Sioletni dzień horadu mała adroźnivaŭsia ad inšych śviataŭ, što ładziać u biełaruskaj stalicy ŭłady. Hetym razam Mienharvykankam navat nie pajšoŭ na takuju mieru, jak na zabaronu prodažu alkaholnych napojaŭ. Hory vypitych plašak ad piva i bolš mocnych trunkaŭ na ranicu paśla śviatkavańnia davodziłasia vyhrabać sa staličnych vulicaŭ padmiatajłam i kamunalnym słužbam. Usio b było jak zvyčajna, kab nie adzin incydent, što zdaryŭsia ŭ elektryčcy Miensk-Puchavičy.
Na elektryčcy «Miensk–Puchavičy» a 0:20 źjaždžali dadomu tyja, chto najbolej zabaviŭsia ŭ śviatočnaj stalicy. Siarod ich značnuju častku składała moładź, što dobra nastupiła na korak u Miensku. Paśla pamiž imi akurat i pačalisia razborki a-la «miastečka na miastečka»: rudzienskija na puchavickich, Mačuliščy na Michanavičy, i nie raźbiareśsia, chto na kaho. U lepšym žanry viaskovych dyskatek, kali pradstaŭniki adnoj vioski dziela zabavy pačynajuć vyśviatlać adnosiny z chłopcami ź inšaj. Usio skančvajecca moram kryvi, raźbitymi tvarami i zadavalnieńniem ad ułasnaj «krutaści».
Pavodle słovaŭ vidavočcaŭ, pjanyja bejbusy zastupili ŭvachod i vychad z treciaha vahonu elektryčki, a ludzi, što sprabavali ŭsio adno vyjści, byli źbityja, niezaležna ad połu. Narad milicyi z dvuch čałaviek, što dziažuryŭ na maršrucie, nie dapamoh pasažyram – moładź značna pierasiahała ich u sile.
Pa niejkim časie bojka miž hrupoŭkami pierachodzić na vulicu, ale niekatoryja chłopcy praciahvali trymać dźviery. Z vulicy ŭ vahon palacieli bujnyja kamiani. Sa słovaŭ staršaha inspektara adździaleńnia achovy pravaparadku AUS na transparcie Alaksandra Žylinskaha, było pabita kamianiami trynaccać šybaŭ vahonaŭ, ale traŭmu atrymała tolki adna dziaŭčyna, jakoj raźbili hubu.
Elektryčka ŭ hety momant nie mahła ruchacca, bo niechta ŭvieś čas naciskaŭ na stop-kran. Pasažyry suprać svajoj voli apynulisia ŭ samym piekle pjanych razborak, nibyta tyja zakładniki ŭ terarystaŭ. Što rabiła ŭ toj čas milicyja, niemaviedama.
Vidavočcy zapeŭnivajuć, što takija bojki nie pierapynialisia da samaha Rudziensku, kali miascovyja boŭdziły narešcie pakinuli vahon, ale i na hetym pryhody inšych pasažyraŭ elektryčki nia skončylisia, bo z vulicy ŭžo ŭ druhi raz za viečar palacieli kamiani. Ludzi pačynajuć chavacca ad svajho biaśsilla chto kudy moža.
U paniadziełak u abied u Puchavickim RUUS uvohule ničoha nia viedali pra zdareńnie na čyhuncy, jany kazali, što ŭ aperatyŭnuju chroniku hety incydent pakul nie traplaŭ.
Alaksandar Žylinski havoryć, što na hetaje zdareńnie ŭžo zaviedziena kryminalnaja sprava pa fakcie chulihanstva, ale ciažka mierkavać dakładna, ci buduć pakaranyja vinavatyja. I chto ŭvohule vinavaty ŭ hetaj sytuacyi? Pjany ŭhar na dziaržaŭnyja śviaty stanovicca zvyčajnaj spravaj dla našaj dziaržavy. Hałoŭnaje, kab i zdareńni kštałtu rudzienskaha nia stali normaj.
Fota photo.bymedia.net
