Rašeńnie Abjadnanaj hramadzianskaj partyi vyjści z kampanii miascovych vybaraŭ ułada prakamientavała pradkazalna: «Kiepska vajujuć».
«Ciarpieć parazu ŭ adkrytym bai jany nie chočuć. Jany vyrašyli lepš padniać ruki i zdacca, a potym havaryć, što dobra vajavali. Kiepska vajujuć», — prypiačataŭ deputat Pałaty pradstaŭnikoŭ Michaił Rusy.
Budźcie ŭpeŭnieny, temu jašče adpracuje pa poŭnaj prahramie aficyjnaja prapahanda.
Zrešty, heta nie ździvić Anatola Labiedźku, staršyniu AHP, čarhovy raz pieraabranaha na źjeździe ŭ minułuju niadzielu. Ź im my hutaryli ab mahčymym demaršy jašče niekalki dzion tamu, i lider libierałaŭ vykazaŭsia ŭ tym sensie, što prapahandzie ŭsio roŭna jazyk nie zaviažaš. Ale treba, ličyć jon, iści na pryncyp dziela prezidenckich vybaraŭ.
Arhumientacyja, kali hranična spraščać, takaja:
my braźniem dźviaryma, Jeŭropa prysaramacić biełaruskaje kiraŭnictva — i jano źmiakčyć praviły hulni padčas nastupnaj elektaralnaj kampanii.
U tytulnaj apazicyi sapraŭdy dastatkova arhumientaŭ, kab skazać užo siońnia: test na spraviadlivaść miascovych vybaraŭ viertykal pravaliła. Tak, va ŭčastkovyja kamisii ŭklučyli amal usich vyłučanych pradstaŭnikoŭ praŭładnych partyj, a voś apazicyjnych vyłučencaŭ praredzili, ličy, u dziesiać razoŭ. U vyniku apošnija składajuć u vybarkamach nižniaha źviana śmiechatvornuju dolu ŭ 0,15%.
Tak što kali vykarystoŭvać deputackuju mietafaru nakont boju, možna skazać, što bataljon apanientaŭ ułady, jakija ŭźnialisia ŭ rost, spakojna vykasili kulamiotami z dotaŭ. Hetakaja biurakratyčnaja «linija Stalina» va ŭsioj svajoj źniščalnaj krasie, zusim nie demantavanaja z pryniaćciem papravak u Vybarčy kodeks.
Karaciej, padstava braznuć dźviaryma jość.
Inšaje pytańnie, jaki budzie efiekt. Chto hetaje brazhańnie pačuje i jak adreahuje?
«Takija dziejańni majuć sens, kali jość subjekty, jakija naležnym čynam ich aceniać», — adznačaje Viktar Karniajenka, namieśnik staršyni ruchu «Za Svabodu», jaki pradstaŭlaje taksama Biełaruski niezaležnicki błok (BNB). U hetym ža vypadku, na dumku palityka, ni ŭłada, ni narod, ni Jeŭropa nie adhuknucca tak, jak chaciełasia b inicyjataram demaršu.
Ułada, jak lohka było sprahnazavać, lišni raz paściabajecca: słabaki! Narod prahłynie mienavita takuju traktoŭku z zombaskryni. I ŭžo, va ŭsiakim razie, na vulicy pratestavać — navošta pakryŭdzili apazicyju, sapsavali vybary?! — nie łamaniecca. Nu, a Jeŭropa, adznačajučy, kaniečnie, parušeńni pa chodu, zaŭsiody kancentruje ŭvahu mienavita na fazie hałasavańnia, nahadvaje Viktar Karniajenka.
Adznačym, što na samim źjeździe AHP pytańnie vyrašałasia ŭ vostraj dyskusii, i prychilniki vychadu z kampanii pieramahli zusim nie z razhromnym likam 66:37.
Niama adzinstva pa hetym pytańni i ŭnutry Abjadnanych demakratyčnych sił.
Tym bolš prablematyčna znajści ahulnuju movu z BNB. U ruchu «Za Svabodu», Partyi BNF, stvaranaj BCHD dy inšych strukturach kaalicyi kankurentaŭ (budziem havaryć biez dypłamatyi) daminuje nastroj iści da kanca. Jakomu, adnak, spadarožničaje ryzyka być abvinavačanymi ŭ reniehactvie i zmovie z uładami: nu‑nu, padhulvajecie, padtrymlivajecie fars, čakajučy, što «vydzielać» paru dziesiatkaŭ mandataŭ!
