U ZŠA ŭ vieku 71 hodu pamior viadomy sacyjolah, daśledčyk hramadzkaje dumki Ŭoren Mitoŭski (Warren Mitofsky).
Mitoŭski byŭ pieršym sacyjolaham, jaki vykarystaŭ dla analizu vynikaŭ praktyku apytańnia prahałasavałych na vychadzie z vybarčych učastkaŭ, što atrymała nazvu exit polls.
Upieršyniu exit polls byli aprabavanyja Mitoŭski na vybarach hubernatara štatu Kientuki ŭ 1967 h. dla telekanała CBS. A ŭžo ŭ 1972 h. padčas prezydenckich vybaraŭ jon pravioŭ exit polls u ahulnanacyjanalnym maštabie, apytaŭšy bolš za 3000 čałaviek.
Pavodle słoŭ dyrektara słužby CBS pa analizie hramadzkaj dumki Ketlin Frankovič, "Mienavita dziakujučy Ŭorenu Mitoŭski ZŠA, a zatym i ŭvieś śviet atrymali mahčymaść daviedacca chutka i praŭdziva, chto pieramoh na vybarach i što sami vybarcy dumajuć na hety kont".
Mitoŭski byŭ adnym z zasnavalnikaŭ amerykanskaha ahulnanacyjanalnaha kansorcyjumu Voter News Service (VNS), hałoŭnaj zadačaj jakoha stała praviadzieńnie niezaležnaha padliku hałasoŭ na prezydenckich vybarach i kaardynacyja vynikaŭ exit polls, ažyćcioŭlenych viadučymi infarmacyjnymi ahienctvami i telekanałami, takimi jak ABC, CBS, NBC, CNN, Fox i Associated Press.
U 1993 h. Mitoŭski arhanizavaŭ ułasnaje ahienctva Mitofsky International, supracoŭniki jakoha pravodzili exit polls na vybarach u roznych krainach, u tym liku Rasiei, Meksycy, Filipinach i Azerbajdžanie.
Aproč taho, u peryjad pracy na kanale CBS Mitoŭski i jahony paplečnik Džozef Vaksberh vynajšli metad telefonnaha apytańnia nasielnictva jak pa zahadzia ŭziatych, tak i pa vypadkovych numarach.
Mitoŭski byŭ prezydentam Amerykanskaj asacyjacyi pa daśledavańni hramadzkaj dumki i Nacyjanalnaha savietu pa praviadzieńni exit polls.