasnaja dla vybarca. Ź inšaha — praźmiernaja radykalnaść moža niekaha adšturchnuć.
2. Ludzi
+
«Jeŭrapiejskaja Biełaruś». Za Sańnikavym staić aktyŭnaja i rašučaja moładź. «Heta adziny kandydat, jaki budzie pracavać na pieramohu», — kažuć chłopcy z «Jeŭrapiejskaj Biełarusi». Častka ź ich prajšła praz škołu ŭžo lehiendarnaha «Zubra». «Jeŭrapiejskaja Biełaruś» pieršaja na ŭsich vuličnych akcyjach apazicyi. Na ich raŭniajucca inšyja. Takija ludzi i robiać vybarčyja kampanii.
—
Adsutnaść jakoj‑niebudź palityčnaj struktury. Kazulin pierad tym, jak pajści na vybary ŭ 2006 hodzie, uznačaliŭ Biełaruskuju sacyjał‑demakratyčnuju partyju. U Sańnikava partyi ci inšaj arhanizacyi niama. Praŭda, za im staić starejšaje pakaleńnie siabroŭ Partyi BNF na čale z Barščeŭskim, Viačorkam, Ivaškievičam, dy pieršy kiraŭnik niezaležnaj Biełarusi Stanisłaŭ Šuškievič.
3. Internet
+
Raskručanaja internet‑staronka. Sańnikava budzie padtrymlivać adzin z najbolš papularnych internet‑resursaŭ — charter97.org. Sajt «Chartyi‑97» maje 32 tysiačy stałych naviednikaŭ. A pierad vybarami hetaja kolkaść jašče vyraście na chvali rostu palityčnaj aktyŭnaści.
—
Navat u apazicyjnych asiarodkach «Chartyja‑97» maje nie samuju lepšuju reputacyju. Časta možna pačuć, što hety partał nazyvajuć za padaču materyjałaŭ «BT naadvarot», a taksama krytykujuć za cenzuru čytackich vykazvańniaŭ u kamientarach. Na «Chartyi» ž kažuć, što heta dyscyplina.
4. Karjera
+
Dypłamatyčnaja karjera. Andrej Sańnikaŭ prajšoŭ vydatnuju dypłamatyčnuju škołu. Jašče za savieckim časam pracavaŭ u biełaruskim pradstaŭnictvie AAN u Ńju‑Jorku. Byŭ daradcam misii ŭ Ženievie. U 1995 hodzie Andrej Sańnikaŭ byŭ pryznačany namieśnikam ministra zamiežnych spravaŭ. Sam palityk kaža, što jamu nie soramna zhadvać pra toj čas, bo ŭsio, što jon rabiŭ, rabiłasia dziela ŭmacavańnia biełaruskaha suvierenitetu.
—
Biespracoŭny. Apošnija 14 hadoŭ Andrej Sańnikaŭ nie maje stałaj pracy. Dla vybarščykaŭ heta budzie adnym z punktaŭ niedavieru da kandydata. Dziaržaŭnyja telekanały i haziety taksama mohuć učapicca za hety fakt ź bijahrafii.
5. Vyhlad
+
Paśla pracy na dypłamatyčnaj nivie ŭ Andreja Sańnikava zastalisia dobryja suviazi za miažoj. I najpierš — u ZŠA. Napeŭna, z usich biełaruskich palitykaŭ jon najčaściej robić pracoŭnyja pajezdki ŭ Vašynhton. Jon maje kantakty ŭ Dziarždepartamiencie. U spadčynu ad dypłamatyčnaj pracy ŭ Sańnikava zastałosia dobraje razumieńnie mižnarodnych palityčnych pracesaŭ i dosyć cełasnaje bačańnie biahučaj situacyi ŭ krainie i śviecie, jakoha brakuje mnohich inšym jarkim asobam u apazicyi.
—
Niepryvabny vyhlad. Hustaja barada i sutułaść nie dadajuć imidžu Sańnikava plusaŭ. Ale ad «chartyjcaŭ» možna čakać jarkich i zapaminalnych krokaŭ. Tamu mahčymaści, što pierad vybarami Sańnikaŭ paŭstanie ŭ novym vyhladzie, vyklučać nie davodzicca.