Adnak i ŭ tych, chto ličyć, što «futboł pavinien adbycca pry lubym nadvorji», — svaje važkija arhumienty.
Pa‑pieršaje, kampanija — heta lehalnaja placoŭka dla ahitacyi.
Voś čamu sojm Partyi BNF 20 sakavika, nie majučy iluzij nakont stupieni demakratyčnaści hetych vybaraŭ, usio ž zaklikaŭ svaich ludziej nie zdymacca.
Pa‑druhoje, tolki baraćba da finalnaha śvistka daje mahčymaść złavić viertykal na falsifikacyjach, jakija nie schodziać u ludziej ź jazykoŭ, ale vielmi ŭžo niaŭłoŭnyja. A kali ŭ akruzie bałatujecca tolki praŭładny kandydat — navošta padtasoŭvać? Niachaj choć usia Jeŭropa pryjazdžaje dy lubujecca na tryumf čystych da sterylnaści biełaruskich vybaraŭ.
Adznačym: udzielniki źjezda AHP pryniali, u pryncypie, kampramisnaje rašeńnie: chto choča, niachaj idzie dalej, ale ŭžo ŭ paradku asabistaj inicyjatyvy. Anatol Labiedźka tak i skazaŭ: nichto nie zabaraniaje siabram partyi bałatavacca ŭ miascovyja saviety jak pryvatnym asobam.
Zrabili, zdajecca, pryhoža, jak sapraŭdnyja libierały. Tolki voś
u vačach elektaratu, nie daśviedčanaha ŭ tonkaściach chitramudrych manieŭraŭ na poli tytulnaj apazicyi, situacyja vyhladaje inakš: dy jany ž navat miž saboj damovicca nie mohuć! Znoŭ: chto ŭ les, a chto pa drovy.
Demarš mieŭ by šansy na žadany efiekt tolki ŭ vypadku poŭnaj kansalidacyi apazicyjnych sił. Voś tady b i Jeŭropa vymušana była skazać tutejšamu načalstvu: sory, ale heta ŭžo sapraŭdy aby što, a nie vybary! «Nizačot».
Nu, a tak efiekt zmazvajecca.
Samaje ž sumnaje, što raźjadnanaść apazicyi apryjory asłablaje jaje šansy na prezidenckich vybarach.
Da słova, naiŭna dumać, što na ich ułady źmiakčać umovy, kab Jeŭropie spadabałasia. Heta na miascovych abo navat parłamienckich vybarach jašče možna pahulać, a prezidenckaje kresła — sami razumiejecie, heta śviatoje. Tut užo ŭsie ŭmoŭnaści da djabła!
Akramia taho, užo ciapier vidavočna, što adzinaha kandydata ŭ apazicyi nie atrymajecca.
«Prezidenckaja kampanija budzie nahadvać papiaredniuju», — prahnazuje palitołah Valer Karbalevič. Tady, nahadajem, hałasy apazicyjnaha elektaratu raściahnuli dva Alaksandry — Milinkievič i Kazulin.
Na dumku ekśpierta, ułady «pastarajucca stvaryć iluziju demakratyčnaści i tamu zarehistrujuć jak maha bolš inicyjatyŭnych hrup».
«Vialikaja kolkaść apazicyjnych pretendentaŭ razmazvaje ideju alternatyvy», — havoryć Karbalevič.
Inšaja reč, što sabrać sto tysiač podpisaŭ za vyłučeńnie (a realna treba bolej, z zapasam) — zadača niaprostaja. Niekatoryja palitołahi miarkujuć, što zarehistravacca pašencić tolki adnamu z sapiernikaŭ Łukašenki. Ale pry hetym apazicyjny kandydat — voś u čym zahvazdka! — nie budzie «adzinym».
I kali ščaśliŭčykam stanie, naprykład, Alaksandr Milinkievič, to naiŭna čakać, što za pośpiech jaho kampanii buduć kaściami kłaścisia ludzi z ADS.
Roŭna jak i naadvarot: kali zarehistrujuć tolki Siarhieja Kalakina abo Anatola Labiedźku ad ADS, to BNB najchutčej što pažadaje ŭdačy vyklučna vierbalna.
Najbolš ža zručny dla ŭłady varyjant — zarehistravać dvuch‑troch apazicyjanieraŭ (viertykal, moža, padklučyć da zboru podpisaŭ?). I biez napružańnia zrabić remejk vybaraŭ‑2006.
